ਕੁੱਤਿਆਂ ਨੇ ਬੱਚੇ ਨੂੰ ਨੋਚਿਆ, ਹਸਪਤਾਲ ’ਚ ਮੌਤ

ਟ੍ਰਿਬਿਊਨ ਨਿਊਜ਼ ਸਰਵਿਸ
ਲੁਧਿਆਣਾ, 31 ਮਾਰਚ
ਇੱਥੇ ਅੱਜ ਸਵੇਰੇ ਤਾਜਪੁਰ ਰੋਡ ’ਤੇ ਸਥਿਤ ਬਹਾਦਰ ਕਲੋਨੀ ਵਿੱਚ ਬੱਚੇ ਨੂੰ ਕੁੱਤਿਆਂ ਦੇ ਝੁੰਡ ਨੇ ਘੇਰ ਕੇ ਵੱਢ ਲਿਆ। ਬੱਚੇ ਦੀਆਂ ਚੀਕਾਂ ਸੁਣ ਕੇ ਆਲੇ-ਦੁਆਲੇ ਦੇ ਲੋਕ ਇਕੱਠੇ ਹੋ ਗਏ। ਕਿਸੇ ਤਰ੍ਹਾਂ ਲੋਕਾਂ ਨੇ ਕੁੱਤਿਆਂ ਨੂੰ ਡੰਡਿਆਂ ਨਾਲ ਭਜਾਇਆ। ਉਨ੍ਹਾਂ ਬੱਚੇ ਨੂੰ ਸਿਵਲ ਹਸਪਤਾਲ ਲਿਆਂਦਾ, ਜਿੱਥੇ ਇਲਾਜ ਦੌਰਾਨ ਉਸ ਦੀ ਮੌਤ ਹੋ ਗਈ। ਮ੍ਰਿਤਕ ਬੱਚੇ ਦੀ ਪਛਾਣ ਆਦਿੱਤਿਆ (6) ਵਜੋਂ ਹੋਈ ਹੈ। ਉਹ ਆਪਣੇ ਪਰਿਵਾਰ ਨਾਲ ਕਲੋਨੀ ਵਿੱਚ ਰਹਿੰਦਾ ਸੀ। ਹਾਦਸੇ ਸਮੇਂ ਬੱਚੇ ਦੀ ਮਾਂ ਫੈਕਟਰੀ ਵਿੱਚ ਸਫਾਈ ਕਰਨ ਗਈ ਹੋਈ ਸੀ। ਮ੍ਰਿਤਕ ਦੀ ਨਾਨੀ ਮੁੰਨੀ ਦੇਵੀ ਨੇ ਦੱਸਿਆ ਕਿ ਆਦਿੱਤਿਆ ਦੂਜੀ ਵਿੱਚ ਪੜ੍ਹਦਾ ਹੈ। ਆਦਿੱਤਿਆ ਦੇ ਤਿੰਨ ਭਰਾ ਹਨ।