ਰੱਖੜੀ ਮੌਕੇ ਸਾਇਰਾ ਬਾਨੋ ਨੇ ਦਲੀਪ ਕੁਮਾਰ ਤੇ ਲਤਾ ਮੰਗੇਸ਼ਕਰ ਦੀਆਂ ਤਸਵੀਰਾਂ ਸਾਂਝੀਆਂ ਕੀਤੀਆਂ

ਮੁੰਬਈ: ਉੱਘੀ ਅਦਾਕਾਰਾ ਸਾਇਰਾ ਬਾਨੋ ਨੇ ਅੱਜ ਰੱਖੜੀ ਦੇ ਤਿਉਹਾਰ ਮੌਕੇ ਆਪਣੇ ਪਤੀ ਮਰਹੂਮ ਦਲੀਪ ਕੁਮਾਰ ਤੇ ਗਾਇਕਾ ਲਤਾ ਮੰਗੇਸ਼ਕਰ ਦੀਆਂ ਤਸਵੀਰਾਂ ਸਾਂਝੀਆਂ ਕਰਦਿਆਂ ਦੋਵਾਂ ਵਿਚਾਲੇ ਭੈਣ-ਭਰਾ ਦਾ ਅਥਾਹ ਪਿਆਰ ਹੋਣ ਦੀਆਂ ਯਾਦਾਂ ਸਾਂਝੀਆਂ ਕੀਤੀਆਂ। ਇਨ੍ਹਾਂ ਦੋਵਾਂ ਸਿਤਾਰਿਆਂ ਵਿਚਾਲੇ ਇਹ ਰਿਸ਼ਤਾ ਕੋਈ ਗੁੱਝਾ ਨਹੀਂ ਸੀ ਤੇ ਦੋਵਾਂ ਨੇ ਹੀ ਆਪਣੀ ਸਾਰੀ ਉਮਰ ਇਸ ਰਿਸ਼ਤੇ ਨੂੰ ਦਿਲੋਂ ਨਿਭਾਇਆ। ਸਾਇਰਾ ਬਾਨੋ ਵੱਲੋਂ ਇੰਸਟਾਗ੍ਰਾਮ ’ਤੇ ਸਾਂਝੀਆਂ ਕੀਤੀਆਂ ਗਈਆਂ ਇਨ੍ਹਾਂ ਤਸਵੀਰਾਂ ਵਿੱਚ ਵੱਡੀ ਉਮਰ ਵਿੱਚ ਵੀ ਦਲੀਪ ਕੁਮਾਰ ਤੇ ਲਤਾ ਮੰਗੇਸ਼ਕਰ ਰੱਖੜੀ ਮਨਾਉਂਦੇ ਨਜ਼ਰ ਆ ਰਹੇ ਹਨ। ਇਨ੍ਹਾਂ ਤਸਵੀਰਾਂ ਨਾਲ ਉਨ੍ਹਾਂ ਕਿਹਾ, ‘ਭਾਰਤੀ ਸਿਨੇਮਾ ਦੇ ਕੋਹਿਨੂਰ ਦਲੀਪ ਕੁਮਾਰ ਸਾਹਿਬ ਅਤੇ ਭਾਰਤੀ ਸੰਗੀਤ ਜਗਤ ਦੀ ਕੋਇਲ ਲਤਾ ਮੰਗੇਸ਼ਕਰ ਵਿਚਾਲੇ ਇੱਕ ਡੂੰਘਾ ਤੇ ਨਿੱਘਾ ਰਿਸ਼ਤਾ ਸੀ। ਉਹ ਦੋਵੇਂ ਇੱਕ ਦੂਜੇ ਦੇ ਭੈਣ-ਭਰਾ ਸਨ।’ ਜ਼ਿਕਰਯੋਗ ਹੈ ਕਿ ਸਫ਼ਲਤਾ ਦੀਆਂ ਉਚਾਈਆਂ ਛੂਹਣ ਦੇ ਬਾਵਜੂਦ ਅਕਸਰ ਹੀ ਦਲੀਪ ਕੁਮਾਰ ਤੇ ਲਤਾ ਮੰਗੇਸ਼ਕਰ ਸਟੂਡੀਓ ਜਾਣ ਲਈ ਲੋਕਲ ਰੇਲ ਵਿੱਚ ਸਫ਼ਰ ਕਰਦੇ ਸਨ। ਸਾਇਰਾ ਬਾਨੋ ਨੇ ਦੱਸਿਆ, ‘ਇਸ ਰੇਲ ਦੇ ਸਫ਼ਰ ਦੌਰਾਨ ਦਲੀਪ ਕੁਮਾਰ ਤੇ ਲਤਾ ਮੰਗੇਸ਼ਕਰ ਆਪਣੇ ਵਿਚਾਰ, ਤਜਰਬੇ ਤੇ ਇਰਾਦੇ ਸਾਂਝੇ ਕਰਦੇ ਸਨ। ਦੋਵੇਂ ਇੱਕ ਦੂਜੇ ਨੂੰ ਸੁਝਾਅ ਵੀ ਦਿੰਦੇ ਸਨ।’ -ਆਈਏਐੱਨਐੱਸ