ਧਰਮਪੁਰ ਦੇ ਖੇਤਾਂ ਵਿੱਚੋਂ ਬੰਬ ਨੁਮਾ ਚੀਜ਼ ਮਿਲੀ

ਪੱਤਰ ਪ੍ਰੇਰਕ

ਮੁਕੇਰੀਆਂ, 6 ਜੂਨ

ਇੱਥੋਂ ਨੇੜਲੇ ਪਿੰਡ ਧਰਮਪੁਰ ਦੇ ਖੇਤਾਂ ਵਿੱਚ ਬੰਬ ਨੁਮਾ ਚੀਜ਼ ਮਿਲੀ ਹੈ। ਮੁਕੇਰੀਆਂ ਪੁਲੀਸ ਨੇ ਇਸ ਦੇ ਦੁਆਲੇ ਸੁਰੱਖਿਆ ਘੇਰਾ ਸਖ਼ਤ ਕਰ ਕੇ ਪੀਏਪੀ ਦੀ ਬੰਬ ਸਕੁਐਡ ਟੀਮ ਨੂੰ ਸੂਚਿਤ ਕਰ ਦਿੱਤਾ ਹੈ। ਜਾਣਕਾਰੀ ਅਨੁਸਾਰ ਅੱਜ ਧਰਮਪੁਰ ਡਾ. ਸਤਿੰਦਰ ਸਿੰਘ ਜਦੋਂ ਆਪਣਾ ਖੇਤ ਟਰੈਕਟਰ ਨਾਲ ਵਾਹ ਰਿਹਾ ਸੀ ਤਾਂ ਅਚਾਨਕ ਇੱਕ ਵੱਡ ਅਕਾਰੀ ਬੰਬ ਨੁਮਾ ਲੋਹੇ ਦੀ ਵਸਤੂ ਨਿਕਲੀ। ਕਿਸਾਨ ਨੇ ਤੁਰੰਤ ਪੁਲੀਸ ਨੂੰ ਸੂਚਿਤ ਕੀਤਾ। ਪੁਲੀਸ ਦਾ ਮੰਨਣਾ ਹੈ ਕਿ ਇਹ ਕੁਝ ਸਾਲ ਪੁਰਾਣਾ ਸ਼ੈੱਲ ਹੈ ਜੋ ਖੇਤ ਵਿੱਚ ਦੱਬਿਆ ਪਿਆ ਹੋਵੇਗਾ।

ਡੀਐੱਸਪੀ ਕੁਲਵਿੰਦਰ ਸਿੰਘ ਵਿਰਕ ਨੇ ਦੱਸਿਆ ਕਿ ਪੀਏਪੀ ਜਲੰਧਰ ਦੀ ਟੀਮ ਨੂੰ ਸੂਚਿਤ ਕਰ ਦਿੱਤਾ ਗਿਆ ਹੈ ਜਿਸ ਵਲੋਂ ਸਵੇਰੇ ਆ ਕੇ ਇਸ ਦੀ ਜਾਂਚ ਕੀਤੀ ਜਾਵੇਗੀ।