ਪਾਕਿਸਤਾਨ ਵੱਲੋਂ ਜੰਮੂ ਹਵਾਈ ਅੱਡੇ ’ਤੇ ਹਮਲੇ ਦੀ ਕੋਸ਼ਿਸ਼, ਪੂਰੇ ਸ਼ਹਿਰ ਵਿਚ ਬਲੈਕਆਊਟ

ਅਦਿੱਤੀ ਟੰਡਨ
ਨਵੀਂ ਦਿੱਲੀ, 8 ਮਈ
ਪਾਕਿਸਤਾਨ ਨੇ ਜੰਮੂ ਹਵਾਈ ਅੱਡੇ ’ਤੇ ਹਮਲੇ ਦੀ ਕੋਸ਼ਿਸ਼ ਕੀਤੀ ਹੈ, ਜਿਸ ਨੂੰ ਭਾਰਤੀ ਫੌਜ ਨੇ ਨਾਕਾਮ ਕਰ ਦਿੱਤਾ ਹੈ। ਜੰਮੂ ਵਿਚ ਸੰਵਾਵੀ ਡਰੋਨ ਤੇ ਮਿਜ਼ਾਈਲ ਹਮਲਿਆਂ ਮਗਰੋਂ ਘੱਟੋ ਘੱਟ 8 ਧਮਾਕਿਆਂ ਦੀ ਆਵਾਜ਼ ਸੁਣੀ ਗਈ ਹੈ।

ਜਾਣਕਾਰੀ ਅਨੁਸਾਰ ਜੰਮੂ ਸ਼ਹਿਰ ਵਿਚ ਵੀਰਵਾਰ ਸ਼ਾਮੀਂ 15 ਮਿੰਟਾਂ ਦੇ ਵਕਫ਼ੇ ਵਿਚ ਤਿੰਨ ਵੱਡੇ ਧਮਾਕਿਆਂ ਦੀ ਆਵਾਜ਼ ਸੁਣੇ ਜਾਣ ਮਗਰੋਂ ਸਿਵਲ ਡਿਫੈਂਸ ਡਰਿੱਲ ਨੂੰ ਸਰਗਰਮ ਕਰ ਦਿੱਤਾ ਗਿਆ ਹੈ। ਜਵਾਬੀ ਉਪਾਅ ਵਜੋਂ ਪੂਰੇ ਸ਼ਹਿਰ ਵਿਚ ਬਲੈਕਆਊਟ ਹੋ ਗਿਆ ਹੈ। ਗ੍ਰੇਟਰ ਕੈਲਾਸ਼, ਆਰਐਸ ਪੋਰਾ, ਛਨੀ ਹਿੰਮਤ ਦੇ ਵਸਨੀਕਾਂ ਨੇ ਸ਼ਹਿਰੀ ਖੇਤਰਾਂ ਅਤੇ ਇਸ ਦੇ ਆਲੇ-ਦੁਆਲੇ ਵੱਡੇ ਧਮਾਕੇ ਸੁਣਨ ਦੀ ਪੁਸ਼ਟੀ ਕੀਤੀ ਹੈ, ਜਿਸ ਤੋਂ ਬਾਅਦ ਹਵਾ ਵਿੱਚ ਕਈ ਲਾਲ ਗੋਲੇ ਦੇਖੇ ਗਏ ਹਨ। ਇਸ ਦੌਰਾਨ ਭਾਰਤੀ ਫੌਜ ਨੇ ਸੁੰਜਵਾਂ ਫੌਜੀ ਅੱਡੇ ਨੇੜੇ ਵੀ ਪਾਕਿਸਤਾਨੀ ਡਰੋਨ ਅਤੇ ਮਿਜ਼ਾਈਲ ਹਮਲਿਆਂ ਨੂੰ ਨਾਕਾਮ ਕੀਤਾ ਹੈ।

ਜੰਮੂ ਦੇ ਗ੍ਰੇਟਰ ਕੈਲਾਸ਼ ਦੇ ਵਸਨੀਕ ਅਖਿਲ ਰਾਜ਼ਦਾਨ ਨੇ ਕਿਹਾ ਕਿ ਇਹ ਇੱਕ ਡਰੋਨ ਜਾਂ ਮਿਜ਼ਾਈਲ ਹਮਲੇ ਵਰਗਾ ਲੱਗ ਰਿਹਾ ਸੀ। ਰਾਜ਼ਦਾਨ ਨੇ ਕਿਹਾ, ‘‘ਉਹ ਗ੍ਰੇਟਰ ਕੈਲਾਸ਼ ਵਿੱਚ ਜਿੱਥੇ ਰਹਿੰਦਾ ਸੀ, ਉਸ ਦੇ ਬਹੁਤ ਨੇੜੇ ਸੀ ਪਰ ਹਮਲੇ ਨੂੰ ਬਹੁਤ ਜਲਦੀ ਰੋਕ ਲਿਆ ਗਿਆ।’’ ਰਾਜ਼ਦਾਨ ਨੇ ਕਿਹਾ ਕਿ ਉਹ ਹਵਾਈ ਅੱਡੇ ਦੇ ਬਹੁਤ ਨੇੜੇ ਕਰੀਬ ਸੱਤ ਕਿਲੋਮੀਟਰ ਦੀ ਦੂਰੀ ’ਤੇ ਰਹਿੰਦਾ ਹੈ।

ਰਾਜ਼ਦਾਨ ਨੇ ਕਿਹਾ, ‘‘ਮੈਂ ਇੱਕ ਜ਼ੋਰਦਾਰ ਧਮਾਕਾ ਸੁਣਿਆ ਅਤੇ ਪਹਿਲਾਂ ਸੋਚਿਆ ਕਿ ਇਹ ਪਟਾਕੇ ਹਨ। ਇਸ ਲਈ ਮੈਂ ਚੀਜ਼ਾਂ ਨੂੰ ਦੇਖਣ ਲਈ ਛੱਤ ’ਤੇ ਗਿਆ ਅਤੇ ਧਮਾਕੇ ਦੀ ਦਿਸ਼ਾ ਵਿੱਚ ਘੱਟੋ-ਘੱਟ ਅੱਠ ਲਾਲ ਗੋਲੇ ਦੇਖੇ। ਇਹ ਸਰਹੱਦ ਪਾਰ ਤੋਂ ਡਰੋਨ ਹਮਲੇ ਵਾਂਗ ਲੱਗ ਰਿਹਾ ਸੀ ਜਿਸ ਨੂੰ ਸਾਡੇ ਹਵਾਈ ਰੱਖਿਆ ਪ੍ਰਣਾਲੀਆਂ ਨੇ ਰੋਕਿਆ। ਜਿਵੇਂ ਹੀ ਲਾਲ ਗੇਂਦਾਂ ਦਿਖਾਈ ਦਿੱਤੀਆਂ, ਹਵਾਈ ਸਾਇਰਨ ਵੱਜ ਗਏ ਅਤੇ ਪੂਰੀ ਤਰ੍ਹਾਂ ਬਲੈਕਆਊਟ ਹੋ ਗਿਆ।’’
ਆਰਐਸ ਪੋਰਾ ਦੇ ਨਿਵਾਸੀ ਵਿਜੈ ਕੁਮਾਰ ਨੇ ਤਿੰਨ ਵਾਰ ਘਟਨਾਵਾਂ ਦੇ ਇਸੇ ਕ੍ਰਮ ਦੀ ਰਿਪੋਰਟ ਕੀਤੀ ਅਤੇ ਕਿਹਾ ਕਿ ਇਹ ਅਜੇ ਵੀ ਜਾਰੀ ਹੈ। ਪਾਕਿਸਤਾਨ ਨੇ ਬੁੱਧਵਾਰ ਤੇ ਵੀਰਵਾਰ ਦੀ ਦਰਮਿਆਨੀ ਰਾਤ ਨੂੰ ਭਾਰਤ ਵਿੱਚ 15 ਥਾਵਾਂ 'ਤੇ ਫੌਜੀ ਟਿਕਾਣਿਆਂ ’ਤੇ ਹਮਲਾ ਕਰਨ ਦੀ ਕੋਸ਼ਿਸ਼ ਕੀਤੀ ਸੀ ਅਤੇ ਭਾਰਤੀ ਫੌਜ ਦੇ ਹਵਾਈ ਰੱਖਿਆ ਪ੍ਰਣਾਲੀਆਂ ਨੇ ਇਸ ਨੂੰ ਨਾਕਾਮ ਕਰ ਦਿੱਤਾ ਸੀ। ਅੱਜ ਵੀ ਪਾਕਿਸਤਾਨ ਦੀਆਂ ਵਧਦੀਆਂ ਕੋਸ਼ਿਸ਼ਾਂ ਨੂੰ ਨਾਕਾਮ ਕਰਨ ਲਈ ਜੰਮੂ ਵਿੱਚ ਫੌਜ ਦੇ ਹਵਾਈ ਰੱਖਿਆ ਪ੍ਰਣਾਲੀਆਂ ਤਾਇਨਾਤ ਸਨ।

ਜੰਮੂ ਤੋਂ ਅਰਜੁਨ ਸ਼ਰਮਾ ਦੀ ਰਿਪੋਰਟ ਮੁਤਾਬਕ ਸ਼ਹਿਰ ਦੇ ਵਸਨੀਕ ਉਦੋਂ ਹੈਰਾਨ ਰਹਿ ਗਏ ਜਦੋਂ ਜੰਮੂ ਹਵਾਈ ਅੱਡੇ ਅਤੇ ਸੁੰਜਵਾਂ ਕੈਂਪ ਦੇ ਨੇੜੇ ਅਸਮਾਨ ਵਿੱਚ ਕਈ ਧਮਾਕੇ ਸ਼ੁਰੂ ਹੋਏ। ਰਾਤ ਕਰੀਬ 8.15 ਵਜੇ ਪਾਕਿਸਤਾਨੀ ਡਰੋਨਾਂ ਜਾਂ ਮਿਜ਼ਾਈਲਾਂ ਦੀ ਪਹਿਲੀ ਲਹਿਰ ਜੰਮੂ ਸ਼ਹਿਰ ਵਿੱਚ ਦਾਖਲ ਹੋਣ ਲੱਗੀ। ਲਾਲ ਰੰਗ ਦੇ ਇੰਟਰਸੈਪਟਰ ਸਾਰੇ ਅਸਮਾਨ ਵਿੱਚ ਨਿਸ਼ਾਨਿਆਂ ਨੂੰ ਮਾਰਦੇ ਹੋਏ ਦੇਖੇ ਗਏ। ਪੂਰੇ ਖੇਤਰ ਵਿੱਚ ਬਿਜਲੀ ਬੰਦ ਕਰ ਦਿੱਤੀ ਗਈ ਅਤੇ ਸਾਇਰਨ ਚਾਲੂ ਕਰ ਦਿੱਤੇ ਗਏ। ਇੰਟਰਸੈਪਟਰਾਂ ਦੇ ਨਿਸ਼ਾਨਿਆਂ ਨੂੰ ਟੱਕਰ ਮਾਰਨ ’ਤੇ ਬਹੁਤ ਸਾਰੇ ਲੋਕਾਂ ਦੀਆਂ ਚੀਕਾਂ ਸੁਣੀਆਂ ਗਈਆਂ। ਹਮਲੇ ਘੱਟੋ-ਘੱਟ ਪੰਜ ਵਾਰ ਹੋਏ ਜਿੱਥੇ ਰਾਤ 9.30 ਵਜੇ ਤੱਕ ਜੰਮੂ ਦੇ ਅਸਮਾਨ ਵਿੱਚ ਕਈ ਡਰੋਨ ਦਾਖਲ ਹੋਏ। ਡਰੋਨ ਹਮਲਿਆਂ ਦੀ ਪੰਜਵੀਂ ਲਹਿਰ ਰਾਤ 9.22 ਵਜੇ ਸ਼ੁਰੂ ਹੋਈ।