ਦਿੱਲੀ ਦੇ ਕਈ ਹਿੱਸਿਆਂ ’ਚ ਟਰੈਫਿਕ ਜਾਮ

ਪੱਤਰ ਪ੍ਰੇਰਕ
ਨਵੀਂ ਦਿੱਲੀ, 29 ਫਰਵਰੀ
ਦਿੱਲੀ ਦੇ ਕੁਝ ਹਿੱਸਿਆਂ ਵਿੱਚ ਲੋਕਾਂ ਨੂੰ ਅੱਜ ਟਰੈਫਿਕ ਜਾਮ ਦੀ ਸਮੱਸਿਆ ਦਾ ਸਾਹਮਣਾ ਕਰਨਾ ਪਿਆ। ਦਿੱਲੀ ਟਰੈਫਿਕ ਪੁਲੀਸ ਨੇ ਦੱਸਿਆ ਕਿ ਡੀਐੱਨਡੀ ਫਲਾਈਵੇਅ ’ਤੇ ਮੁਰੰਮਤ ਅਤੇ ਜਾਂਚ ਦੇ ਕਾਰਨ ਡੀਐੱਨਡੀ ਫਲਾਈਵੇਅ ਦੇ ਦੋਵਾਂ ਪਾਸੇ ਆਵਾਜਾਈ ਪ੍ਰਭਾਵਿਤ ਰਹੀ। ਨਤੀਜੇ ਵਜੋਂ ਅਧਿਕਾਰੀਆਂ ਨੇ ਬਦਲਵੇਂ ਰੂਟਾਂ ਦੀ ਸਿਫ਼ਾਰਸ਼ ਕੀਤੀ ਹੈ। ਪੁਲੀਸ ਨੇ ਚਿੱਲਾ ਸੜਕ ਦੇ ਰੂਟ ਦੀ ਸਲਾਹ ਦਿੱਤੀ। ਐਕਸ ’ਤੇ ਇੱਕ ਪੋਸਟ ਵਿੱਚ ਦਿੱਲੀ ਟਰੈਫਿਕ ਪੁਲੀਸ ਨੇ ਲਿਖਿਆ, ‘‘ਡੀਐੱਨਡੀ ਫਲਾਈਵੇਅ ’ਤੇ ਮੁਰੰਮਤ ਤੇ ਨਿਰਮਾਣ ਉਸਾਰੀ ਦੀ ਜਾਂਚ ਕਾਰਨ ਫਲਾਈਵੇਅ ਦੇ ਦੋਵੇਂ ਪਾਸੇ ਭਾਰੀ ਆਵਾਜਾਈ ਹੈ। ਨੋਇਡਾ ਤੋਂ ਦਿੱਲੀ ਅਤੇ ਇਸ ਦੇ ਉਲਟ ਯਾਤਰੀਆਂ ਨੂੰ ਚਿੱਲਾ ਬਾਰਡਰ ਰੂਟ ਰਾਹੀਂ ਸਫ਼ਰ ਕਰਨ ਦੀ ਸਲਾਹ ਦਿੱਤੀ ਗਈ ਹੈ।
ਦਿੱਲੀ ਪੁਲੀਸ ਨੇ ਕਿਹਾ ਕਿ ਸਿੰਘੂ ਹੱਦ ’ਤੇ ਆਵਾਜਾਈ ਬਹੁਤ ਜ਼ਿਆਦਾ ਹੈ ਅਤੇ ਯਾਤਰੀਆਂ ਨੂੰ ਪਿਆਓ ਮਨਿਆਰੀ, ਸਬੋਲੀ, ਸਫੀਆਬਾਦ, ਸਿੰਘੂ ਸਕੂਲ ਟੌਲ ਰਾਹੀਂ ਸਫ਼ਰ ਕਰਨ ਦੀ ਸਲਾਹ ਦਿੱਤੀ ਹੈ।’’ ਉਨ੍ਹਾਂ ਅੱਗੇ ਲਿਖਿਆ,‘‘ਸਿੰਘੂ ਬਾਰਡਰ ’ਤੇ ਆਵਾਜਾਈ ਬਹੁਤ ਜ਼ਿਆਦਾ ਹੈ ਕਿਉਂਕਿ ਸਿੰਘੂ ਬਾਰਡਰ ’ਤੇ ਐੱਨਐੱਚ 44 ਦੇ ਦੋਵੇਂ ਕੈਰੇਜਵੇਅ ’ਤੇ ਸਿਰਫ ਸਰਵਿਸ ਸੜਕਾਂ ਹੀ ਆਵਾਜਾਈ ਲਈ ਖੁੱਲ੍ਹੀਆਂ ਹਨ। ਮੁਸਾਫਰਾਂ ਨੂੰ ਸਲਾਹ ਦਿੱਤੀ ਜਾਂਦੀ ਹੈ ਕਿ ਉਹ ਆਪਣੀ ਯਾਤਰਾ ਲਈ ਪਿਆਓ ਮਨਿਆਰੀ, ਸਬੋਲੀ, ਸਫੀਆਬਾਦ, ਸਿੰਘੂ ਸਕੂਲ ਟੌਲ ਅਤੇ ਜ਼ੀਰੋ ਪੱਲਾ ਟੌਲ ਦੀ ਵਰਤੋਂ ਕਰਨ।’’
ਅਧਿਕਾਰੀਆਂ ਨੇ ਇਹ ਵੀ ਕਿਹਾ ਕਿ ਲਾਜਪਤ ਨਗਰ ਫਲਾਈਓਵਰ ਦੇ ਕੋਲ ਇੱਕ ਐੱਲਜੀਵੀ ਦੇ ਖ਼ਰਾਬ ਹੋਣ ਕਾਰਨ ਮੂਲਚੰਦ ਅੰਡਰਪਾਸ ਤੋਂ ਆਸ਼ਰਮ ਚੌਕ ਵੱਲ ਕੈਰੇਜਵੇਅ ਵਿੱਚ ਰਿੰਗ ਰੋਡ ’ਤੇ ਆਵਾਜਾਈ ਪ੍ਰਭਾਵਿਤ ਹੋਈ ਹੈ।