ਪਾਰਟੀ ਦੇ ਗੀਤ ਤੋਂ ‘ਹਿੰਦੂ’ ਅਤੇ ‘ਜੈ ਭਵਾਨੀ’ ਸ਼ਬਦ ਨਹੀਂ ਹਟਾਵਾਂਗੇ: ਊਧਵ ਠਾਕਰੇ

ਮੁੰਬਈ, 21 ਅਪਰੈਲ
ਸ਼ਿਵ ਸੈਨਾ (ਯੂਬੀਟੀ) ਮੁਖੀ ਊਧਵ ਠਾਕਰੇ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਚੋਣ ਕਮਿਸ਼ਨ ਵੱਲੋਂ ਪਾਰਟੀ ਦੇ ਨਵੇਂ ਗੀਤ ਤੋਂ ‘ਹਿੰਦੂ’ ਅਤੇ ‘ਜੈ ਭਵਾਨੀ’ ਸ਼ਬਦ ਹਟਾਉਣ ਲਈ ਕਿਹਾ ਹੈ ਪਰ ਉਹ ਇਸ ਨੂੰ ਨਹੀਂ ਮੰਨਣਗੇ। ਇੱਥੇ ਇੱਕ ਪ੍ਰੈੱਸ ਕਾਨਫਰੰਸ ਮੌਕੇ ਸੰਬੋਧਨ ਕਰਦਿਆਂ ਸ੍ਰੀ ਠਾਕਰੇ ਨੇ ਕਿਹਾ ਕਿ ਗੀਤ ’ਚੋਂ ‘ਜੈ ਭਵਾਨੀ’ ਸ਼ਬਦ ਹਟਾਉਣ ਲਈ ਆਖਣਾ ਮਹਾਰਾਸ਼ਟਰ ਦਾ ਅਪਮਾਨ ਹੈ। ਉਨ੍ਹਾਂ ਕਿਹਾ,‘ਛਤਰਪਤੀ ਸ਼ਿਵਾਜੀ ਮਹਾਰਾਜ ਨੇ ਹਿੰਦਵੀ ਸਵਰਾਜ ਦੇਵੀ ਤੁਲਜਾ ਭਵਾਨੀ ਦੇ ਆਸ਼ੀਰਵਾਦ ਨਾਲ ਲਿਖਿਆ ਸੀ। ਅਸੀਂ ਦੇਵੀ ਜਾਂ ਹਿੰਦੂ ਧਰਮ ਦੇ ਨਾਂ ’ਤੇ ਵੋਟਾਂ ਨਹੀਂ ਮੰਗ ਰਹੇ। ਇਹ ਅਪਮਾਨ ਹੈ ਤੇ ਇਹ ਸਹਿਣ ਨਹੀਂ ਕੀਤਾ ਜਾਵੇਗਾ।’ ਉਨ੍ਹਾਂ ਕਿਹਾ ਕਿ ਜਨਤਕ ਰੈਲੀਆਂ ਵਿੱਚ ‘ਜੈ ਭਵਾਨੀ’ ਅਤੇ ‘ਜੈ ਸ਼ਿਵਾਜੀ’ ਕਹਿਣ ਦੀ ਰਵਾਇਤ ਜਾਰੀ ਰੱਖਣਗੇ। -ਪੀਟੀਆਈ