ਮਾਰਕੀਟ ਕਮੇਟੀ ਦਫ਼ਤਰ ਦੇ ਮੁਲਾਜ਼ਮ ਦੀ ਕਾਰ ਨੂੰ ਅੱਗ ਲਾਈ

ਨਿੱਜੀ ਪੱਤਰ ਪ੍ਰੇਰਕ
ਗੁਰਾਇਆ, 21 ਜੂਨ
ਇਥੋਂ ਮਾਰਕੀਟ ਕਮੇਟੀ ਦਫ਼ਤਰ ਦਾਣਾ ਮੰਡੀ ਵਿਖੇ ਖੜ੍ਹੀ ਇਕ ਕਾਰ ਨੂੰ ਅਣਪਛਾਤੇ 5 ਵਿਅਕਤੀਆਂ ਵਲੋਂ ਅੱਗ ਲਗਾਉਣ ਦੀ ਖ਼ਬਰ ਹੈ। ਜਾਣਕਾਰੀ ਮੁਤਾਬਿਕ ਗੁਰਪ੍ਰੀਤ ਸਿੰਘ ਪੁੱਤਰ ਸੁਖਵੀਰ ਸਿੰਘ ਵਾਸੀ ਬੀਰ ਪਿੰਡ ਜੋ ਮਾਰਕੀਟ ਕਮੇਟੀ ਗੁਰਾਇਆ ਦਫ਼ਤਰ ਵਿਖੇ ਕਲਰਕ ਦੀ ਨੌਕਰੀ ਕਰਦਾ ਹੈ। ਉਸ ਦੀ ਕਾਰ ਪੀ ਬੀ 08 ਡੀ ਐਫ 7109 ਦਫ਼ਤਰ ਦੇ ਬਾਹਰ ਹੀ ਖੜ੍ਹੀ ਸੀ। ਦੁਪਹਿਰ ਬਾਅਦ 5 ਅਣਪਛਾਤੇ ਵਿਅਕਤੀਆਂ ਨੇ ਮਾਰਕੀਟ ਕਮੇਟੀ ਦਫ਼ਤਰ ਦਾ ਕੁੰਡਾ ਬਾਹਰੋਂ ਲਗਾ ਕੇ ਕਾਰ ਨੂੰ ਅੱਗ ਲਗਾ ਦਿੱਤੀ। ਦਫ਼ਤਰ ‘ਚੋਂ ਜਦੋਂ ਗੁਰਪ੍ਰੀਤ ਸਿੰਘ ਬਾਹਰ ਆਏ ਤਾਂ ਅਣਪਛਾਤੇ ਵਿਅਕਤੀ ਫ਼ਰਾਰ ਹੋ ਗਏ। ਉਨ੍ਹਾਂ ਅੱਗ ‘ਤੇ ਕਾਬੂ ਪਾਇਆ ਤਦ ਤਕ ਕਾਰ ਕਾਫੀ ਸੜ ਗਈ। ਪੁਲੀਸ ਨੇ ਮਾਮਲੇ ਦੀ ਜਾਚ ਸ਼ੁਰੂ ਕਰ ਦਿੱਤੀ ਹੈ।