ਰੋਹਿਤ ਸਿੰਘ ਦੀ ਜੂਨੀਅਰ ਜੂਡੋ ਚੈਂਪੀਅਨਸ਼ਿਪ ਲਈ ਚੋਣ

ਘਨੌਰ: ਹਲਕਾ ਘਨੌਰ ਦੇ ਪਿੰਡ ਬਡੋਲੀ ਗੁੱਜਰਾਂ ਦੇ ਵਸਨੀਕ ਜੂਡੋ ਖਿਡਾਰੀ ਰੋਹਿਤ ਸਿੰਘ ਦੀ ਕਰਾਸ ਇੰਡੀਆ ਟੀਮ ਵਿੱਚ ਚੋਣ ਹੋਈ ਹੈ। ਕੋਚ ਸੁਰਜੀਤ ਸਿੰਘ ਵਾਲੀਆ ਨੇ ਦੱਸਿਆ ਕਿ ਰੋਹਿਤ ਸਿੰਘ ਜੂਡੋ ਖੇਡ ਵਿੱਚ ਕਈ ਤਗ਼ਮੇ ਜਿੱਤ ਚੁੱਕਿਆ ਹੈ। ਇੰਡੀਅਨ ਕ੍ਰਾਸ ਜੂਡੋ ਐਸੋਸੀਏਸ਼ਨ ਦੇ ਪ੍ਰਧਾਨ ਰਵੀ ਕਪੂਰ ਨੇ ਦੱਸਿਆ ਕਿ ਖਿਡਾਰੀ ਰੋਹਿਤ ਸਿੰਘ ਦੀ ਕਰਾਸ ਜੂਡੋ ਟੀਮ ਇੰਡੀਆ ਵਿੱਚ ਚੋਣ ਹੋਣ ਕਰਕੇ ਹੁਣ ਉਹ ਵਰਲਡ ਕ੍ਰਾਸ ਕੈਡਿਟ ਐਂਡ ਜੂਨੀਅਰ ਚੈਂਪੀਅਨਸ਼ਿਪ 2024 ਮੰਗੋਲੀ, ਜੋ ਕਿ 2 ਦਸੰਬਰ ਤੋਂ 8 ਦਸੰਬਰ ਨੂੰ ਹੋਣ ਜਾ ਰਹੀਆਂ ਹਨ, ਵਿੱਚ ਆਪਣੀ ਖੇਡ ਦਾ ਪ੍ਰਦਰਸ਼ਨ ਕਰੇਗਾ। ਉਨ੍ਹਾਂ ਨੂੰ ਪੂਰੀ ਉਮੀਦ ਹੈ ਕਿ ਹਲਕਾ ਘਨੌਰ ਦੇ ਜ਼ਿਲ੍ਹਾ ਪਟਿਆਲਾ ਦਾ ਵਸਨੀਕ ਖਿਡਾਰੀ ਰੋਹਿਤ ਸਿੰਘ ਖੇਡ ਦਾ ਵਧੀਆ ਪ੍ਰਦਰਸ਼ਨ ਕਰਕੇ ਪੰਜਾਬ ਦਾ ਨਾਂ ਰੋਸ਼ਨ ਕਰੇਗਾ। -ਨਿੱਜੀ ਪੱਤਰ ਪ੍ਰੇਰਕ