ਨਾਬਾਲਗ ਨੂੰ ਬਲੈਕਮੇਲ ਕਰਨ ਵਾਲੇ ਯੂ-ਟਿਊਬਰ ਨੂੰ 20 ਸਾਲ ਕੈਦ ਤੇ ਜੁਰਮਾਨਾ

ਗੁਰਦੀਪ ਸਿੰਘ ਭੱਟੀ
ਟੋਹਾਣਾ, 18 ਮਾਰਚ
ਇੱਥੋਂ ਦੀ ਇਕ ਨਾਬਾਲਗ ਲੜਕੀ ਨੂੰ ਹੀਰੋਇਨ ਬਣਾਉਣ ਦਾ ਝਾਂਸਾ ਦੇਣ ਵਾਲੇ ਯੂ-ਟਿਊਬਰ ਦਰਸ਼ਨ ਉਰਫ਼ ਬੌਨਾ ਕਾਮੇਡੀਅਨ ਨੂੰ ਵਧੀਕ ਸੈਸ਼ਨ ਜੱਜ ਸੁਨੀਲ ਜਿੰਦਲ ਦੀ ਅਦਾਲਤ ਨੇ ਜਬਰ ਜਨਾਹ ਤੇ ਹੋਰ ਮਾਮਲਿਆਂ ਵਿਚ ਦੋਸ਼ੀ ਕਰਾਰ ਦਿੰਦਿਆਂ 20 ਸਾਲ ਕੈਦ ਤੇ 1.07 ਲੱਖ ਰੁਪਏ ਜੁਰਮਾਨਾ ਤੇ ਪੀੜਤ ਲੜਕੀ ਨੂੰ ਦੋ ਲੱਖ ਰੁਪਏ ਮੁਆਵਜ਼ਾ ਦੇਣ ਲਈ ਕਿਹਾ। ਪੁਲੀਸ ਚਲਾਨ ਮੁਤਾਬਿਕ ਹਿਸਾਰ ਨਿਵਾਸੀ ਦਰਸ਼ਨ ਉਰਫ਼ ਬੌਨਾ ਕਾਮੇਡੀ ਦੀਆਂ ਵੀਡੀਓ ਅਪਲੋਡ ਕਰਦਾ ਹੁੰਦਾ ਸੀ ਤਾਂ ਉਸ ਦੇ ਸੰਪਰਕ ਵਿੱਚ ਆਈ ਲੜਕੀ ਨੂੰ ਫ਼ਿਲਮਾਂ ਵਿੱਚ ਹੀਰੋਇਨ ਬਣਾਉਣ ਦਾ ਕਹਿ ਕੇ ਸਤੰਬਰ 2020 ਨੂੰ ਚੰਡੀਗੜ੍ਹ ਲੈ ਗਿਆ। ਉਥੇ ਦਰਸ਼ਨ ਨੇ ਲੜਕੀ ਨੂੰ ਅਲੱਗ-ਅਲੱਗ ਹੋਟਲਾਂ ਵਿੱਚ ਰੱਖ ਕੇ ਜਬਰ ਜਨਾਹ ਕੀਤਾ। ਇਸ ਤੋਂ ਬਾਅਦ ਇਸ ਲੜਕੀ ਨੇ ਔਰਤਾਂ ਦੀ ਜਥੇਬੰਦੀ ਕੋਲ ਸ਼ਿਕਾਇਤ ਕੀਤੀ ਤੇ ਮਾਮਲਾ ਦਰਜ ਹੋਇਆ ਤੇ ਹਿਸਾਰ ਪੁਲੀਸ ਨੇ ਅਦਾਲਤ ਵਿੱਚ ਚਾਲਾਨ ਪੇਸ਼ ਕੀਤਾ ਤਾਂ ਅਦਾਲਤ ਨੇ ਯੂ-ਟਿਊਬਰ ਦਰਸ਼ਨ ਉਰਫ਼ ਬੌਨਾ ਨੂੰ ਸਖ਼ਤ ਸਜ਼ਾ ਸੁਣਾਈ।