ਸਰਾਫ਼ ਦਾ ਕਰਿੰਦਾ ਅੱਧਾ ਕਿੱਲੋ ਸੋਨੇ ਸਣੇ ਫ਼ਰਾਰ

ਲੁਧਿਆਣਾ, 10 ਅਪਰੈਲ

ਇੱਥੇ ਰਾਣੀ ਝਾਂਸੀ ਰੋਡ ਸਥਿਤ ਸ਼ਰਾਫ਼ ਦੀ ਦੁਕਾਨ ਦਾ ਮੁਲਾਜ਼ਮ ਅੱਧਾ ਕਿੱਲੋ ਸੋਨਾ ਚੋਰੀ ਕਰਕੇ ਲੈ ਗਿਆ ਹੈ। ਇਸ ਸਬੰਧੀ ਥਾਣਾ ਡਿਵੀਜ਼ਨ ਨੰਬਰ 4 ਦੀ ਪੁਲੀਸ ਨੂੰ ਗਗਨਦੀਪ ਕਲੋਨੀ ਵਾਸੀ ਨਾਸਿਮ ਉਦੀਨ ਨੇ ਸ਼ਿਕਾਇਤ ਕੀਤੀ ਹੈ। ਸ਼ਿਕਾਇਤ ਵਿੱਚ ਉਸ ਨੇ ਦੱਸਿਆ ਕਿ ਉਸ ਦੀ ਸਾਈਂ ਜਿਊਲਰਜ਼ ਦੀ ਦੁਕਾਨ ਰਾਣੀ ਝਾਂਸੀ ਰੋਡ ’ਤੇ ਹੈ। ਉਸ ਦਾ ਮੁਲਾਜ਼ਮ ਰਾਜੇਸ਼ ਜੋ ਦੁਕਾਨ ’ਤੇ ਸੋਨੇ ਦੇ ਗਹਿਣੇ ਤਿਆਰ ਕਰਦਾ ਸੀ। ਉਹ ਦੁਕਾਨ ਤੋਂ ਸੋਨੇ ਦੇ ਗਹਿਣੇ ਵਜ਼ਨੀ 500 ਗ੍ਰਾਮ 22 ਕੈਰਟ ਸੋਨਾ ਜੋ ਅਜੇ ਪੂਰੀ ਤਰ੍ਹਾਂ ਤਿਆਰ ਨਹੀਂ ਸਨ ਚੋਰੀ ਕਰਕੇ ਲੈ ਗਿਆ ਹੈ। ਉਸ ਦੀ ਕਾਫ਼ੀ ਭਾਲ ਕੀਤੀ ਪਰ ਉਹ ਨਹੀਂ ਮਿਲਿਆ। ਦੁਕਾਨ ਮਾਲਕ ਨੇ ਦੱਸਿਆ ਹੈ ਕਿ ਉਸ ਨੇ ਰਾਜੇਸ਼ ਨੂੰ ਕੁਝ ਸਮਾਂ ਪਹਿਲਾਂ ਹੀ ਕੰਮ ਲਈ ਰੱਖਿਆ ਸੀ। ਪੁਲੀਸ ਨੇ ਇਸ ਸਬੰਧੀ ਕੇਸ ਦਰਜ ਕਰਕੇ ਮੁਲਜ਼ਮ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ।