ਪੁਲੀਸ ਵੱਲੋਂ 41 ਮੁਲਜ਼ਮ ਕਾਬੂ

ਨਿੱਜੀ ਪੱਤਰ ਪ੍ਰੇਰਕ
ਅੰਬਾਲਾ, 8 ਸਤੰਬਰ
ਅਪਰੇਸ਼ਨ ‘ਆਕਰਮਣ’ ਤਹਿਤ ਜ਼ਿਲ੍ਹਾ ਪੁਲੀਸ ਵੱਲੋਂ ਐਸਪੀ ਸੁਰਿੰਦਰ ਸਿੰਘ ਭੋਰੀਆ ਦੀ ਅਗਵਾਈ ਵਿਚ ਕਾਰਵਾਈ ਕਰਦਿਆਂ ਅਪਰਾਧਕ ਮਾਮਲਿਆਂ ਵਿੱਚ ਸ਼ਾਮਲ 41 ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਸਾਰੀਆਂ ਅਪਰਾਧ ਜਾਂਚ ਸ਼ਾਖਾਵਾਂ, ਪੁਲੀਸ ਸਟੇਸ਼ਨਾਂ ਅਤੇ ਚੌਕੀ ਪੱਧਰ ’ਤੇ ਕੁੱਲ 61 ਟੀਮਾਂ ਬਣਾਈਆਂ ਗਈਆਂ ਜਿਨ੍ਹਾਂ ‘ਚ ਸ਼ਾਮਲ 262 ਪੁਲੀਸ ਅਧਿਕਾਰੀ ਤੇ ਕਰਮਚਾਰੀ ਸ਼ਾਮਲ ਸਨ। ਇਸ ਤਹਿਤ ਆਬਕਾਰੀ ਐਕਟ ਅਧੀਨ ਨੌਂ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕਰ ਕੇ 131 ਬੋਤਲਾਂ ਸ਼ਰਾਬ ਬਰਾਮਦ ਕੀਤੀ ਗਈ। ਨਸ਼ਾ ਤਸਕਰੀ ਦੇ ਦੇ ਮਾਮਲਿਆਂ ਵਿੱਚ ਦੋ ਨੂੰ ਗ੍ਰਿਫ਼ਤਾਰ ਕਰ ਕੇ 15.34 ਗ੍ਰਾਮ ਹੈਰੋਇਨ ਅਤੇ 5040 ਨਸ਼ੇ ਦੇ ਕੈਪਸੂਲ ਬਰਾਮਦ ਕੀਤੇ। ਜੂਏ ਦੇ 17 ਕੇਸਾਂ ਵਿੱਚ 17 ਜਣੇ ਕਾਬੂ ਕਰ ਕੇ 27,150 ਰੁਪਏ ਬਰਾਮਦ ਕੀਤੇ ਹਨ। 7 ਭਗੌੜੇ ਅਤੇ ਜ਼ਮਾਨਤ ਲੈਣ ਵਾਲਿਆਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਇਸ ਤੋਂ ਇਲਾਵਾ 81 ਵਾਹਨਾਂ ਦੇ ਚਲਾਨ ਵੀ ਕੀਤੇ ਗਏ ਹਨ।