ਸਨਅਤ ਨਾਲ ਸਬੰਧਿਤ ਸਮੱਸਿਆਵਾਂ ਹੱਲ ਕਰਵਾਉਣ ਲਈ ਮੰਗ ਪੱਤਰ

ਪੱਤਰ ਪ੍ਰੇਰਕ
ਸ੍ਰੀ ਗੋਇੰਦਵਾਲ ਸਾਹਿਬ, 18 ਅਗਸਤ

ਗੋਇੰਦਵਾਲ ਇੰਡਸਟਰੀਅਲ ਐਸੋਈਸ਼ੇਸਨ ਦੇ ਪ੍ਰਧਾਨ ਰਮਨਦੀਪ ਸਿੰਘ ਭਰੋਵਾਲ ਨੇ ਪ੍ਰੈੱਸ ਨੂੰ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਗੋਇੰਦਵਾਲ ਸਨਅਤੀ ਇਲਾਕੇ ’ਚੋਂ ਬਿਜਲੀ ਬੋਰਡ ਨੂੰ ਜ਼ਿਲ੍ਹੇ ਦਾ ਸਭ ਤੋ ਵੱਧ ਰੈਵੇਨਿਊ ਜਾ ਰਿਹਾ ਹੈ ਪਰ ਸਟਾਫ ਦੀ ਘਾਟ ਅਤੇ ਰਿਪੇਅਰ ਨਾ ਹੋਣ ਕਾਰਨ ਸਨਅਤ ਨੂੰ ਭਾਰੀ ਨੁਕਸਾਨ ਪਹੁੰਚ ਰਿਹਾ ਹੈ। ਇਸ ਤੋਂ ਇਲਾਵਾ ਬਿਜਲੀ ਸਪਲਾਈ ਦੀਆਂ ਰੁਕਾਵਟਾਂ ਵੀ ਉਨ੍ਹਾਂ ਲਈ ਅਨੇਕਾਂ ਸੱਸਿਆਵਾਂ ਖੜ੍ਹੀਆਂ ਕਰ ਰਹੀਆਂ ਹਨ। ਇਸ ਸਬੰਧੀ ਮਿਹਰਬਾਨ ਸਿੰਘ, ਦਵਿੰਦਰ ਸਿੰਘ (ਸੋਇਆ ਫੂਡ ਇੰਡਸਟਰੀਜ਼) ਤੇ ਵੀਕੇ ਕੁੰਦਰਾ (ਰੀਗਲ ਲੋਬਟਰੀ ਫੈਕਟਰੀ) ਨੇ ਬਿਜਲੀ ਬੋਰਡ ਪਟਿਆਲਾ ਦੇ ਡਾਇਰੈਕਟਰ ਇੰਜਨੀਅਰ ਡੀਪੀਐੱਸ ਗਰੇਵਾਲ, ਚੀਫ ਬਾਰਡਰ ਰੇਂਜ ਓਮ ਪ੍ਰਕਾਸ਼ ਸੈਣੀ ਤੇ ਐੱਸਈ ਤਰਨਤਾਰਨ ਜਤਿੰਦਰ ਸਿੰਘ ਨੂੰ ਮੰਗ ਪੱਤਰ ਦੇ ਕੇ ਮੁਸ਼ਕਲਾਂ ਤੋਂ ਜਾਣੂ ਕਰਵਾਇਆ। ਇਸ ਮਗਰੋਂ ਸਮੂਹ ਅਧਿਕਾਰੀਆਂ ਨੇ ਸਮੱਸਿਆਵਾਂ ਦੇ ਜਲਦੀ ਹੱਲ ਦਾ ਭਰੋਸਾ ਦਿੱਤਾ। ਇਸ ਮੌਕੇ ਉਨ੍ਹਾਂ ਨਾਲ ਸੀਨੀਅਰ ਮੀਤ ਪ੍ਰਧਾਨ ਸੁਰਿੰਦਰ ਸਿੰਘ ਸੈਣੀ, ਜਨਰਲ ਸਕੱਤਰ ਹਰਪਿੰਦਰ ਸਿੰਘ ਗਿੱਲ, ਮੀਤ ਪ੍ਰਧਾਨ ਸਤਨਾਮ ਸਿੰਘ ਢਿੱਲੋਂ, ਇਕਬਾਲ ਸਿੰਘ ਸੈਣੀ, ਇੰਦਰਜੀਤ ਸਿੰਘ ਕਰਤਾਰ ਮਿੱਲ, ਦਲਜੀਤ ਸਿੰਘ ਝੰਡ ਤੇ ਹੋਰ ਹਾਜ਼ਰ ਸਨ।