ਯੂਟਿਊਬ ਚੈਨਲ ‘4ਪੀਐੱਮ’ ਬਲੌਕ ਕਰਨ ਦੇ ਹੁਕਮ ਵਾਪਸ

ਨਵੀਂ ਦਿੱਲੀ: ਸੁਪਰੀਮ ਕੋਰਟ ਨੂੰ ਅੱਜ ਸੂਚਿਤ ਕੀਤਾ ਗਿਆ ਕਿ ਯੂਟਿਊਬ ’ਤੇ 73 ਲੱਖ ਸਬਸਕ੍ਰਾਈਬਰ ਵਾਲੇ ਚੈਨਲ ‘4ਪੀਐੱਮ’ ਨੂੰ ‘ਬਲੌਕ’ ਕਰਨ ਦਾ ਹੁਕਮ ਵਾਪਸ ਲੈ ਲਿਆ ਗਿਆ ਹੈ। ਪਟੀਸ਼ਨਰ ਵੱਲੋਂ ਪੇਸ਼ ਹੋਏ ਸੀਨੀਅਰ ਵਕੀਲ ਕਪਿਲ ਸਿੱਬਲ ਨੇ ਜਸਟਿਸ ਬੀਆਰ ਗਵਈ ਤੇ ਜਸਟਿਸ ਆਗਸਟੀਨ ਜੌਰਜ ਮਸੀਹ ਦੇ ਬੈਂਚ ਨੂੰ ਦੱਸਿਆ, ‘ਉਨ੍ਹਾਂ (ਚੈਨਲ ਨੂੰ) ਬਲੌਕ ਕਰਨ ਦਾ ਹੁਕਮ ਵਾਪਸ ਲੈ ਲਿਆ ਹੈ।’ ਸੁਪਰੀਮ ਕੋਰਟ ਡਿਜੀਟਲ ਨਿਊਜ਼ ਪਲੈਟਫਾਰਮ ‘4ਪੀਐੱਮ’ ਦੇ ਸੰਪਾਦਕ ਸੰਜੈ ਸ਼ਰਮਾ ਵੱਲੋਂ ਦਾਇਰ ਪਟੀਸ਼ਨ ’ਤੇ ਸੁਣਵਾਈ ਕਰ ਰਿਹਾ ਸੀ, ਜਿਸ ’ਚ ਚੈਨਲ ‘ਬਲੌਕ’ ਕਰਨ ਦੇ ਹੁਕਮ ਰੱਦ ਕਰਨ ਦੀ ਮੰਗ ਕੀਤੀ ਗਈ ਸੀ। ਪਟੀਸ਼ਨ ’ਚ ਦਾਅਵਾ ਕੀਤਾ ਗਿਆ ਕਿ ਯੂਟਿਊਬ ਨੇ ਕਥਿਤ ਤੌਰ ’ਤੇ ਕੇਂਦਰ ਵੱਲੋਂ ‘ਕੌਮੀ ਸੁਰੱਖਿਆ’ ਤੇ ‘ਜਨਤਕ ਸਿਸਟਮ’ ਦੇ ਅਸਪੱਸ਼ਟ ਆਧਾਰਾਂ ਦਾ ਹਵਾਲਾ ਦਿੰਦਿਆਂ ਜਾਰੀ ਕੀਤੇ ‘ਹਦਾਇਤਾਂ’ ਅਨੁਸਾਰ ਚੈਨਲ ‘ਬਲੌਕ’ ਕਰ ਦਿੱਤਾ ਹੈ। -ਪੀਟੀਆਈ