ਆਰਜੇਡੀ ਨੇ ਲਾਲੂ ਦੀਆਂ ਦੋ ਧੀਆਂ ਸਣੇ 22 ਉਮੀਦਵਾਰ ਐਲਾਨੇ

ਪਟਨਾ, 10 ਅਪਰੈਲ
ਰਾਸ਼ਟਰੀ ਜਨਤਾ ਦਲ (ਆਰਜੇਡੀ) ਨੇ ਆਗਾਮੀ ਲੋਕ ਸਭਾ ਚੋਣਾਂ ਲਈ ਬਿਹਾਰ ਵਿੱਚ 22 ਸੀਟਾਂ ’ਤੇ ਆਪਣੇ ਉਮੀਦਵਾਰਾਂ ਦਾ ਰਸਮੀ ਐਲਾਨ ਕਰ ਦਿੱਤਾ ਹੈ। ਪਾਰਟੀ ਨੇ ਇੱਕ ਸੀਟ ’ਤੇ ਉਮੀਦਵਾਰ ਦਾ ਐਲਾਨ ਨਹੀਂ ਕੀਤਾ ਜਿਥੇ ਉਹ ਵਿਰੋਧੀ ‘ਮਹਾਗੱਠਬੰਧਨ’ ਦੇ ਦਲ ਵਜੋਂ ਚੋਣ ਲੜ ਰਹੀ ਹੈ। ਆਰਜੇਡੀ ਵੱਲੋਂ ਐਲਾਨੇ ਗਏ ਉਮੀਦਵਾਰਾਂ ’ਚ ਪਾਰਟੀ ਪ੍ਰਧਾਨ ਲਾਲੂ ਪ੍ਰਸਾਦ ਯਾਦਵ ਦੀਆਂ ਬੇਟੀਆਂ ਰੋਹਿਣੀ ਅਚਾਰੀਆ ਤੇ ਮੀਸਾ ਭਾਰਤੀ ਦੇ ਨਾਮ ਸ਼ਾਮਲ ਹਨ। ਆਰਜੇਡੀ ਦੇ ਸੂਬਾ ਪ੍ਰਧਾਨ ਜਗਦਾਨੰਦ ਸਿੰਘ ਵੱਲੋਂ ਮੰਗਲਵਾਰ ਦੇਰ ਸ਼ਾਮ ਜਾਰੀ ਬਿਆਨ ਮੁਤਾਬਕ ਰੋਹਿਣੀ ਅਚਾਰੀਆ ਸਾਰਨ ਹਲਕੇ ਤੋਂ ਚੋਣ ਲੜੇਗੀ ਜਿਥੋਂ ਉਨ੍ਹਾਂ ਦੇ ਪਿਤਾ ਕਈ ਵਾਰ ਜੇਤੂ ਰਹੇ ਹਨ। ਲਾਲੂ ਪ੍ਰਸਾਦ ਦੀ ਸਭ ਤੋਂ ਵੱਡੀ ਬੇਟੀ ਤੇ ਦੋ ਵਾਰ ਦੀ ਰਾਜ ਸਭਾ ਮੈਂਬਰ ਮੀਸਾ ਭਾਰਤੀ ਪਾਟਲੀਪੁੱਤਰ ਹਲਕੇ ਤੋਂ ਆਪਣੀ ਕਿਸਮਤ ਅਜ਼ਮਾਏਗੀ। ਆਰਜੇਡੀ ਨੇ 26 ਸੀਟਾਂ ਆਪਣੇ ਕੋਲ ਰੱਖੀਆਂ ਹਨ ਜਦਕਿ ਕਾਂਗਰਸ ਨੂੰ 9 ਅਤੇ ਖੱਬੀਆਂ ਪਾਰਟੀਆਂ ਨੂੰ 5 ਸੀਟਾਂ ਛੱਡੀਆਂ ਹਨ। -ਪੀਟੀਆਈ