ਭੱਠੇ ਦੀ ਕੰਧ ਡਿੱਗਣ ਕਾਰਨ ਮਜ਼ਦੂਰ ਦੀ ਮੌਤ, ਦੋ ਜ਼ਖਮੀ

ਸੰਜੀਵ ਬੱਬੀ
ਚਮਕੌਰ ਸਾਹਿਬ, 28 ਅਪਰੈਲ

ਨਜ਼ਦੀਕੀ ਪਿੰਡ ਗਧਰਾਮ ਵਿਚ ਇਕ ਭੱਠੇ ਦੀ ਕੰਧ ਡਿੱਗਣ ਕਾਰਨ ਉੱਥੇ ਵਿੱਚ ਕੰਮ ਕਰਦੇ ਇਕ ਮਜ਼ਦੂਰ ਦੀ ਮੌਤ ਹੋ ਗਈ, ਜਦੋਂ ਕਿ ਦੋ ਹੋਰ ਮਜ਼ਦੂਰ ਜਖ਼ਮੀ ਹੋ ਗਏ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਪਿੰਡ ਬੜਾ ਗਧਰਾਮ ਵਿਖੇ ਸਥਿਤ ਖੁੱਲਰ ਬ੍ਰਿਕਸ ਕੰਪਨੀ ਦੇ ਭੱਠੇ ਦੀਆਂ ਕੰਧਾਂ ਪੁਰਾਣੀਆਂ ਅਤੇ ਤਰੇੜਾਂ ਵਾਲੀਆਂ ਹੋਣ ਕਾਰਨ ਇਹ ਘਟਨਾ ਵਾਪਰੀ ਜਦੋਂ ਸਵੇਰੇ ਤਰਲੋਚਨ ਸਿੰਘ ਪੁੱਤਰ ਸਰੂਪ ਸਿੰਘ ਪਿੰਡ ਸੋਤਲ ਬਾਬਾ ਆਪਣੀ ਘੋੜੀ ਰੇਹੜੀ ਨਾਲ ਇੱਟਾਂ ਢੋਹ ਰਿਹਾ ਸੀ ਕਿ ਅਚਾਨਕ ਭੱਠੇ ਦੀ ਦੀਵਾਰ ਡਿੱਗ ਪਈ। ਘਟਨਾ ਮੌਕੇ ਤਰਲੋਚਨ ਸਿੰਘ ਆਪਣੀ ਘੋੜੀ ਰੇਹੜੀ ਸਮੇਤ ਇਸ ਕੰਧ ਹੇਠਾਂ ਆ ਗਿਆ ਅਤੇ ਉਸ ਦੀ ਮੌਕੇ ਤੇ ਹੀ ਮੌਤ ਹੋ ਗਈ। ਮਲਬੇ ਹੇਠਾਂ ਦਬੇ ਤਰਲੋਚਨ ਨੂੰ ਸਾਥੀ ਮਜਦੂਰਾਂ ਵੱਲੋਂ ਕਾਫੀ ਮੁਸ਼ੱਕਤ ਬਾਅਦ ਬਾਹਰ ਕੱਢਿਆ ਗਿਆ। ਇਸ ਦੌਰਾਨ ਇੱਥੇ ਕੰਮ ਕਰਦੇ ਦੋ ਹੋਰ ਪ੍ਰਵਾਸੀ ਮਜ਼ਦੂਰ ਵੀ ਜਖਮੀ ਹੋ ਗਏ ਜਿੰਨ੍ਹਾਂ ਨੂੰ ਨਿੱਜੀ ਹਸਪਤਾਲ ਵਿਚ ਇਲਾਜ ਉਪਰੰਤ ਛੁੱਟੀ ਦੇ ਦਿੱਤੀ ਗਈ।