ਆਈਆਈਟੀ ਖੜਗਪੁਰ ਦੇ ਹੋਸਟਲ ’ਚੋਂ ਵਿਦਿਆਰਥਣ ਦੀ ਲਾਸ਼ ਮਿਲੀ

ਕੋਲਕਾਤਾ, 17 ਜੂਨ
ਆਈਆਈਟੀ ਖੜਗਪੁਰ ਦੀ ਤੀਜੇ ਸਾਲ ਦੀ ਇੱਕ ਵਿਦਿਆਰਥਣ ਦੀ ਲਾਸ਼ ਉਸ ਦੇ ਹੋਸਟਲ ’ਚੋਂ ਮਿਲੀ ਹੈ। ਪੁਲੀਸ ਦੇ ਇੱਕ ਸੀਨੀਅਰ ਅਧਿਕਾਰੀ ਨੇ ਦੱਸਿਆ ਕਿ ਮ੍ਰਿਤਕ ਦੀ ਪਛਾਣ ਦੇਵਿਕਾ ਪਿੱਲੇ (21) ਵਜੋਂ ਹੋਈ ਹੈ। ਅਧਿਕਾਰੀ ਮੁਤਾਬਕ, ‘‘ਵਿਦਿਆਰਥਣ ਦੀ ਲਾਸ਼ ਹੋਸਟਲ ਦੀ ਇਮਾਰਤ ’ਚ ਛੱਤ ਵਾਲੇ ਪੱਖੇ ਨਾਲ ਲਟਕਦੀ ਮਿਲੀ ਹੈ। ਹਾਲੇ ਇਹ ਪਤਾ ਨਹੀਂ ਲੱਗ ਸਕਿਆ ਕਿ ਇਹ ਮਾਮਲਾ ਖ਼ੁਦਕੁਸ਼ੀ ਦਾ ਹੈ ਜਾਂ ਇਸ ਪਿੱੱਛੇ ਕੋਈ ਹੋਰ ਕਾਰਨ ਹੈ। ਅਸੀਂ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।’’ ਉਨ੍ਹਾਂ ਕਿਹਾ ਕਿ ਲਾਸ਼ ਪੋਸਟਮਾਰਟਮ ਲਈ ਖੜਗਪੁਰ ਸਬ-ਡਿਵੀਜ਼ਨਲ ਹਸਪਤਾਲ ਭੇਜੀ ਗਈ ਹੈ। ਖ਼ਬਰ ਦੀ ਪੁਸ਼ਟੀ ਕਰਦਿਆਂ ਆਈਆਈਟੀ ਖਗੜਪੁਰ ਨੇ ਕਿਹਾ ਕਿ ਦੇਵਿਕਾ ਬਾਇਓਟੈਕਨਾਲੋਜੀ ਵਿਭਾਗ ਦੀ ਤੀਜੇ ਸਾਲ ਦੀ ਵਿਦਿਆਰਥਣ ਸੀ, ਜਿਸ ਦੀ ਲਾਸ਼ ਅੱਜ ਸਵੇਰੇ ਸਰੋਜਨੀ ਨਾਇਡੂ/ ਇੰਦਰਾ ਗਾਂਧੀ (ਹੋਸਟਲ) ਹਾਲ ਕੰਪਲੈਕਸ ’ਚ ਛੱਤ ਨਾਲ ਲਟਕਦੀ ਮਿਲੀ। -ਪੀਟੀਆਈ