ਬੈਂਕ ਮੈਨੇਜਰ ਭੇਤ-ਭਰੇ ਢੰਗ ਨਾਲ ਕਾਰ ਸਮੇਤ ਸਰਹਿੰਦ ਨਹਿਰ ’ਚ ਡਿੱਗਾ

ਜਸਵੀਰ ਸਿੰਘ ਭੁੱਲਰ
ਦੋਦਾ, 18 ਅਕਤੂਬਰ
ਇਥੋਂ ਨੇੜਲੇ ਪਿੰਡ ਭੁੱਲਰ ਕੋਲੋਂ ਲੰਘਦੀਆਂ ਨਹਿਰਾਂ ਵਿੱਚੋਂ ਸਰਹਿੰਦ ਨਹਿਰ ਵਿਚ ਬੁੱਧਵਾਰ-ਵੀਰਵਾਰ ਦੀ ਦਰਮਿਆਨੀ ਰਾਤ ਨੂੰ ਸੈਂਟਰਲ ਬੈਂਕ ਲੱਖੇਵਾਲੀ ਦੇ ਮੈਨੇਜਰ ਸਿਮਰਨਦੀਪ ਸਿੰਘ ਦੇ ਕਥਿਤ ਤੌਰ ’ਤੇ ਕਾਰ ਸਮੇਤ ਡਿੱਗਣ ਦਾ ਪਤਾ ਲੱਗਾ। ਉਨ੍ਹਾਂ ਦੀ ਭਾਲ ਵਿਚ ਪੁਲੀਸ, ਪ੍ਰਸ਼ਾਸਨ ਤੇ ਐੱਨਡੀਆਰਐੱਫ ਦੀਆਂ ਟੀਮਾਂ ਜੁਟੀਆਂ ਹੋਈਆਂ ਹਨ।
ਇਹ ਘਟਨਾ ਬੁੱਧਵਾਰ ਰਾਤ ਦੀ ਦੱਸੀ ਜਾਂਦੀ ਹੈ। ਦੱਸਿਆ ਜਾਂਦਾ ਹੈ ਸਿਮਰਨਦੀਪ ਸਿੰਘ ਬੁੱਧਵਾਰ ਰਾਤ ਕਰੀਬ 11 ਵਜੇ ਆਪਣੇ ਹੋਰ ਸੱਤ ਦੋਸਤਾਂ ਸਮੇਤ ਨਹਿਰ ਕੰਢੇ ਪੁੱਜੇ ਸਨ। ਇਹ ਸਾਰੇ ਜਣੇ ਚਾਰ ਕਾਰਾਂ ਵਿਚ ਸਵਾਰ ਸਨ। ਜਾਣਕਾਰੀ ਮੁਤਾਬਕ ਬਾਕੀ ਸੱਤ ਜਣੇ ਰਾਤ ਕਰੀਬ ਦੋ-ਢਾਈ ਵਜੇ (ਵੀਰਵਾਰ ਤੜਕੇ) ਤਿੰਨ ਕਾਰਾਂ ਵਿਚ ਵਾਪਸ ਚਲੇ ਗਏ ਪਰ ਸਿਮਰਨਦੀਪ ਸਿੰਘ ਕਥਿਤ ਤੌਰ ’ਤੇ ਕਾਰ ਸਮੇਤ ਨਹਿਰ ਵਿਚ ਡਿੱਗ ਪਏ।
ਘਟਨਾ ਵਾਲੀ ਥਾਂ ਮੌਜੂਦ ਐੱਚਐੱਚਓ ਥਾਣਾ ਸਦਰ ਮੁਕਤਸਰ ਹਰਪ੍ਰੀਤ ਕੌਰ ਨੇ ਮਾਮਲੇ ਉਤੇ ਕੋਈ ਟਿੱਪਣੀ ਕਰਨ ਤੋਂ ਨਾਂਹ ਕਰ ਦਿੱਤੀ ਹੈ। ਘਟਨਾ ਬਾਰੇ ਹੋਰ ਵੇਰਵੇ ਉਡੀਕੇ ਜਾ ਰਹੇ ਹਨ।