ਵਿਕਾਸ ਅਥਾਰਟੀ ਦੇ ਪੰਜ ਪ੍ਰਾਜੈਕਟ ਛੇਤੀ ਮੁਕੰਮਲ ਹੋਣ ਦੀ ਉਮੀਦ

ਪੱਤਰ ਪ੍ਰੇਰਕ
ਨਵੀਂ ਦਿੱਲੀ, 10 ਅਪਰੈਲ
ਦਿੱਲੀ ਦੇ ਉਪ ਰਾਜਪਾਲ ਵੀਕੇ ਸਕਸੈਨਾ ਦੇ ਸਿੱਧੇ ਦਖ਼ਲ ਤੋਂ ਬਾਅਦ ਦਿੱਲੀ ਵਿਕਾਸ ਅਥਾਰਟੀ (ਡੀਡੀਏ) ਦੇ ਕਈ ਅਹਿਮ ਪ੍ਰਾਜੈਕਟ ਛੇਤੀ ਪੂਰੇ ਹੋਣ ਦੀ ਉਮੀਦ ਹੈ। ਜਾਣਕਾਰੀ ਅਨੁਸਾਰ ਡੀਡੀਏ ਨੇ ਪੰਜ ਪ੍ਰਾਜੈਕਟ ਦੋ ਮਹੀਨਿਆਂ ਵਿੱਚ ਮੁਕੰਮਲ ਕਰਨ ਦਾ ਟੀਚਾ ਰੱਖਿਆ ਹੈ। ਦਵਾਰਕਾ ਸੈਕਟਰ 8, 19 ਅਤੇ 23 ਅਤੇ ਰੋਹਿਣੀ ਸੈਕਟਰ 33 ਸਥਿਤ ਵਿਸ਼ੇਸ਼ ਖੇਡ ਸਹੂਲਤਾਂ ਵਾਲੇ ਚਾਰ ਨਵੇਂ ਡੀਡੀਏ ਕੰਪਲੈਕਸ ਅਗਲੇ ਮਹੀਨੇ ਤੱਕ ਲੋਕ ਅਰਪਿਤ ਕੀਤੇ ਜਾਣਗੇ। ਇਨ੍ਹਾਂ ਕੰਪਲੈਕਸਾਂ ਵਿੱਚ ਵਿਸ਼ਵ ਪੱਧਰੀ ਸਿਖਲਾਈ ਬੁਨਿਆਦੀ ਢਾਂਚਾ ਸਥਾਪਤ ਕਰਕੇ ਕੌਮੀ ਖਿਡਾਰੀ ਪੈਦਾ ਕੀਤੇ ਜਾਣਗੇ। ਡੀਡੀਏ ਨੇ ਰੱਖ-ਰਖਾਅ ਲਈ ਸਖ਼ਤ ਮਾਪਦੰਡਾਂ ਨੂੰ ਯਕੀਨੀ ਬਣਾਉਂਦੇ ਹੋਏ ਇਨ੍ਹਾਂ ਸਹੂਲਤਾਂ ਦਾ ਪ੍ਰਬੰਧਨ ਪੇਸ਼ੇਵਰ ਖੇਡ ਏਜੰਸੀਆਂ ਨੂੰ ਸੌਂਪਣ ਦੀ ਯੋਜਨਾ ਬਣਾਈ ਹੈ। ਜਾਣਕਾਰੀ ਅਨੁਸਾਰ ਦਵਾਰਕਾ ਸੈਕਟਰ 8 ਵਿੱਚ ਕੁਸ਼ਤੀ, ਮੁੱਕੇਬਾਜ਼ੀ, ਜੂਡੋ ਅਤੇ ਕਰਾਟੇ ਲਈ ਇੱਕ ਸੈਂਟਰ ਆਫ਼ ਐਕਸੀਲੈਂਸ ਸਥਾਪਤ ਕੀਤਾ ਗਿਆ ਹੈ। ਇਸੇ ਤਰ੍ਹਾਂ ਸੈਕਟਰ 19 ਵਿੱਚ ਟੈਨਿਸ ਅਤੇ ਸ਼ੂਟਿੰਗ ਦੀਆਂ ਸਹੂਲਤਾਂ, ਸੈਕਟਰ 23 ਵਿੱਚ ਫੁਟਬਾਲ ਅਤੇ ਹਾਕੀ ਅਤੇ ਰੋਹਿਣੀ ਸੈਕਟਰ 33 ਵਿੱਚ ਇੱਕ ਵਾਟਰ ਸਪੋਰਟਸ ਕੰਪਲੈਕਸ ਸ਼ਾਮਲ ਹੈ। ਸੈਂਟਰ ਆਫ਼ ਐਕਸੀਲੈਂਸ ਨੂੰ ਚਲਾਉਣ ਲਈ ਏਜੰਸੀਆਂ ਪ੍ਰਤੀਭਾਗੀਆਂ ਨੂੰ ਅੰਤਰਰਾਸ਼ਟਰੀ ਅਥਲੀਟਾਂ ਵਜੋਂ ਤਿਆਰ ਕਰਨ ਅਤੇ ਉਨ੍ਹਾਂ ਨੂੰ ਅੰਤਰਰਾਸ਼ਟਰੀ ਮੁਕਾਬਲਿਆਂ ਵਿੱਚ ਭਾਗ ਲੈਣ ਲਈ ਸਾਰੀਆਂ ਸਹੂਲਤਾਂ ਦੇਣ ਦੀ ਯੋਜਨਾ ਹੈ।
ਕੜਕੜਡੂਮਾ ਵਿੱਚ ਨਿਰਮਾਣ ਅਧੀਨ ਟਰਾਂਜ਼ਿਟ ਓਰੀਐਂਟਿਡ ਡਿਵੈਲਪਮੈਂਟ ਪ੍ਰਾਜੈਕਟ ਇੱਕ ਸਾਲ ਦੇ ਅੰਦਰ ਮੁਕੰਮਲ ਹੋਣ ਦੀ ਉਮੀਦ ਹੈ। ਇਸ ਸਥਾਨ ’ਤੇ ਸਟੂਡੀਓ ਅਪਾਰਟਮੈਂਟਾਂ ਦੀ ਨਿਲਾਮੀ ਸ਼ੁਰੂ ਕਰਨ ਦਾ ਟੀਚਾ ਮਿੱਥਿਆ ਗਿਆ ਹੈ। ਉਪ ਰਾਜਪਾਲ ਨੇ ਕਿਹਾ ਕਿ ਪਹੁੰਚ ਸੜਕ ਇਸ ਸਮੇਂ ਨਿਰਮਾਣ ਅਧੀਨ ਹੈ ਅਤੇ ਜਲਦੀ ਹੀ ਪੂਰੀ ਹੋ ਜਾਵੇਗੀ। ਹਰਿਆਲੀ ਖੇਤਰ ਦੇ ਵਿਕਾਸ ’ਤੇ ਵੀ ਕੰਮ ਚੱਲ ਰਿਹਾ ਹੈ। ਇੱਕ ਸਾਲ ਦੇ ਸਮੇਂ ਵਿੱਚ ਦੋ ਦਫਤਰੀ ਕੰਪਲੈਕਸਾਂ ਅਤੇ ਦੋ ਰਿਹਾਇਸ਼ੀ ਟਾਵਰਾਂ ’ਤੇ ਕੰਮ ਪੂਰਾ ਕਰਨ ਦੀ ਉਮੀਦ ਹੈ। ਇਸੇ ਤਰ੍ਹਾਂ ਯਮੁਨਾ ਦੇ ਪਾਰ ਡੀਡੀਏ ਦੇ ਕੇਬਲ ਕਾਰ ਪ੍ਰਾਜੈਕਟ ’ਤੇ ਸਰਵੇਖਣ ਸ਼ੁਰੂ ਹੋ ਗਿਆ ਹੈ। ਐਲਜੀ ਸਕਸੈਨਾ ਨੇ ਕਿਹਾ ਕਿ ਕੇਬਲ ਕਾਰ ਵਿੱਚ ਯਾਤਰੀਆਂ ਨੂੰ ਨਦੀ ਪਾਰ ਕਰਨ ਲਈ ਰੋਪਵੇਅ ਜਾਂ ਕੇਬਲ-ਵੇਅ ਸਥਾਪਤ ਕਰਨ ਲਈ ਸਰਵੇਖਣ ਅਤੇ ਸਾਈਟਾਂ ਦੀ ਚੋਣ ਦੀ ਪ੍ਰਕਿਰਿਆ ਚੱਲ ਰਹੀ ਹੈ। ਇਹ ਉਨ੍ਹਾਂ ਪ੍ਰਾਜੈਕਟਾਂ ਵਿੱਚੋਂ ਇੱਕ ਹੈ ਜਿਸ ਦੀ ਹਾਲ ਹੀ ਵਿੱਚ ਦਿੱਲੀ ਵਿੱਚ ਪ੍ਰਦੂਸ਼ਣ ਘਟਾਉਣ ਲਈ ਇਹ ਯੋਜਨਾ ਉਲੀਕੀ ਗਈ ਹੈ। ਕੇਬਲ ਕਾਰਾਂ ਨਿਰਧਾਰਤ ਸਮੇਂ ਦੌਰਾਨ ਸਵੇਰ ਤੋਂ ਰਾਤ ਤੱਕ ਚੱਲਣਗੀਆਂ। ਹਰ ਗੇੜ ਵਿੱਚ ਲਗਭਗ 50 ਯਾਤਰੀਆਂ ਨੂੰ ਲਿਜਾਇਆ ਜਾਵੇਗਾ। ਡੀਡੀਏ ਨਦੀ ਦੇ ਦੋਵੇਂ ਪਾਸੇ ਮੈਟਰੋ ਸਟੇਸ਼ਨਾਂ ਦੇ ਆਲੇ ਦੁਆਲੇ ਦੇ ਖੇਤਰਾਂ ਦੀ ਚੋਣ ਕਰੇਗਾ ਤਾਂ ਜੋ ਹੜ੍ਹ ਦੇ ਮੈਦਾਨ ਨੂੰ ਬਿਨਾਂ ਕਿਸੇ ਕਬਜ਼ੇ ਜਾਂ ਕੰਕਰੀਟ ਦੇ ਸਿਸਟਮ ਸਥਾਪਤ ਕੀਤਾ ਜਾ ਸਕੇ।