ਅੱਗ ਲੱਗਣ ਨਾਲ ਸਾਢੇ ਤਿੰਨ ਏਕੜ ਕਣਕ ਸੜੀ

ਨਿੱਜੀ ਪੱਤਰ ਪ੍ਰੇਰਕ
ਫ਼ਿਰੋਜ਼ਪੁਰ, 15 ਅਪਰੈਲ
ਪਿੰਡ ਕਾਸੂਬੇਗੂ ਵਿਚ ਅੱਜ ਅੱਗ ਲੱਗਣ ਨਾਲ ਕਰੀਬ ਸਾਢੇ ਤਿੰਨ ਏਕੜ ਫ਼ਸਲ ਅੱਗ ਲੱਗਣ ਨਾਲ ਸੜ ਕੇ ਸੁਆਹ ਹੋ ਗਈ। ਟਰੈਕਟਰ ਵਿੱਚੋਂ ਨਿਕਲੀ ਚੰਗਿਆੜੀ ਨੇ ਫ਼ਸਲ ਦੇ ਨਾਲ-ਨਾਲ ਕਿਸਾਨ ਦਾ ਟਰੈਕਟਰ ਵੀ ਸਾੜ ਦਿੱਤਾ। ਹਾਲਾਂਕਿ ਪੀੜਤ ਕਿਸਾਨ ਮੱਖਣ ਸਿੰਘ ਇਸ ਨੂੰ ‘ਰੱਬ ਦਾ ਭਾਣਾ’ ਮੰਨ ਕੇ ਅਜੇ ਵੀ ਹੌਂਸਲੇ ਵਿੱਚ ਹੈ। ਮੱਖਣ ਸਿੰਘ ਨੇ ਅਜੇ ਕੁਝ ਦਿਨ ਪਹਿਲਾਂ ਹੀ ਆਪਣੇ ਟਰੈਕਟਰ ਦੀ ਮੁਰੰਮਤ ਤੇ ਦਸ ਹਜ਼ਾਰ ਰੁਪਏ ਖਰਚ ਕਰਕੇ ਉਸਦਾ ਜ਼ਰੂਰੀ ਕੰਮ ਕਰਵਾਇਆ ਸੀ। ਅੱਜ ਉਹ ਆਪਣੇ ਖੇਤ ਵਿਚ ਕੰਮ ਕਰ ਰਿਹਾ ਸੀ ਜਦੋਂ ਅਚਾਨਕ ਕੋਈ ਖ਼ਰਾਬੀ ਪੈਣ ਨਾਲ ਟਰੈਕਟਰ ਵਿਚੋਂ ਇੱਕ ਚੰਗਿਆੜੀ ਨਿਕਲੀ ਤੇ ਉਸਨੇ ਖੜ੍ਹੀ ਫ਼ਸਲ ਨੂੰ ਆਪਣੀ ਲਪੇਟ ਵਿਚ ਲੈ ਲਿਆ। ਮੱਖਣ ਸਿੰਘ ਕੋਲ ਪੰਚਾਇਤ ਦੀ ਇਹ ਜ਼ਮੀਨ ਠੇਕੇ ’ਤੇ ਸੀ। ਪਿੰਡ ਦੀ ਪੰਚਾਇਤ ਨੇ ਪ੍ਰਸ਼ਾਸਨ ਪਾਸੋਂ ਪੀੜਤ ਕਿਸਾਨਾਂ ਨੂੰ ਮੁਆਵਜ਼ਾ ਦੇਣ ਦੀ ਮੰਗ ਕੀਤੀ ਹੈ।