ਕੇਜਰੀਵਾਲ ਤੇ ਭਗਵੰਤ ਮਾਨ ਵੱਲੋਂ ਰੋਡ ਸ਼ੋਅ ਭਲਕੇ

ਜੀਂਦ: ਆਮ ਆਦਮੀ ਪਾਰਟੀ ਹਰਿਆਣਾ ਵਿੱਚ ਸਾਲ 2024 ਦੇ ਲੋਕ ਸਭਾ ਅਤੇ ਵਿਧਾਨ ਸਭਾ ਚੋਣਾਂ ਦੀਆਂ ਤਿਆਰੀਆਂ ਦਾ ਜੀਂਦ ਦੀ ਧਰਤੀ ਤੋਂ 8 ਜੂਨ ਨੂੰ ਬਿਗੁਲ ਵਜਾ ਰਹੀ ਹੈ। ਇਸ ਸਬੰਧੀ ਆਮ ਆਦਮੀ ਪਾਰਟੀ ਦੇ ਮੁਖੀ ਅਤੇ ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ, ਪੰਜਾਬ ਤੋਂ ‘ਆਪ’ ਦੇ ਮੁੱਖ ਮੰਤਰੀ ਭਗਵੰਤ ਮਾਨ 8 ਜੂਨ ਨੂੰ ਇੱਥੇ ਕੁੰਦਨ ਸਿਨੇਮਾ ਦੇ ਕੋਲ ਰੋਡ-ਸ਼ੋਅ ਕਰ ਰਹੇ ਹਨ। ਇਸ ਗੱਲ ਦਾ ਖੁਲਾਸਾ ਅੱਜ ਇੱਥੇ ਪੀਡਬਲਿਊਡੀ ਰੈਸਟ ਹਾਊਸ ਵਿੱਚ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦੇ ਹੋਏ ਰਾਜ ਸਭਾ ਮੈਂਬਰ ਅਤੇ ‘ਆਪ’ ਦੇ ਹਰਿਆਣਾ ਮੁਖੀ ਡਾ. ਸੁਸ਼ੀਲ ਗੁਪਤਾ ਨੇ ਕੀਤਾ। ਉਨ੍ਹਾਂ ਦੇ ਨਾਲ ‘ਆਪ’ ਨੇਤਾ ਅਨੁਰਾਗ ਢਾਂਡਾ ਅਤੇ ਡਾ. ਅਸ਼ੋਕ ਤੰਵਰ ਹਾਜ਼ਰ ਸਨ। ਡਾ. ਸੁਸ਼ੀਲ ਗੁਪਤਾ ਨੇ ਕਿਹਾ ਕਿ ਜੀਂਦ ਦੀ ਧਰਤੀ ਨੇ ਹਮੇਸ਼ਾ ਹੀ ਰਾਜਨੀਤੀ ਵਿੱਚ ਬਦਲਾਅ ਕੀਤੇ ਹਨ। ਚੌਧਰੀ ਦੇਵੀ ਲਾਲ ਜੀਂਦ ਦੀ ਧਰਤੀ ਤੋਂ 1986 ਵਿੱਚ ਮਿਲੀ ਰਾਜਸੀ ਤਾਕਤ ਤੋਂ ਹੀ 1987 ਵਿੱਚ ਉਪ ਪ੍ਰਧਾਨ ਮੰਤਰੀ ਬਣੇ ਸੀ। ਉਨ੍ਹਾਂ ਤੋਂ ਬਾਅਦ ਚੌਧਰੀ ਬੰਸੀ ਲਾਲ, ਭੁਪਿੰਦਰ ਸਿੰਘ ਹੁੱਡਾ, ਓਮ ਪ੍ਰਕਾਸ਼ ਚੌਟਾਲਾ ਆਦਿ ਅਨੇਕਾਂ ਨੇਤਾਵਾਂ ਨੂੰ ਜੀਂਦ ਦੀ ਧਰਤੀ ਤੋਂ ਸੱਤਾ ਮਿਲੀ ਸੀ। -ਪੱਤਰ ਪ੍ਰੇਰਕ