ਮਾਲ ਰੋਡ ’ਤੇ ਨਮਾਜ਼ ਅਦਾ ਕੀਤੀ

ਗੁਰਨਾਮ ਸਿੰਘ ਅਕੀਦਾ
ਪਟਿਆਲਾ, 31 ਮਾਰਚ
ਇੱਥੇ ਮਾਲ ਰੋਡ ’ਤੇ ਸਥਿਤ ਵੱਡੀ ਤੇ ਅਹਿਮ ਜਾਮਾ ਮਸਜਿਦ ਵਿੱਚ ਹੁਣ ਪਟਿਆਲਾ ਦੇ ਮੁਸਲਮਾਨ ਭਾਈਚਾਰੇ ਲਈ ਥਾਂ ਘੱਟ ਹੋ ਗਈ ਹੈ। ਭਾਈਚਾਰੇ ਦਾ ਦੋਸ਼ ਹੈ ਕਿ ਉਨ੍ਹਾਂ ਦੀ ਥਾਂ ਸੈਂਟਰਲ ਸਟੇਟ ਲਾਇਬ੍ਰੇਰੀ ਨਾਲ ਬਣੇ ਆਡੀਟੋਰੀਅਮ ਨੇ ਦੱਬ ਰੱਖੀ ਹੈ, ਜਿਸ ਕਰਕੇ ਉਨ੍ਹਾਂ ਦੀ ਮਸਜਿਦ ਵਿੱਚ ਹੁਣ ਨਮਾਜ਼ ਪੜ੍ਹਨ ਲਈ ਥਾਂ ਨਹੀਂ ਹੈ। ਇਸ ਕਰਕੇ ਮੁਸਲਮਾਨ ਭਾਈਚਾਰਾ ਮਾਲ ਰੋਡ ’ਤੇ ਨਮਾਜ਼ ਅਦਾ ਕਰਨ ਲਈ ਮਜਬੂਰ ਹੈ। ਉਧਰ, ਮਸਜਿਦ ਦੇ ਨਾਲ ਹੀ ਕਾਲੀ ਮਾਤਾ ਮੰਦਰ ਵਿੱਚ ਚੱਲ ਰਹੇ ਨਰਾਤਿਆਂ ਕਾਰਨ ਮੱਥਾ ਟੇਕਣ ਲਈ ਵੱਡੀ ਗਿਣਤੀ ਵਿਚ ਸ਼ਰਧਾਲੂ ਆਉਂਦੇ ਰਹੇ, ਜਿਸ ਕਰਕੇ ਸਾਰਾ ਦਿਨ ਪੁਲੀਸ ਨੂੰ ਹੱਥਾਂ ਪੈਰਾਂ ਦੀ ਪਈ ਰਹੀ। ਮੁਸਲਿਮ ਆਗੂ ਅਲੀ ਨੇ ਕਿਹਾ ਕਿ ਮਹਾਰਾਜਾ ਪਟਿਆਲਾ ਨੇ ਮਸਜਿਦ ਲਈ ਵਾਧੂ ਥਾਂ ਦਿੱਤੀ ਸੀ, ਪਰ ਕੁਝ ਸਾਜ਼ਿਸ਼ਾਂ ਤਹਿਤ ਸਾਡੀ ਕਾਫ਼ੀ ਥਾਂ ਆਡੀਟੋਰੀਅਮ ਨੂੰ ਦੇ ਦਿੱਤੀ, ਭਾਵੇਂ ਅੱਜ ਵੀ ਉਹ ਥਾਂ ਮਸਜਿਦ ਦੇ ਨਾਮ ਬੋਲਦੀ ਹੈ। ਇਸ ਕਰਕੇ ਭਾਈਚਾਰੇ ਨੂੰ ਨਮਾਜ਼ ਵੀ ਮਾਲ ਰੋਡ ’ਤੇ ਬੈਠ ਕੇ ਪੜ੍ਹਨੀ ਪੈਂਦੀ ਹੈ।