ਪਰਵਾਸੀ ਭਾਰਤੀਆਂ ਦੀ ਖੁਆਰੀ ਲਈ ਕੇਂਦਰ ਜ਼ਿੰਮੇਵਾਰ: ਸੰਧੂ

ਬਠਿੰਡਾ, 17 ਮਾਰਚ

ਪੰਜਾਬ ਪ੍ਰਦੇਸ਼ ਕਾਂਗਰਸ ਕਮੇਟੀ ਦੇ ਸਕੱਤਰ ਅਤੇ ਮਾਰਕਫ਼ੈੱਡ ਪੰਜਾਬ ਦੇ ਡਾਇਰੈਕਟਰ ਟਹਿਲ ਸਿੰਘ ਸੰਧੂ ਨੇ ਪਰਵਾਸੀ ਭਾਰਤੀਆਂ ਦੀ ਵਿਦੇਸ਼ਾਂ ’ਚ ਹੋ ਰਹੀ ਦੁਰਗਤੀ ਲਈ ਕੇਂਦਰ ਦੀ ਭਾਜਪਾ ਸਰਕਾਰ ਨੂੰ ਘੇਰਿਆ ਹੈ।

ਸ੍ਰੀ ਸੰਧੂ ਨੇ ਕਿਹਾ ਕਿ ਜਦੋਂ ਤੋਂ ਭਾਜਪਾ ਨੇ ਕੇਂਦਰ ’ਚ ਸੱਤਾ ਸੰਭਾਲੀ ਹੈ, ਉਦੋਂ ਤੋਂ ਹੀ ਭਾਰਤ ਦੇ ਵਿਦੇਸ਼ਾਂ ਨਾਲ ਸਬੰਧ ਤਿੜਕਣੇ ਸ਼ੁਰੂ ਹੋ ਗਏ ਸਨ। ਉਨ੍ਹਾਂ ਕਿਹਾ ਕਿ ਅਮਰੀਕਾ ਵੱਲੋਂ ਧੜਾਧੜ ਭਾਰਤੀਆਂ ਨੂੰ ਜਹਾਜ਼ ਭਰ ਕੇ ਭਾਰਤ ਭੇਜਣ ਦੀ ਕਵਾਇਦ ਦਾ ਹਰੇਕ ਮਾਨਵਤਾ ਪੱਖੀ ਵਿਅਕਤੀ ਨੇ ਬੁਰਾ ਮਨਾਉਂਦਿਆਂ ਆਲੋਚਨਾ ਕੀਤੀ ਪਰ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਪੀੜਤ ਭਾਰਤੀਆਂ ਦੇ ਹੱਕ ’ਚ ਹੁਣ ਤੱਕ ਇੱਕ ਸ਼ਬਦ ਵੀ ਨਹੀਂ ਬੋਲੇ।

ਉਨ੍ਹਾਂ ਕਿਹਾ ਕਿ ਕੈਨੇਡਾ ਸਰਕਾਰ ਨਾਲ ਭਾਰਤੀ ਹਕੂਮਤ ਨੇ ਸਬੰਧ ਖਰਾਬ ਕਰ ਕੇ ਇਸ ਦੀ ਸਜ਼ਾ ਉੱਥੇ ਵਸਦੇ ਐੱਨਆਰਆਈਜ਼ ਨੂੰ ਦਿੱਤੀ ਹੈ ਜਿਸ ਦਾ ਨਤੀਜਾ ਇਹ ਹੈ ਕਿ ਕੈਨੇਡਾ ’ਚ ਕਾਨੂੰਨੀ ਸਖ਼ਤੀ ਇੰਨੀ ਕਰ ਦਿੱਤੀ ਗਈ ਕਿ ਨਾ ਤਾਂ ਕਿਸੇ ਭਾਰਤੀ ਨੂੰ ਵਰਕ ਪਰਮਿਟ ਦਿੱਤਾ ਜਾ ਰਿਹਾ ਹੈ ਅਤੇ ਨਾ ਹੀ ਪੀਆਰ ਦਾ ਪ੍ਰਬੰਧ ਕੀਤਾ ਜਾ ਰਿਹਾ ਹੈ। ਸ੍ਰੀ ਸੰਧੂ ਨੇ ਪੰਜਾਬ ’ਚ ਅਮਨ-ਕਾਨੂੰਨ ਵਿਵਸਥਾ ਦਾ ਜਨਾਜ਼ਾ ਨਿਕਲਣ ਦਾ ਦੋਸ਼ ਲਾਉਂਦਿਆਂ ਇਸ ਲਈ ਪੰਜਾਬ ਸਰਕਾਰ ਨੂੰ ਜ਼ਿੰਮੇਵਾਰ ਕਰਾਰ ਦਿੱਤਾ।