ਚੋਰੀ ਦੇ ਮੋਬਾਈਲਾਂ ਸਮੇਤ ਤਿੰਨ ਗ੍ਰਿਫ਼ਤਾਰ

ਨਿੱਜੀ ਪੱਤਰ ਪ੍ਰੇਰਕ
ਲੁਧਿਆਣਾ, 17 ਜੁਲਾਈ
ਇਥੇ ਵੱਖ-ਵੱਖ ਥਾਣਿਆਂ ਦੀ ਪੁਲੀਸ ਨੇ ਤਿੰਨ ਜਣਿਆਂ ਨੂੰ ਗ੍ਰਿਫ਼ਤਾਰ ਕਰਕੇ ਮੋਬਾਈਲ ਫੋਨ ਬਰਾਮਦ ਕੀਤੇ ਹਨ। ਥਾਣਾ ਡਿਵੀਜ਼ਨ ਨੰਬਰ 3 ਦੀ ਪੁਲੀਸ ਨੇ ਦੋ ਜਣਿਆਂ ਨੂੰ ਗ੍ਰਿਫ਼ਤਾਰ ਕਰ ਕੇ ਚੋਰੀ ਦੇ ਮੋਬਾਈਲ ਫੋਨ ਬਰਾਮਦ ਕੀਤੇ ਹਨ।‌ ਥਾਣੇਦਾਰ ਸੁਖਜਿੰਦਰ ਸਿੰਘ ਨੇ ਦੱਸਿਆ ਹੈ ਕਿ ਕੁਲਦੀਪ ਕੁਮਾਰ ਵਾਸੀ ਕਿਰਾਏਦਾਰ ਮੰਨੂ ਗਲੀ ਨੰਬਰ 17/18 ਨਿਊ ਮਾਧੋਪੁਰੀ ਆਪਣੇ ਕੰਮਕਾਰ ਸਬੰਧੀ ਦੋਸਤ ਮੁਨੀਸ਼ ਕੁਮਾਰ ਨਾਲ ਆਪਣੇ ਸਾਈਕਲ ’ਤੇ ਜਾ ਰਿਹਾ ਸੀ ਤਾਂ ਸ਼ਮਸ਼ਾਨਘਾਟ ਪੁਲੀ ਕੋਲ ਕਸ਼ਮੀਰ ਨਗਰ ਵੱਲੋਂ ਦੋ ਨੌਜਵਾਨ ਆਏ ਤੇ ਉਨ੍ਹਾਂ ਨੂੰ ਘੇਰ ਕੇ ਆਪਣੇ ਡੱਬ ਵਿੱਚੋਂ ਲੋਹੇ ਦਾ ਦਾਤ ਕੱਢ ਕੇ ਮਾਰ ਦੇਣ ਦਾ ਡਰਾਬਾ ਦੇ ਕੇ ਜ਼ਬਰਦਸਤੀ ਉਸ ਦਾ ਫੋਨ ਖੋਹ ਕੇ ਭੱਜ ਗਏ। ਤਫ਼ਤੀਸ਼ ਦੌਰਾਨ ਕਮਲ ਕੁਮਾਰ ਵਾਸੀ ਜੀਕੇ ਅਸਟੇਟ ਭਾਮੀਆ ਕਲਾਂ ਅਤੇ ਦੀਪਕ ਕੁਮਾਰ ਵਾਸੀ ਮੁਸਾਫਰ ਖਾਨਾ ਰੇਲਵੇ ਸਟੇਸ਼ਨ ਨੂੰ ਗ੍ਰਿਫ਼ਤਾਰ ਕਰ ਕੇ 12 ਮੋਬਾਈਲ ਫੋਨ ਅਤੇ 1 ਦਾਤ ਬਰਾਮਦ ਕੀਤਾ ਗਿਆ ਹੈ। ਇਸੇ ਤਰ੍ਹਾਂ ਥਾਣਾ ਜਮਾਲਪੁਰ ਦੇ ਥਾਣੇਦਾਰ ਬਲਵਿੰਦਰ ਸਿੰਘ ਨੇ ਦੱਸਿਆ ਹੈ ਕਿ ਪੁਲੀਸ ਪਾਰਟੀ ਗਸ਼ਤ ਲਈ ਪਿੰਡ ਬੁੱਢੇਵਾਲ ਕੋਲ ਮੌਜੂਦ ਸੀ ਤਾਂ ਪਤਾ ਲੱਗਣ ’ਤੇ ਵਿੱਕੀ ਕੁਮਾਰ ਵਾਸੀ ਗਲੀ ਨੰਬਰ 1 ਬਿਹਾਰੀ ਕਲੋਨੀ ਰਾਮ ਨਗਰ ਨੂੰ ਮੋਟਰਸਾਈਕਲ ’ਤੇ ਆਉਂਦਿਆਂ ਪਿੰਡ ਜੰਡਿਆਲੀ ਬਿਸਲਰੀ ਕੱਟ ਚੰਡੀਗੜ੍ਹ ਰੋਡ ਤੋਂ ਕਾਬੂ ਕਰ ਕੇ ਉਸ ਪਾਸੋਂ 1 ਮੋਬਾਈਲ ਫੋਨ ਤੇ ਮੋਟਰਸਾਈਕਲ ਬਰਾਮਦ ਕੀਤਾ ਗਿਆ ਹੈ।