ਥਾਣੇਦਾਰ ਦੀ ਵਰਦੀ ਪਾੜਨ ਵਾਲੇ ਤਿੰਨ ਸਕੇ ਭਰਾ ਗ੍ਰਿਫ਼ਤਾਰ
ਪਠਾਨਕੋਟ (ਪੱਤਰ ਪ੍ਰੇਰਕ): ਇਥੋਂ ਦੀ ਪੁਲੀਸ ਨੇ ਕੁੱਟਮਾਰ ਦੇ ਮਾਮਲੇ ਵਿੱਚ ਰਾਜ਼ੀਨਾਮਾ ਕਰਵਾਉਣ ਸਮੇਂ ਪੁਲੀਸ ਦੇ ਏਐਸਆਈ ਉਪਰ ਹਮਲਾ ਕਰਨ ਤੇ ਉਸ ਦੀ ਵਰਦੀ ਪਾੜ ਦੇਣ ਦੇ ਜੁਰਮ ਵਿੱਚ 3 ਸਕੇ ਭਰਾਵਾਂ ਨੂੰ ਗ੍ਰਿਫਤਾਰ ਕੀਤਾ ਹੈ ਅਤੇ ਉਨ੍ਹਾਂ ਉਪਰ ਮਾਮਲਾ ਦਰਜ ਕਰ ਦਿੱਤਾ ਹੈ। ਫੜੇ ਗਏ ਮੁਲਜ਼ਮਾਂ ਵਿੱਚ ਰਮੇਸ਼ ਕੁਮਾਰ, ਸਾਹਿਲ ਸੂਰੀ ਅਤੇ ਬਿੱਲਾ ਵਾਸੀਆਨ ਮੁਹੱਲਾ ਜੰਦਰਿਆਂ (ਪਠਾਨਕੋਟ) ਸ਼ਾਮਲ ਹਨ। ਜ਼ਿਲ੍ਹਾ ਪੁਲੀਸ ਮੁਖੀ ਹਰਕਮਲਪ੍ਰੀਤ ਸਿੰਘ ਖੱਖ ਨੇ ਦੱਸਿਆ ਕਿ ਥਾਣਾ ਡਵਿੀਜ਼ਨ ਨੰਬਰ 1 ਵਿੱਚ ਦੋ ਧਿਰਾਂ ਦਰਮਿਆਨ ਕੁੱਟਮਾਰ ਦਾ ਮਾਮਲਾ ਆਇਆ ਸੀ ਤਾਂ ਇਸ ਮਾਮਲੇ ਵਿੱਚ ਏਐਸਆਈ ਨਿਰਮਲਜੀਤ ਸਿੰਘ ਨੇ ਦੋਹਾਂ ਧਿਰਾਂ ਨੂੰ ਰਾਜ਼ੀਨਾਮਾ ਕਰਵਾਉਣ ਲਈ ਥਾਣੇ ਵਿੱਚ ਸੱਦਿਆ ਸੀ ਜਿੱਥੇ ਇੱਕ ਧਿਰ ਪੁੱਜੀ ਸੀ ਅਤੇ ਉਸ ਧਿਰ ਦੇ ਮੈਂਬਰਾਂ ਨੇ ਏਐਸਆਈ ਨਾਲ ਬਦਤਮੀਜ਼ੀ ਕਰਨੀ ਸ਼ੁਰੂ ਕਰ ਦਿੱਤੀ ਅਤੇ ਇੱਕ ਔਰਤ ਨੇ ਬਿਨਾ ਸਹਿਮਤੀ ਦੇ ਉਸ ਦੀ ਵੀਡੀਓ ਰਿਕਾਰਡ ਕਰਨੀ ਸ਼ੁਰੂ ਕਰ ਦਿੱਤੀ ਜਿਸ ’ਤੇ ਏਐਸਆਈ ਨੇ ਇਤਰਾਜ਼ ਕੀਤਾ ਤਾਂ ਤਿੰਨੇ ਭਰਾਵਾਂ ਨੇ ਉਸ ਉਪਰ ਹਮਲਾ ਕਰ ਦਿੱਤਾ ਤੇ ਵਰਦੀ ਪਾੜ ਦਿੱਤੀ।