ਉੱਤਰ ਪ੍ਰਦੇਸ਼ ਵਿੱਚ ਹਾਦਸੇ ਦੌਰਾਨ ਬਲਾਚੌਰ ਦੀਆਂ ਦੋ ਔਰਤਾਂ ਦੀ ਮੌਤ

ਗੁਰਦੇਵ ਸਿੰਘ ਗਹੂੰਣ
ਬਲਾਚੌਰ, 28 ਦਸੰਬਰ
ਉੱਤਰ ਪ੍ਰਦੇਸ਼ ਦੇ ਸ਼ਹਿਰ ਬਾਗਪੱਤ ਨੇੜੇ ਵਾਪਰੇ ਹਾਦਸੇ ਵਿੱਚ ਬਲਾਚੌਰ ਦੀਆਂ ਦੋ ਔਰਤਾਂ ਦੀ ਮੌਤ ਹੋ ਗਈ ਜਦੋਂ ਕਿ ਟੈਂਪੂ-ਟਰੈਵਲਰ ਦੇ ਡਰਾਈਵਰ ਸਣੇ 11 ਜਣੇ ਜ਼ਖ਼ਮੀ ਹੋ ਗਏ। ਜ਼ਿਕਰਯੋਗ ਹੈ ਕਿ ਬੀਤੇ ਦਿਨੀਂ ਬਲਾਚੌਰ ਸ਼ਹਿਰ ਤੋਂ ਸ਼ਰਧਾਲੂਆਂ ਦਾ ਇਕ ਜਥਾ ਟੈਂਪੂ-ਟਰੈਵਲਰ ਰਾਹੀਂ ਮਥੁਰਾ, ਵਰਿੰਦਾਵਨ ਅਤੇ ਹੋਰ ਧਾਰਮਿਕ ਸਥਾਨਾਂ ਦੇ ਦਰਸ਼ਨਾਂ ਲਈ ਗਿਆ ਸੀ।
ਸ਼ਰਧਾਲੂ ਧਾਰਮਿਕ ਸਥਾਨਾਂ ਦੇ ਦਰਸ਼ਨ ਕਰਨ ਉਪਰੰਤ ਘਰ ਪਰਤ ਰਹੇ ਸਨ ਤਾਂ ਬਾਗਪਤ ਨੇੜੇ ਲੱਕੜ ਦੇ ਭਰੇ ਟਰੱਕ ਦੇ ਡਰਾਈਵਰ ਨੇ ਅਚਾਨਕ ਬਰੇਕ ਲਗਾ ਦਿੱਤੀ ਅਤੇ ਸੰਗਤ ਵਾਲਾ ਇਹ ਟੈਂਪੂ-ਟਰੈਵਲਰ ਟਰੱਕ ਵਿੱਚ ਜਾ ਵੱਜਿਆ। ਇਸ ਹਾਦਸੇ ਵਿੱਚ ਸੀਮਾ ਰਾਣਾ (45) ਪਤਨੀ ਰਾਣਾ ਸਤੀਸ਼ ਕੁਮਾਰ ਵਾਸੀ ਬਲਾਚੌਰ, ਮਨਦੀਪ ਕੌਰ (40) ਪੁੱਤਰੀ ਬਖਸ਼ੀਸ਼ ਸਿੰਘ, ਬਲਾਚੌਰ ਦੀ ਮੌਤ ਹੋ ਗਈ ਜਦੋਂਕਿ ਮ੍ਰਿਤਕਾ ਮਨਦੀਪ ਕੌਰ ਦੀ ਧੀ ਅਮਨਪ੍ਰੀਤ ਕੌਰ (15) ਅਤੇ ਟੈਂਪ-ਟਰੈਵਲਰ ਦੇ ਡਰਾਈਵਰ ਸਣੇ 11 ਸਵਾਰੀਆਂ ਜ਼ਖ਼ਮੀ ਹੋ ਗਈਆਂ।