ਕਰੰਟ ਲੱਗਣ ਕਾਰਨ ਮਜ਼ਦੂਰ ਦੀ ਮੌਤ

ਪੱਤਰ ਪ੍ਰੇਰਕ
ਮਾਛੀਵਾੜਾ, 18 ਜੁਲਾਈ
ਸਥਾਨਕ ਦਾਣਾ ਮੰਡੀ ਵਿਚ ਕੱਲ੍ਹ ਦੇਰ ਰਾਤ ਕਰੰਟ ਲੱਗਣ ਨਾਲ ਮਜ਼ਦੂਰ ਰਾਮ ਸੰਜੀਵਨ (38) ਵਾਸੀ ਯੂਪੀ ਦੀ ਮੌਤ ਹੋ ਗਈ। ਜਾਣਕਾਰੀ ਅਨੁਸਾਰ ਰਾਮ ਸੰਜੀਵਨ ਮਾਛੀਵਾੜਾ ਮੰਡੀ ਵਿੱਚ ਆੜ੍ਹਤੀ ਦੀ ਦੁਕਾਨ ’ਤੇ ਮੱਕੀ ਸਾਫ਼ ਕਰਨ ਦਾ ਕੰਮ ਕਰਦਾ ਸੀ। ਬੀਤੀ ਰਾਤ ਉਹ ਦਾਣਾ ਮੰਡੀ ਵਿੱਚ ਲੱਗੇ ਵਾਟਰ ਕੂਲਰ ’ਤੇ ਪਾਣੀ ਪੀਣ ਗਿਆ ਤਾਂ ਉੱਥੋਂ ਉਸ ਨੂੰ ਕਰੰਟ ਲੱਗ ਗਿਆ। ਦੂਜੇ ਮਜ਼ਦੂਰਾਂ ਨੇ ਜਦੋਂ ਉਸ ਨੂੰ ਚੁੱਕਣ ਦੀ ਕੋਸ਼ਿਸ਼ ਕੀਤੀ ਤਾਂ ਉੱਥੇ ਆਸਪਾਸ ਵੀ ਕਰੰਟ ਸੀ। ਬਿਜਲੀ ਦੀ ਤਾਰ ਕੱਟਣ ਤੋਂ ਬਾਅਦ ਜਦੋਂ ਰਾਮ ਸੰਜੀਵਨ ਦੀ ਜਾਂਚ ਕੀਤੀ ਤਾਂ ਉਸ ਦੀ ਮੌਤ ਹੋ ਚੁੱਕੀ ਸੀ। ਦਾਣਾ ਮੰਡੀ ਵਿਚ ਮੀਂਹ ਤੋਂ ਬਾਅਦ ਗੰਦੇ ਪਾਣੀ ਦੀ ਨਿਕਾਸੀ ਨਾ ਹੋਣ ਕਾਰਨ ਵਾਟਰ ਕੂਲਰ ਦੇ ਦੁਆਲੇ ਵੀ ਪਾਣੀ ਖੜ੍ਹਾ ਸੀ ਜਿਸ ਵਿੱਚ ਕਰੰਟ ਆ ਗਿਆ ਸੀ ਤੇ ਸੰਜੀਵਨ ਦੀ ਮੌਤ ਹੋ ਗਈ।