ਚੋਰਾਂ ਨੇ ਇੱਕ ਰਾਤ ਵਿੱਚ 7 ਦੁਕਾਨਾਂ ਦੇ ਤਾਲੇ ਤੋੜੇ

ਪੱਤਰ ਪ੍ਰੇਰਕ
ਪਠਾਨਕੋਟ, 22 ਜੂਨ
ਸਰਨਾ ਖੇਤਰ ਵਿੱਚ ਦੇਰ ਰਾਤ 7 ਦੁਕਾਨਾਂ ਅਤੇ ਇੱਕ ਘਰ ਵਿੱਚੋਂ ਚੋਰੀ ਹੋ ਗਈ। ਸਰਨਾ ਅੱਡੇ ਵਿੱਚ ਚੋਰੀ ਸਬੰਧੀ ਰਾਹੁਲ ਅਤੇ ਰੋਹਿਤ ਨੇ ਦੱਸਿਆ ਕਿ ਉਨ੍ਹਾਂ ਦੀ ਮੋਬਾਈਲ ਵੇਚਣ ਦੀ ਦੁਕਾਨ ਹੈ ਅਤੇ ਲੰਘੀ ਰਾਤ ਚੋਰਾਂ ਨੇ ਉਨ੍ਹਾਂ ਦੀ ਦੁਕਾਨ ਦਾ ਤਾਲਾ ਤੋੜ ਕੇ ਪੈਸੇ ਅਤੇ ਜ਼ਰੂਰੀ ਦਸਤਾਵੇਜ਼ ਚੋਰੀ ਕਰ ਲਏ। ਇਸੇ ਤਰ੍ਹਾਂ ਬਾਕੀ 6 ਦੇ ਕਰੀਬ ਦੁਕਾਨਾਂ ’ਚ ਵੀ ਚੋਰੀ ਹੋਈ ਹੈ। ਸੁਜਾਨਪੁਰ ਖੇਤਰ ਵਿੱਚ ਹੋਈਆਂ ਚੋਰੀਆਂ ਸਬੰਧੀ ਅਮਰੀਕ ਕੁਮਾਰ ਨੇ ਦੱਸਿਆ ਕਿ ਉਸ ਦੀ ਦੁਕਾਨ ਦਾ ਸ਼ਟਰ ਤੋੜ ਕੇ ਚੋਰ ਨਕਦੀ ਅਤੇ ਸਾਮਾਨ ਚੋਰੀ ਕਰਕੇ ਲੈ ਗਏ। ਪੀੜਤ ਰਾਜ ਕੁਮਾਰ ਨੇ ਦੱਸਿਆ ਕਿ ਉਸ ਦੇ ਘਰ ’ਚ ਦੇਰ ਰਾਤ ਠੱਕ-ਠੱਕ ਦੀ ਆਵਾਜ਼ ਸੁਣਾਈ ਦਿੱਤੀ ਅਤੇ ਜਦ ਉਹ ਉਠ ਕੇ ਕਮਰੇ ਵਿੱਚ ਗਿਆ ਤਾਂ ਉਥੇ ਚੋਰ ਉਸ ਨੂੰ ਦੇਖ ਕੇ ਭੱਜ ਗਏ। ਪੁਲੀਸ ਨੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।