ਭਾਰਤੀ ਜੂਨੀਅਰ ਮਹਿਲਾ ਹਾਕੀ ਟੀਮ ਜਪਾਨ ਨੂੰ 1-0 ਨਾਲ ਹਰਾ ਕੇ ਏਸ਼ੀਆ ਕੱਪ ਦੇ ਫਾਈਨਲ ’ਚ ਪੁੱਜੀ

ਨਵੀਂ ਦਿੱਲੀ, 10 ਜੂਨ

ਭਾਰਤੀ ਜੂਨੀਅਰ ਮਹਿਲਾ ਹਾਕੀ ਟੀਮ ਨੇ ਜਾਪਾਨ ਦੇ ਗਿਫੂ ਪ੍ਰੀਫੈਕਚਰ ਦੇ ਕਾਕਾਮਿਗਾਹਾਰਾ ਵਿੱਚ ਮਹਿਲਾ ਜੂਨੀਅਰ ਏਸ਼ੀਆ ਕੱਪ 2023 ਦੇ ਸੈਮੀਫਾਈਨਲ ਮੁਕਾਬਲੇ ਵਿੱਚ ਮੇਜ਼ਬਾਨ ਜਾਪਾਨ ਨੂੰ 1-0 ਨਾਲ ਹਰਾ ਦਿੱਤਾ। ਖੇਡ ਦਾ ਇਕੋ-ਇਕ ਗੋਲ ਸੁਨੀਲਿਤਾ ਟੋਪੋ ਨੇ ਕੀਤਾ। ਇਸ ਜਿੱਤ ਦਾ ਮਤਲਬ ਹੈ ਕਿ ਭਾਰਤੀ ਟੀਮ ਦੂਜੀ ਵਾਰ ਇਸ ਵੱਕਾਰੀ ਟੂਰਨਾਮੈਂਟ ਦੇ ਫਾਈਨਲ ਵਿੱਚ ਹਿੱਸਾ ਲਵੇਗੀ, ਜੋ ਇਸ ਤੋਂ ਪਹਿਲਾਂ 2012 ਵਿੱਚ ਸਿਖਰ ਮੁਕਾਬਲੇ ਵਿੱਚ ਪਹੁੰਚੀ ਸੀ। ਹਾਕੀ ਇੰਡੀਆ ਦੇ ਅਨੁਸਾਰ ਭਾਰਤ ਨੇ ਟੂਰਨਾਮੈਂਟ ਦੇ ਫਾਈਨਲ ਵਿੱਚ ਪਹੁੰਚ ਕੇ ਕੌਮਾਂਤਰੀ ਹਾਕੀ ਫੈਡਰੇਸ਼ਨ ਜੂਨੀਅਰ ਹਾਕੀ ਮਹਿਲਾ ਵਿਸ਼ਵ ਕੱਪ 2023 ਲਈ ਕੁਆਲੀਫਾਈ ਕਰ ਲਿਆ, ਜੋ 29 ਨਵੰਬਰ ਤੋਂ 10 ਦਸੰਬਰ, 2023 ਤੱਕ ਚਿਲੀ ਵਿੱਚ ਹੋਵੇਗਾ। ਭਾਰਤੀ ਟੀਮ ਹੁਣ 11 ਜੂਨ ਨੂੰ ਫਾਈਨਲ ਵਿੱਚ ਚੀਨ ਜਾਂ ਕੋਰੀਆ ਨਾਲ ਖੇਡੇਗੀ।