ਖ਼ਰਾਬ ‘ਮੁਰਮਰੇ: ਆਂਗਣਵਾੜੀ ਕੇਂਦਰਾਂ ਵਿੱਚ ਰਾਸ਼ਨ ਦੀ ਪੜਤਾਲ

ਗੁਰਸੇਵਕ ਸਿੰਘ ਪ੍ਰੀਤ
ਸ੍ਰੀ ਮੁਕਤਸਰ ਸਾਹਿਬ, 26 ਮਾਰਚ
ਆਂਗਣਵਾੜੀ ਕੇਂਦਰਾਂ ਵਿੱਚ ਮਾਰਕਫੈੱਡ ਵੱਲੋਂ ਦਿੱਤੇ ਗਏ ਮੁਰਮਰੇ ਖ਼ਰਾਬ ਹੋਣ ਸਬੰਧੀ ਖਬਰਾਂ ਆਉਣ ਤੋਂ ਬਾਅਦ ਜ਼ਿਲ੍ਹਾ ਪ੍ਰੋਗਰਾਮ ਅਫ਼ਸਰ ਰਤਨਦੀਪ ਸੰਧੂ ਅਤੇ ਸੀਡੀਪੀਓ ਰਾਜਵੰਤ ਕੌਰ ਨੇ ਆਂਗਣਵਾੜੀ ਕੇਂਦਰਾਂ ਵਿੱਚ ਰਾਸ਼ਨ ਦੀ ਚੈਕਿੰਗ ਕੀਤੀ। ਉਨ੍ਹਾਂ ਦੱਸਿਆ ਕਿ ਚੈਕਿੰਗ ਦੌਰਾਨ ਪਾਇਆ ਗਿਆ ਕਿ ਕੁੱਝ ਆਂਗਣਵਾੜੀ ਕੇਂਦਰਾਂ ਵਿੱਚ 20 ਮਾਰਚ ਅਤੇ 21 ਮਾਰਚ ਨੂੰ ਭੇਜਿਆ ਗਿਆ ਰਾਸ਼ਣ ਮੌਜੂਦ ਸੀ। ਵਿਭਾਗ ਦੇ ਅਧਿਕਾਰੀਆਂ ਵੱਲੋਂ ਵੱਖ-ਵੱਖ ਆਂਗਣਵਾੜੀ ਕੇਂਦਰਾਂ ਤੋਂ ਇਲਾਵਾ ਸ਼ਿੰਦਰਪਾਲ ਕੌਰ ਆਂਗਣਵਾੜੀ ਵਰਕਰ ਚੱਕਬੀੜ ਸਰਕਾਰ ਦੇ ਕੇਂਦਰ ਵਿੱਚ ਮੌਜੂਦ ਮੁਰਮਰੇ ਦੇ ਪੈਕੇਟ ਖੋਲ ਕੇ ਖੁਦ ਖਾਏ। ਆਂਗਣਵਾੜੀ ਕੇਂਦਰਾਂ ਵਿੱਚ ਮੌਜੂਦ ਲਾਭਪਾਤਰੀਆਂ ਅਤੇ ਪਬਲਿਕ ਨੂੰ ਵੀ ਖਵਾ ਕੇ ਚੈੱਕ ਕੀਤੇ ਗਏ ਅਤੇ ਕੁਆਲਟੀ ਸਹੀ ਅਤੇ ਖਾਣਯੋਗ ਪਾਈ ਗਈ।
ਜ਼ਿਲ੍ਹਾ ਪ੍ਰੋਗਰਾਮ ਅਫਸਰ ਵੱਲੋਂ ਸ਼ਿੰਦਰਪਾਲ ਕੌਰ ਆਂਗਣਵਾੜੀ ਵਰਕਰ ਦੇ ਕੇਂਦਰ ਵਿੱਚੋਂ ਚਾਰ ਪੈਕੇਟ ਨਮੂਨੇ ਵਾਸਤੇ ਲਏ ਗਏ ਅਤੇ ਲੈਬ ਟੈਸਟਿੰਗ ਲਈ ਭੇਜੇ ਗਏ। ਇਸ ਤੋਂ ਇਲਾਵਾ ਪਿੰਡ ਉਦੈਕਰਨ ਦੇ ਆਂਗਣਵਾੜੀ ਕੇਂਦਰ ਚੈੱਕ ਕੀਤੇ ਗਏ। ਇਸ ਸਬੰਧੀ ਜ਼ਿਲ੍ਹਾ ਪ੍ਰੋਗਰਾਮ ਅਫਸਰ ਨੇ ਸੀਡੀਪੀਓ, ਸੁਪਰਵਾਈਜ਼ਰਾਂ ਅਤੇ ਆਂਗਣਵਾੜੀ ਵਰਕਰਾਂ ਨੂੰ ਸਖ਼ਤ ਹਦਾਇਤ ਕੀਤੀ ਗਈ ਕਿ ਆਂਗਣਵਾੜੀ ਕੇਂਦਰਾਂ ਵਿੱਚ ਸਪਲਾਈ ਕੀਤੇ ਜਾ ਰਹੇ ਰਾਸ਼ਨ ਨੂੰ ਪੂਰਨ ਤੌਰ ’ਤੇ ਚੈੱਕ ਕਰਨ ਉਪਰੰਤ ਹੀ ਲਾਭਪਾਤਰੀਆਂ ਨੂੰ ਵੰਡਿਆ ਜਾਵੇ। ਸਪਲਾਈ ਚੈਨ ਵਿੱਚ ਕਿਸੇ ਲੈਵਲ 'ਤੇ ਖਾਮੀ ਪਾਈ ਜਾਂਦੀ ਹੈ ਤਾਂ ਉਸ ਵਸਤੂ ਨੂੰ ਸਪਲਾਈ ਨਾ ਕੀਤਾ ਜਾਵੇ ਅਤੇ ਰੀਪਲੇਸਮੈਂਟ ਲਈ ਜ਼ਿਲ੍ਹਾ ਪ੍ਰੋਗਰਾਮ ਅਫ਼ਸਰ ਨੂੰ ਸੂਚਿਤ ਕੀਤਾ ਜਾਵੇ।