ਵਾਲੀਬਾਲ ਚੈਂਪੀਅਨਸ਼ਿਪ: ਹਰਿਆਣਾ ਦੇ ਖਿਡਾਰੀਆਂ ਨੇ ਕਾਂਸੀ ਜਿੱਤੀ

ਪੱਤਰ ਪ੍ਰੇਰਕ

ਸ਼ਾਹਬਾਦ ਮਾਰਕੰਡਾ, 10 ਜੂਨ

ਭਾਰਤੀ ਖੇਡ ਅਥਾਰਿਟੀ ਸਾਈ ਕੁਰੂਕਸ਼ੇਤਰ ਸੈਂਟਰ ਦੇ ਤਿੰਨ ਵਾਲੀਵਾਲ ਖਿਡਾਰੀਆਂ ਨੇ 45ਵੀਂ ਸਬ-ਜੂਨੀਅਰ ਕੌਮੀ ਵਾਲੀਵਾਲ ਚੈਂਪੀਅਨਸ਼ਿਪ ਵਿਚ ਹਰਿਆਣਾ ਦੀ ਟੀਮ ਵੱਲੋਂ ਖੇਡਦੇ ਹੋਏ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ। ਇਸ ਪ੍ਰਦਰਸ਼ਨ ਦੀ ਬਦੌਲਤ ਹੀ ਹਰਿਆਣਾ ਦੀ ਟੀਮ ਨੇ ਕੌਮੀ ਚੈਂਪੀਅਨਸ਼ਿਪ ਵਿੱਚ ਤੀਜਾ ਸਥਾਨ ਹਾਸਲ ਕਰ ਕਾਂਸੀ ਦਾ ਮੈਡਲ ਜਿੱਤਿਆ ਹੈ। ਇਨ੍ਹਾਂ ਖਿਡਾਰੀਆਂ ਦਾ ਸਾਈ ਸੈਂਟਰ ਕੁਰੂਕਸ਼ੇਤਰ ਪੁੱਜਣ ‘ਤੇ ਭਰਵਾਂ ਸਵਾਗਤ ਕੀਤਾ ਗਿਆ। ਸਾਈ ਕੁਰੂਕਸ਼ੇਤਰ ਵਿਚ ਸਥਾਨਕ ਪ੍ਰਸ਼ਾਸਨ ਵੱਲੋਂ ਖਿਡਾਰੀਆਂ ਦੇ ਸਨਮਾਨ ਵਿਚ ਇਕ ਸਮਾਗਮ ਕਰਵਾਇਆ ਗਿਆ, ਜਿਸ ਵਿਚ ਸੂਚਨਾ ਤੇ ਜਨ ਸੰਪਰਕ ਅਧਿਕਾਰੀ ਡਾ. ਨਰਿੰਦਰ ਸਿੰਘ, ਸਾਈ ਇੰਚਾਰਜ ਕੁਲਦੀਪ ਸਿੰਘ ਵੜੈਚ ਆਦਿ ਨੇ ਕਾਂਸੀ ਤਗ਼ਮਾ ਜੇਤੂ ਹਰਿਆਣਾ ਵਾਲੀਵਾਲ ਟੀਮ ਦੇ ਕਪਤਾਨ ਅਭਿਸ਼ੇਕ, ਸੋਨੂੰ ਤੇ ਰਜਤ ਨੂੰ ਫੁੱਲਮਾਲਾਵਾਂ ਤੇ ਯਾਦਗਾਰੀ ਚਿੰਨ੍ਹ ਦੇ ਕੇ ਸਨਮਾਨਿਤ ਕੀਤਾ।