ਪ੍ਰਧਾਨ ਮੰਤਰੀ ਵੱਲੋਂ ਦੇਵੀ ਸਰਸਵਤੀ ਨੂੰ ਨਮਨ ਕਰਨਾ ਮਾਣ ਦੀ ਗੱਲ: ਕਿਰਮਿਚ

ਪੱਤਰ ਪ੍ਰੇਰਕ
ਯਮੁਨਾਨਗਰ, 15 ਅਪਰੈਲ
ਸਰਸਵਤੀ ਹੈਰੀਟੇਜ ਬੋਰਡ ਦੇ ਡਿਪਟੀ ਚੇਅਰਮੈਨ ਧੂਮਨ ਸਿੰਘ ਕਿਰਮਿਚ ਨੇ ਕਿਹਾ ਕਿ ਇਹ ਸਾਡੇ ਸਾਰਿਆਂ ਲਈ ਬਹੁਤ ਮਾਣ ਦੀ ਗੱਲ ਹੈ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਆਪਣੇ ਭਾਸ਼ਣ ਦੀ ਸ਼ੁਰੂਆਤ ਦੇਵੀ ਸਰਸਵਤੀ ਨੂੰ ਨਮਸਕਾਰ ਕਰਕੇ ਕੀਤੀ ਅਤੇ ਕਿਹਾ ਕਿ ਇਹ ਉਨ੍ਹਾਂ ਲਈ ਮਾਣ ਵਾਲੀ ਗੱਲ ਹੈ ਕਿ ਉਹ ਇਸ ਖੇਤਰ ਵਿੱਚ ਆਏ ਹਨ ਜਿਸ ਨੂੰ ਸਰਸਵਤੀ ਨਦੀ ਦਾ ਮੂਲ ਸਥਾਨ ਕਿਹਾ ਜਾਂਦਾ ਹੈ। ਡਿਪਟੀ ਚੇਅਰਮੈਨ ਧੂਮਨ ਸਿੰਘ ਕਿਰਮਿਚ ਨੇ ਕਿਹਾ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਆਦਿਬਦਰੀ, ਮੰਤਰਾ ਦੇਵੀ, ਕਪਾਲ ਮੋਚਨ, ਪੰਚਮੁਖੀ ਹਨੂੰਮਾਨ ਮੰਦਰ ਆਦਿ ਵਰਗੇ ਇਤਿਹਾਸਕ ਪੌਰਾਣਿਕ ਧਾਰਮਿਕ ਸਥਾਨਾਂ ਦਾ ਦੌਰਾ ਕੀਤਾ ਹੈ । ਇੱਕ ਤਰ੍ਹਾਂ ਨਾਲ, ਇਹ ਮੁੱਖ ਮੰਤਰੀ ਨਾਇਬ ਸੈਣੀ, ਸਾਬਕਾ ਮੁੱਖ ਮੰਤਰੀ ਅਤੇ ਵਰਤਮਾਨ ਵਿੱਚ ਕੇਂਦਰੀ ਮੰਤਰੀ ਮਨੋਹਰ ਲਾਲ ਖੱਟਰ ਅਤੇ ਸਰਸਵਤੀ ਬੋਰਡ ਦੇ ਯਤਨਾਂ ਦੀ ਜਿੱਤ ਹੈ। ਉਨ੍ਹਾਂ ਕਿਹਾ ਕਿ ਸਰਸਵਤੀ ਬੋਰਡ ਵੱਲੋਂ ਹੁਣ ਤੱਕ ਸਰਸਵਤੀ ਨਦੀ ’ਤੇ ਕੀਤਾ ਗਿਆ ਕੰਮ ਸ਼ਲਾਘਾਯੋਗ ਹੈ ਅਤੇ ਮੁੱਖ ਪ੍ਰਾਜੈਕਟ ਸਰਸਵਤੀ ’ਤੇ ਬਣਨ ਵਾਲਾ ਡੈਮ ਬੈਰਾਜ ਹੈ, ਜੋ ਕਿ 350 ਏਕੜ ਵਿੱਚ ਬਣ ਰਿਹਾ ਹੈ। ਉਨ੍ਹਾਂ ਦੱਸਿਆ ਕਿ ਸਰਸਵਤੀ ਨਦੀ ਦੇ ਪ੍ਰਾਜੈਕਟ ਦਾ ਕੰਮ ਤੇਜ਼ੀ ਨਾਲ ਚਲ ਰਿਹਾ ਹੈ। ਕੇਂਦਰ ਸਰਕਾਰ ਵੀ ਇਸ ਪ੍ਰਾਜੈਕਟ ਤੋਂ ਖੁਸ਼ ਹੈ ਅਤੇ ਉਨ੍ਹਾਂ ਨੇ ਇਸ ਪ੍ਰਾਜੈਕਟ ਦਾ ਨਾਮ ਸਰਸਵਤੀ ਦੇ ਮੂਲ ਸਥਾਨ ਦੇ ਨਾਮ ’ਤੇ ਰੱਖਿਆ ਹੈ। ਉਨ੍ਹਾਂ ਦੱਸਿਆ ਕਿ ਪੁਰਾਣੇ ਗ੍ਰੰਥਾਂ ਵਿੱਚ ਸਰਸਵਤੀ ਨਦੀ ਦੇ ਉਦਗਮ ਸਥਲ ਦਾ ਜ਼ਿਕਰ ਆਉਂਦਾ ਹੈ ਅਤੇ ਸੈਲਾਨੀ ਅਤੇ ਸ਼ਰਧਾਲੂ ਇਸ ਪਵਿੱਤਰ ਸਥਾਨ ’ਤੇ ਸਰਸਵਤੀ ਆਦਿਬਦਰੀ ਦੀ ਪੂਜਾ ਕਰਨ ਜਾਂਦੇ ਹਨ ਜੋ ਕਿ ਸਰਸਵਤੀ ਬੋਰਡ ਦੀ ਮੁਹਿੰਮ ਦਾ ਨਤੀਜਾ ਹੈ।