ਬੀਡੀਪੀਓ ਦਫ਼ਤਰ ਅੱਗੇ ਗੂੰਜੇ ਮਗਨਰੇਗਾ ਮਜ਼ਦੂਰਾਂ ਦੇ ਨਾਅਰੇ

ਬੀਰਬਲ ਰਿਸ਼ੀ
ਸ਼ੇਰਪੁਰ, 1 ਜੁਲਾਈ
ਅੱਜ ਮਗਨਰੇਗਾ ਮਜ਼ਦੂਰ ਯੂਨੀਅਨ (ਸੀਟੂ) ਦੀ ਅਗਵਾਈ ਹੇਠ ਪੁੱਜੀਆਂ ਮਜ਼ਦੂਰ ਬੀਬੀਆਂ ਨੇ ਬੀਡੀਪੀਓ ਦਫ਼ਤਰ ਅੰਦਰਲੇ ਗੇਟ ਅੱਗੇ ਬੈਠ ਕੇ ਰੋਸ ਪ੍ਰਗਟਾਇਆ। ਇਸ ਮੌਕੇ ਖੇੜੀ ਕਲਾਂ ਵਿੱਚ ਮਸਟਰੋਲ ਕੱਢ ਕੇ ਬੁਲਾਏ ਮਜ਼ਦੂਰਾਂ ਨੂੰ ਕੰਮ ਨਾ ਦੇਣ ਅਤੇ ਪਿੰਡ ਈਸਾਪੁਰ ਲੰਡਾ ਵਿੱਚ ਤਿੰਨ ਮਹੀਨੇ ਤੋਂ ਮਗਨਰੇਗਾ ਮਜ਼ਦੂਰਾਂ ਨੂੰ ਕੰਮ ਨਾ ਦੇਣ ਦੇ ਮੁੱਦੇ ਉਭਰੇ। ਮਗਨਰੇਗਾ ਮਜ਼ਦੂਰ ਯੂਨੀਅਨ (ਸੀਟੂ) ਦੇ ਸੂਬਾਈ ਆਗੂ ਸ਼ੇਰ ਸਿੰਘ ਫਰਵਾਹੀ ਨੇ ਕਿਹਾ ਕਿ ਲੰਘੀ ਜੂਨ ਵਿੱਚ ਵਿਭਾਗ ਵੱਲੋਂ 28 ਮਜ਼ਦੂਰਾਂ ਦਾ ਮਸਟਰੋਲ ਕੱਢਿਆ ਗਿਆ ਜਿਸ ’ਤੇ ਬਾਕਾਇਦਾ ਮਜ਼ਦੂਰ ਸਬੰਧਤ ਕੰਮ ’ਤੇ ਪਹੁੰਚੇ। ਹੈਰਾਨੀਜਨਕ ਹੈ ਉਨ੍ਹਾਂ ਮਜ਼ਦੂਰਾਂ ਦੀ ਹਾਜ਼ਰੀ ਨਾ ਪਾਈ ਗਈ ਸਗੋਂ ਹੁਕਮਰਾਨ ਧਿਰ ਨਾਲ ਸਬੰਧਤ ਵਿਅਕਤੀ ਨੇ ਕੋਈ ਆਹੁਦਾ ਨਾ ਹੋਣ ਦੇ ਬਾਵਜੂਦ 17 ਮਜ਼ਦੂਰਾਂ ਨੂੰ ਖਾਲੀ ਹੱਥ ਘਰ ਭੇਜਦਿਆਂ ਆਪਣੇ 10 ਬੰਦੇ ਪਾ ਕੇ ਕੰਮ ਕਰਵਾਇਆ ਅਤੇ ਨਿਯਮਾਂ ਦੀ ਕਥਿਤ ਅਣਦੇਖੀ ’ਤੇ ਵਿਭਾਗ ਦੀ ਚੁੱਪ ਸ਼ੱਕੀ ਹੈ। ਉਨ੍ਹਾਂ ਕਿਹਾ ਕਿ ਇਸੇ ਤਰ੍ਹਾਂ ਤਿੰਨ ਮਹੀਨੇ ਤੋਂ ਈਸਾਪੁਰ ਦੇ ਮਜ਼ਦੂਰਾਂ ਨੂੰ ਕੰਮ ਨਹੀਂ ਮਿਲਿਆ ਜਿਸ ਸਬੰਧੀ ਅੱਜ ਉਹ ਸੰਕੇਤਕ ਰੋਸ ਪ੍ਰਦਰਸ਼ਨ ਕਰਕੇ ਗਏ ਹਨ ਅਤੇ ਜੇ ਦਿੱਤੇ ਪੱਤਰਾਂ ਵਿੱਚ ਦਰਸਾਈਆਂ ਮੰਗਾਂ ਨਾ ਮੰਨੀਆਂ ਤਾਂ ਬੀਡੀਪੀਓ ਦਫ਼ਤਰ ਅੱਗੇ ਮਜ਼ਦੂਰ ਧਰਨਾ ਦੇਣ ਲਈ ਮਜਬੂਰ ਹੋਣਗੇ। ਦਿੱਤੇ ਪੱਤਰਾਂ ਵਿੱਚ ਦੋਵੇਂ ਪਿੰਡਾਂ ਦੇ ਮਜ਼ਦੂਰਾਂ ਲਈ ਜੁਲਾਈ ਤੋਂ ਅਗਸਤ ਤੱਕ ਖੇੜੀ ਕਲਾਂ ਤੇ ਈਸਾਪੁਰ ਲਈ ਕ੍ਰਮਵਾਰ 34 ਤੇ 35 ਮਜ਼ਦੂਰਾਂ ਲਈ ਕੰਮ ਦੀ ਮੰਗ ਕੀਤੀ ਗਈ। ਇਸ ਮੌਕੇ ਬਲਾਕ ਕਮੇਟੀ ਦੀ ਚੋਣ ਦੌਰਾਨ ਨਿਰਮਲ ਝਲੂਰ ਕਨਵੀਨਰ, ਜਗਤਾਰ ਸਿੰਘ ਦੀਦਾਰਗੜ੍ਹ ਕੋ-ਕਨਵੀਨਰ, ਰਾਣੀ ਕੌਰ, ਮਲਕੀਤ ਸਿੰਘ, ਕੁਲਦੀਪ ਕੌਰ ਆਦਿ ਮੈਂਬਰ ਲਏ ਗਏ।

ਏਪੀਓ ਨੇ ਦੋਸ਼ ਨਕਾਰੇ

ਏਪੀਓ ਅਰਵਿੰਦਰਪਾਲ ਸਿੰਘ ਨੇ ਦੋਸ਼ ਨਕਾਰਦਿਆਂ ਦੱਸਿਆ ਕਿ ਖੇੜੀ ਕਲਾਂ ਵਿੱਚ ਮਗਨਰੇਗਾ ਦੇ ਕੰਮ ਵੇਖਦੇ ਸਬੰਧਤ ਸੈਕਟਰੀ ਨੂੰ ਪੁੱਛ ਕੇ ਹੀ ਕੋਈ ਟਿੱਪਣੀ ਕੀਤੀ ਜਾ ਸਕਦੀ ਹੈ ਜਦੋਂ ਕਿ ਪਿੰਡ ਈਸਾਪੁਰ ਵਿੱਚ ਪੁਰਾਣੀਆਂ ਗ੍ਰਾਂਟਾਂ ਨਾਲ ਸਾਰੇ ਕੰਮ ਹੋ ਗਏ ਅਤੇ ਲੋਕ ਸਭਾ ਚੋਣ ਕਾਰਨ ਅੱਗੇ ਕੰਮ ਦੀ ਮਨਜ਼ੂਰੀ ਨਹੀਂ ਲਈ ਜਾ ਸਕੀ। ਉਨ੍ਹਾਂ ਦਾਅਵਾ ਕੀਤਾ ਕਿ ਹੁਣ ਮਗਨਰੇਗਾ ਮਜ਼ਦੂਰਾਂ ਦੇ ਕੰਮ ਦੀ ਮਨਜ਼ੂਰੀ ਲੈ ਲਈ ਜਾਵੇਗੀ।