ਖੰਡ ਮਿੱਲ ਭੋਗਪੁਰ ਨੂੰ 27.10 ਕਰੋੜ ਵਿੱਚ ਪਈ ਟਰਬਾਈਨ ਦੀ ਖ਼ਰਾਬੀ

ਬਲਵਿੰਦਰ ਸਿੰਘ ਭੰਗੂ

ਭੋਗਪੁਰ, 24 ਜੂਨ

ਸਹਿਕਾਰੀ ਖੰਡ ਮਿੱਲ ਭੋਗਪੁਰ ਵਿੱਚ ਟਰਬਾਈਨ ਖ਼ਰਾਬ ਹੋਣ ਕਾਰਨ ਮਿੱਲ ਨੂੰ ਪਏ ਵਿੱਤੀ ਬੋਝ ਨੂੰ ਹੱਲ ਕਰਨ ਲਈ ਸ਼ੂਗਰਫੈੱਡ ਪੰਜਾਬ ਦੇ ਪ੍ਰਬੰਧਕ ਨਿਰਦੇਸ਼ਕ ਅਰਵਿੰਦਰ ਪਾਲ ਸਿੰਘ ਸੰਧੂ ਦੀ ਪ੍ਰਧਾਨਗੀ ਹੇਠ ਵਿਸ਼ੇਸ਼ ਮੀਟਿੰਗ ਹੋਈ। ਇਸ ਵਿੱਚ ਖੰਡ ਮਿੱਲ ਦੇ ਬੋਰਡ ਆਫ ਡਾਇਰੈਕਟਰਜ਼, ਗਨੇਸ਼ ਇਡੇਬਲਜ ਲਿਮਟਡ ਖੰਨਾ, ਉੱਤਮ ਐਨਰਜੀ ਲਿਮਟਡ ਪੂਨਾ ਅਤੇ ਤ੍ਰਿਵੈਣੀ ਟਰਬਾਈਨ ਲਿਮਟਡ ਦੇ ਅਧਿਕਾਰੀਆਂ ਸ਼ਾਮਲ ਹੋਏ।

ਮੀਟਿੰਗ ਵਿੱਚ ਖੰਡ ਮਿੱਲ ਦੇ ਬੋਰਡ ਆਫ ਡਾਇਰੈਕਟਰਜ਼ ਨੇ ਕਿਹਾ ਗਨੇਸ਼ ਇਡੇਬਲਜ਼ ਨਾਲ ਇਹ ਸਮਝੌਤਾ ਹੋਇਆ ਸੀ ਕਿ ਇਹ ਕੰਪਨੀ ਖੰਡ ਮਿੱਲ ਦੀ ਟਰਬਾਈਨ 17 ਸਾਲ ਇਸ ਆਧਾਰ ‘ਤੇ ਚਲਾਵੇਗੀ ਕਿ ਗੰਨਾ ਸੀਜ਼ਨ ਦੌਰਾਨ ਖੰਡ ਮਿੱਲ ਕੰਪਨੀ ਨੂੰ ਟਰਬਾਈਨ ਚਲਾਉਣ ਲਈ ਬਿਗਾਸ (ਚੂਰਾ) ਦੇਵੇਗੀ ਅਤੇ ਕੰਪਨੀ ਪੈਦਾ ਕੀਤੀ ਬਿਜਲੀ ਮਿੱਲ ਨੂੰ ਦੇਵੇਗੀ। ਇਸ ਗੰਨਾ ਸੀਜ਼ਨ ਵਿੱਚ ਟਰਬਾਈਨ ਖ਼ਰਾਬ ਹੋ ਗਈ ਜਿਸ ਕਰ ਕੇ ਖੰਡ ਮਿੱਲ ਨੂੰ ਚਲਾਉਣ ਲਈ ਮੈਨੇਜਮੈਂਟ ਨੂੰ 9.38 ਕਰੋੜ ਪਾਵਰਕੌਮ ਨੂੰ ਦੇਣੇ ਪਏ। ਇਸ ਲਈ ਜਿਹੜਾ ਖੰਡ ਮਿੱਲ ਨੂੰ ਇਸ ਗੰਨਾ ਸੀਜ਼ਨ ਵਿੱਚ 27.10 ਕਰੋੜ ਦਾ ਵਿੱਤੀ ਜ਼ਿਆਦਾ ਘਾਟਾ ਪਿਆ ਉਸ ਦੀ ਗਣੇਸ਼ ਇਡੇਬਲਜ ਖੰਨਾ ਭਰਪਾਈ ਕਰੇ ਜਿਸ ਤੋਂ ਕੰਪਨੀ ਨੇ ਇਨਕਾਰ ਕਰ ਦਿੱਤਾ ਹੈ। ਕੰਪਨੀ ਦੇ ਅਧਿਕਾਰੀ ਨੇ ਕਿਹਾ ਕਿ ਟਰਬਾਈਨ ਜਾਣਬੁੱਝ ਕੇ ਖ਼ਰਾਬ ਨਹੀਂ ਕੀਤੀ ਸਗੋਂ ਕੁਦਰਤੀ ਘਟਨਾ ਕਰ ਕੇ ਖ਼ਰਾਬ ਹੋਈ। ਇਸ ਲਈ ਕੰਪਨੀ ਖੰਡ ਮਿੱਲ ਨੂੰ ਕੋਈ ਵੀ ਪੈਸਾ ਨਹੀਂ ਦੇਵੇਗੀ।

ਖੰਡ ਮਿੱਲ ਦੇ ਚੇਅਰਮੈਨ ਪਰਮਵੀਰ ਸਿੰਘ ਪੰਮਾ ਨੇ ਕਿਹਾ ਜੇ ਕੰਪਨੀ ਨੇ ਪਿਛਲੀ ਬਣਦੀ ਰਕਮ ਖੰਡ ਮਿੱਲ ਨੂੰ ਨਾ ਦਿੱਤੀ ਤਾਂ ਅੱਗੇ ਤੋਂ ਕੰਪਨੀ ਨੂੰ ਟਰਬਾਈਨ ਚਲਾਉਣ ਦੀ ਇਜਾਜ਼ਤ ਨਹੀਂ ਦਿੱਤੀ ਜਾਵੇਗੀ ਅਤੇ ਮਿੱਲ ਅਦਾਲਤ ਦਾ ਦਰਵਾਜ਼ਾ ਖੜਕਾਵੇਗਾ।

ਸ਼ੂਗਰਫੈੱਡ ਦੇ ਪ੍ਰਬੰਧਕ ਨਿਰਦੇਸ਼ਕ ਅਰਵਿੰਦਰ ਪਾਲ ਸਿੰਘ ਸੰਧੂ ਨੇ ਕਿਹਾ ਕਿ ਦੋਹਾਂ ਧਿਰਾਂ ਦੀਆਂ ਦਲੀਲਾਂ ਦੀ ਲਿਖਤੀ ਰਿਪੋਰਟ ਬਣਾ ਕੇ ਪੰਜਾਬ ਸਰਕਾਰ ਨੂੰ ਭੇਜ ਦਿੱਤੀ ਜਾਵੇਗੀ। ਕਿਸਾਨ ਜਥੇਬੰਦੀਆਂ ਨੇ ਵੀ ਇਸ ਮਾਮਲੇ ‘ਤੇ ਧਿਆਨ ਕੇਂਦਰਿਤ ਕਰ ਲਿਆ ਹੈ। ਸਿਆਸੀ ਪਾਰਟੀਆਂ ਦੇ ਆਗੂਆਂ ਨੇ ਕਿਹਾ ਕਿ ਜਾਂ ਤਾਂ ਸਰਕਾਰ ਇਹ ਭਰਪਾਈ ਕਰੇ ਜਾਂ ਸਬੰਧਿਤ ਕੰਪਨੀ ਤੋਂ ਕਰਵਾਏ।