ਅੱਲੂ ਅਰਜੁਨ ਤੇ ਰਸ਼ਮਿਕਾ ਵੱਲੋਂ ‘ਪੁਸ਼ਪਾ-ਦਿ ਰੂਲ’ ਦੀ ਸ਼ੂਟਿੰਗ ਮੁਕੰਮਲ

ਨਵੀਂ ਦਿੱਲੀ:

ਤੇਲਗੂ ਅਦਾਕਾਰ ਅੱਲੂ ਅਰਜੁਨ ਤੇ ਰਸ਼ਮਿਕਾ ਮੰਦਾਨਾ ਨੇ ਆਪਣੀ ਅਗਲੀ ਫਿਲਮ ‘ਪੁਸ਼ਪਾ: ਦਿ ਰੂਲ’ ਦੀ ਸ਼ੂਟਿੰਗ ਮੁਕੰਮਲ ਕਰ ਲਈ ਹੈ। ‘ਪੁਸ਼ਪਾ 2’ ਪੰਜ ਦਸੰਬਰ ਨੂੰ ਸਿਨੇਮਾਘਰਾਂ ਵਿੱਚ ਰਿਲੀਜ਼ ਹੋਵੇਗੀ। ਅਰਜੁਨ, 2021 ਵਿੱਚ ਆਈ ਬਲਾਕਬਸਟਰ ਫਿਲਮ ‘ਪੁਸ਼ਪਾ-ਦਿ ਰਾਈਜ਼’ ਦੇ ਸੀਕੁਅਲ ਵਿੱਚ ਮਜ਼ਦੂਰ ਤੋਂ ਚੰਦਨ ਤਸਕਰ ਬਣੇ ਪੁਸ਼ਪਾ ਰਾਜ ਦੀ ਭੂਮਿਕਾ ਨਿਭਾਉਣਗੇ। ‘ਪੁਸ਼ਪਾ-ਦਿ ਰਾਈਜ਼’ ਲਈ ਸਰਵੋਤਮ ਅਦਾਕਾਰ ਦਾ ਕੌਮੀ ਫਿਲਮ ਪੁਰਸਕਾਰ ਜਿੱਤਣ ਵਾਲੇ ਅਰਜੁਨ ਨੇ ਮੰਗਲਵਾਰ ਰਾਤ ਨੂੰ ਇਹ ਜਾਣਕਾਰੀ ਸਾਂਝੀ ਕੀਤੀ। ਉਨ੍ਹਾਂ ਨੇ ਫਿਲਮ ਦੇ ਸੈਟ ਦੀ ਤਸਵੀਰ ਸਾਂਝਾ ਕਰਦਿਆਂ ਲਿਖਿਆ,‘ਪੁਸ਼ਪਾ ਦਾ ਆਖ਼ਰੀ ਦਿਨ, ਆਖ਼ਰੀ ਸ਼ਾਟ। ਪੁਸ਼ਪਾ ਦਾ ਪੰਜ ਸਾਲ ਦਾ ਸਫ਼ਰ ਮੁਕੰਮਲ ਹੋਇਆ।’ ਸੁ ਕੁਮਾਰ ਵੱਲੋਂ ਨਿਰਦੇਸ਼ਿਤ ‘ਪੁਸ਼ਪਾ-2’ ਵਿੱਚ ਰਸ਼ਮਿਕਾ ਮੰਦਾਨਾ ਤੇ ਫਹਾਦ ਫਾਸਿਲ ਵੀ ਮੁੱਖ ਭੂਮਿਕਾਵਾਂ ਨਿਭਾਉਣਗੇ। ਗ਼ੌਰਤਲਬ ਹੈ ਕਿ ਫ਼ਿਲਮ ਦਾ ਟਰੇਲਰ 17 ਨਵੰਬਰ ਨੂੰ ਪਟਨਾ ਦੇ ਗਾਂਧੀ ਮੈਦਾਨ ਵਿੱਚ ਲਾਂਚ ਕੀਤਾ ਗਿਆ ਸੀ। -ਪੀਟੀਆਈ