ਝੱਖੜ ਕਾਰਨ ਕਿਸਾਨ ਦਾ ਸੋਲਰ ਸਿਸਟਮ ਨੁਕਸਾਨਿਆ

ਮਲੋਟ:

ਪਿਛਲੇ ਦਿਨੀਂ ਆਏ ਝੱਖੜ ਕਰਕੇ ਕਈ ਪਿੰਡਾਂ ਵਿੱਚ ਨੁਕਸਾਨ ਦੀਆਂ ਖਬਰਾਂ ਪ੍ਰਾਪਤ ਹੋਈਆਂ ਹਨ। ਮਲੋਟ ਸ਼ਹਿਰ ਤੋਂ ਇਲਾਵਾ ਛਾਪਿਆਂਵਾਲੀ, ਬੁਰਜ ਸਿੱਧਵਾਂ ਤੇ ਵਿਰਕਾਂ ਆਦਿ ਵਿਚ ਸ਼ੈਡ ਆਦਿ ਨੁਕਸਾਨੇ ਗਏ। ਪਿੰਡ ਆਲਮਵਾਲਾ ਦੇ ਕਿਸਾਨ ਗੁਰਮੀਤ ਸਿੰਘ ਨੇ ਦੱਸਿਆ ਕਿ ਉਸ ਨੇ ਦੋ ਸਾਲ ਪਹਿਲਾਂ ਸੀਆਰਈ ਕੰਪਨੀ ਤੋਂ ਕਰੀਬ ਦੋ ਲੱਖ ਦਾ ਖਰਚ ਕਰ ਕੇ ਸੋਲਰ ਸਿਸਟਮ ਲਗਵਾਇਆ ਸੀ ਜੋ ਹਨੇਰੀ ਕਰਕੇ ਪੂਰੇ ਦਾ ਪੂਰਾ ਸਿਸਟਮ ਨੁਕਸਾਨਿਆ ਗਿਆ। ਹਨੇਰੀ ਕਰਕੇ ਸਾਰੀਆਂ ਪਲੇਟਾਂ ਨਾਲ ਦੇ ਖੇਤਾਂ ਵਿੱਚ ਜਾ ਡਿੱਗੀਆਂ। ਉਨ੍ਹਾਂ ਕੰਪਨੀ ਅਤੇ ਸਰਕਾਰ ਨੂੰ ਅਪੀਲ ਕੀਤੀ ਕਿ ਉਹ ਛੋਟਾ ਕਿਸਾਨ ਹੈ ਅਤੇ ਉਸ ਦੀ ਆਰਥਿਕ ਭਰਪਾਈ ਕੀਤੀ ਜਾਵੇ। -ਨਿੱਜੀ ਪੱਤਰ ਪ੍ਰੇਰਕ