ਸੀਐੱਸਸੀ ਸੈਂਟਰ ਦੇ ਸੰਚਾਲਕ ਦੇ ਕਤਲ ਮਾਮਲੇ ਵਿੱਚ 7 ਗ੍ਰਿਫ਼ਤਾਰ

ਗੁਰਦੀਪ ਸਿੰਘ ਭੱਟੀ
ਟੋਹਾਣਾ, 6 ਅਪਰੈਲ
ਪਿੰਡ ਠੂਈਆਂ ਦੇ ਸੀਐੱਸਸੀ ਸੈਂਟਰ ਸੰਚਾਲਕ ਦੀ ਲੁੱਟ ਦੌਰਾਨ ਚੱਲੀ ਗੋਲੀ ਵਿੱਚ ਮਾਰੇ ਗਏ ਸੰਚਾਲਕ ਪ੍ਰਦੀਪ ਕੁਮਾਰ (35) ਦੇ ਕਾਤਲਾਂ ਦਾ ਮਾਮਲਾ ਸੁਲਝਾਉਂਦੇ ਹੋਏ ਪੁਲੀਸ ਨੇ 7 ਕਾਤਲਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਪੁਲੀਸ ਨੇ ਮ੍ਰਿਤਕ ਦੇ ਚਾਚਾ ਰਾਮ ਸਿੰਘ ਦੀ ਸ਼ਿਕਾਇਤ ’ਤੇ ਕੇਸ ਦਰਜ ਕਰਕੇ ਸੀਸੀਟੀਵੀ ਕੈਮਰਿਆਂ ਦੀ ਮਦਦ ਨਾਲ ਮੁਲਜ਼ਮਾਂ ਦੀ ਪਛਾਣ ਕਰਕੇ ਉਨ੍ਹਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਐੱਸਪੀ ਫਤਿਹਾਬਾਦ ਆਸਥਾ ਮੋਦੀ ਨੇ ਅੱਜ ਇਥੇ ਇਹ ਜਾਣਕਾਰੀ ਸਾਂਝੀ ਕੀਤੀ ਕਿ ਪ੍ਰਦੀਪ ਕੁਮਾਰ ਦਾ ਰੋਜ਼ਾਨਾ ਚਾਰ ਤੋ ਪੰਜ ਲੱਖ ਰੁਪਏ ਦਾ ਲੈਣ-ਦੇਣ ਸੀ। ਲੁਟੇਰੇ ਪੈਸੇ ਵਸੂਲਣ ਦੇ ਬਹਾਨੇ ਆਏ ਸਨ। ਵਾਰਦਾਤ ਸਮੇਂ ਮ੍ਰਿਤਕ ਦੀ ਸਹਾਇਕ ਇਕ ਲੜਕੀ ਦਫਤਰ ਵਿੱਚ ਸੀ। ਪੁਲੀਸ ਨੇ ਉਥੋਂ ਦੋ ਖੋਲ ਤੇ ਇਕ ਮਿਸ ਕਾਰਤੂਸ ਬਰਾਮਦ ਕੀਤਾ ਹੈ। ਪੁਲੀਸ ਨੇ ਸ਼ਕਤੀ (ਕੈਥਲ), ਅਭਿਸ਼ੇਕ ਉਰਫ ਅੱਭੀ ਪਿੰਡ ਮਾਜਰਾ-ਰੋਹੇੜਾ (ਕੈਥਲ), ਅਕਿੰਤ ਪਿੰਡ ਖੇੜੀ-ਸੇਖਾਂ (ਕੈਥਲ), ਸੁਸ਼ੀਲ ਵਾਸੀ ਭੱਠੁਕਲਾਂ, ਵਿਕਰਮ ਵਾਸੀ ਬਾਸੜਾ (ਹਿਸਾਰ), ਰੋਹਤਾਸ਼ ਉਰਫ਼ ਤਾਸ਼ੀ ਵਾਸੀ ਪੀਲੀ ਮੰਦੋਰੀ, ਇਕ ਨਾਬਾਲਿਗ ਨੂੰ ਪ੍ਰਦੀਪ ਦੇ ਕਾਤਲ ਲਈ ਨਾਮਜਦ ਕੀਤਾ ਗਿਆ ਹੈ। ਐੱਸਪੀ ਮੁਤਾਬਕ ਮੁਲਜ਼ਮ ਰੋਹਤਾਸ਼ ਤਾਸ਼ੀ, ਸੁਸ਼ੀਲ, ਵਿਕਰਮ ਤੇ ਸ਼ਕਤੀ ਦੇ ਵਿਰੁੱਧ 23 ਵੱਖ-ਵੱਖ ਅਪਰਾਧਿਕ ਮਾਮਲੇ ਦਰਜ ਹਨ। ਪੁਲੀਸ ਜਾਂਚ ਟੀਮ ਨੇ ਸੈਂਟਰ ਵਿੱਚੋਂ ਲੁੱਟਿਆ ਲੈਪਟਾਪ ਪਿੰਡ ਠੁਈਆਂ ਤੋਂ 4 ਕਿਲੋਮੀਟਰ ਦੂਰ ਪੀਲੀ ਮੰਦੋਰੀ ਦੀ ਹੱਦ ਤੋਂ ਬਰਾਮਦ ਕੀਤਾ ਹੈ। ਵਾਰਦਾਤ ਸਮੇਂ ਮੌਜੂਦ ਲੜਕੀ ਨੇ ਦੱਸਿਆ ਕਿ ਤਿੰਨ ਲੁਟੇਰੇ ਸੈਂਟਰ ਵਿੱਚ ਆਏ ਤੇ ਸ਼ਕਤੀ ਨੇ ਤਿੰਨ ਗੋਲੀਆਂ ਚਲਾਈਆਂ ਸਨ।