ਭਾਜਪਾ ਕੰਮ ਨਹੀਂ, ਪ੍ਰਚਾਰ ਕਰਦੀ ਹੈ: ਸ਼ੈਲਜਾ

ਪੱਤਰ ਪ੍ਰੇਰਕ
ਡੱਬਵਾਲੀ, 28 ਮਾਰਚ
ਸੰਸਦ ਮੈਂਬਰ ਕੁਮਾਰੀ ਸ਼ੈਲਜਾ ਨੇ ਜਨਤਕ ਯੋਜਨਾਵਾਂ ਪ੍ਰਤੀ ਕੇਂਦਰ ਸਰਕਾਰ ਦੀ ਨੀਯਤ 'ਤੇ ਵੱਡੇ ਸਵਾਲ ਚੁੱਕੇ ਹਨ। ਉਨ੍ਹਾਂ ਕਿਹਾ ਕਿ ਭਾਜਪਾ ਦੇਸ਼ ਦੇ ਪੇਂਡੂ ਵਿਕਾਸ ਬਜਟ ਦਾ 34.82 ਫ਼ੀਸਦ ਖਰਚ ਕਰਨ ਵਿੱਚ ਅਸਫਲ ਰਹੀ ਹੈ ਜਿਸ ਕਾਰਨ ਮਨਰੇਗਾ, ਪੀਐਮਜੀਐਸਵਾਈ ਵਰਗੀਆਂ ਮਹੱਤਵਪੂਰਨ ਯੋਜਨਾਵਾਂ ਵੀ ਲਾਪਰਵਾਹੀ ਦਾ ਸ਼ਿਕਾਰ ਹੋ ਗਈਆਂ। ਉਨ੍ਹਾਂ ਕਿਹਾ ਕਿ ਪੇਂਡੂ ਵਿਕਾਸ ਅਤੇ ਪੰਚਾਇਤੀ ਰਾਜ ਬਾਰੇ ਸੰਸਦੀ ਸਥਾਈ ਕਮੇਟੀ ਦੀ ਰਿਪੋਰਟ ਵਿੱਚ ਖੁਲਾਸਾ ਹੋਇਆ ਕਿ ਸਾਲ 2024-25 ਵਿੱਚ ਪੇਂਡੂ ਵਿਕਾਸ ਦੀਆਂ ਕੇਂਦਰੀ ਫੰਡ ਪ੍ਰਾਪਤ ਯੋਜਨਾਵਾਂ ਲਈ ਸੋਧੇ ਹੋਏ ਬਜਟ ਅਨੁਮਾਨਾਂ ਦਾ 34.82 ਫ਼ੀਸਦ ਖਰਚ ਨਹੀਂ ਕੀਤਾ ਜਾ ਸਕਿਆ।
ਉਨ੍ਹਾਂ ਕਿਹਾ ਕਿ ਸੰਸਦੀ ਕਮੇਟੀ ਮੁਤਾਬਕ 2024-25 ਦੇ ਸੋਧੇ ਹੋਏ ਬਜਟ ਵਿੱਚ ਅਲਾਟ ਕੀਤੇ 1,73,804.01 ਕਰੋੜ ਰੁਪਏ ਦੇ ਮੁਕਾਬਲੇ ਅਸਲ ਖਰਚ ਸਿਰਫ 1,13,284.55 ਕਰੋੜ ਰੁਪਏ ਸੀ, ਜੋ ਸੋਧੇ ਹੋਏ ਅਨੁਮਾਨ ਪੜਾਅ ਵਿੱਚ ਅਲਾਟ ਕੀਤੀ ਗਈ ਰਕਮ ਨਾਲੋਂ 34.82 ਫ਼ੀਸਦ ਘੱਟ ਹੈ। ਉਨ੍ਹਾਂ ਦੋਸ਼ ਲਾਇਆ ਕਿ ਭਾਜਪਾ ਸਿਰਫ਼ ਪ੍ਰਚਾਰ ਕਰਦੀ ਹੈ, ਕੰਮ ਨਹੀਂ ਕਰਦੀ। ਗਰੀਬਾਂ ਅਤੇ ਪਿੰਡਾਂ ਦੇ ਵਿਕਾਸ ਦੀਆਂ ਗੱਲਾਂ ਸਿਰਫ਼ ਭਾਸ਼ਣਾਂ ਤੱਕ ਸੀਮਤ ਹਨ। ਜਨਤਾ ਨੂੰ ਤਾਂ ਹੀ ਲਾਭ ਹੋਵੇਗਾ ਜਦੋਂ ਯੋਜਨਾਵਾਂ ਦਾ ਲਾਭ ਉਨ੍ਹਾਂ ਤੱਕ ਪਹੁੰਚੇਗਾ, ਜਦੋਂ ਕਿ ਸਿਰਫ਼ ਝੂਠੇ ਵਾਅਦਿਆਂ ਨਾਲ ਢਿੱਡ ਨਹੀਂ ਭਰਿਆ ਜਾ ਸਕਦਾ।