ਬਿਜਲੀ ਦੇ ਅਣ-ਐਲਾਨੇ ਕੱਟਾਂ ਕਾਰਨ ਲੋਕ ਪ੍ਰੇਸ਼ਾਨ

ਨਿੱਜੀ ਪੱਤਰ ਪ੍ਰੇਰਕ
ਮੋਗਾ, 28 ਜੂਨ
ਇੱਥੇ ਉੱਤਰੀ ਉਪ ਮੰਡਲ ਅਧੀਨ ਸ਼ਹਿਰੀ ਖੇਤਰ ’ਚ ਲੰਢੇਕੇ ਫੀਡਰ ਅਧੀਨ ਸੰਤ ਨਗਰ, ਅੰਮ੍ਰਿਤਸਰ ਰੋਡ, ਮਾਡਲ ਟਾਊਨ ਤੇ ਹੋਰ ਕਈ ਖੇਤਰਾਂ ਵਿੱਚ ਦੋ ਦਿਨ ਤੋਂ ਬਿਜਲੀ ਦੇ ਅਣ-ਐਲਾਨੇ ਕੱਟਾਂ ਕਾਰਨ ਲੋਕ ਬਹੁਤ ਜ਼ਿਆਦਾ ਪ੍ਰੇਸ਼ਾਨ ਹਨ। ਸੇਵਾਮੁਕਤ ਡੀਐੱਸਪੀ ਸੁਖਦੇਵ ਸਿੰਘ ਥਿੰਦ ਤੇ ਹੋਰ ਲੋਕਾਂ ਨੇ ਦੱਸਿਆ ਕਿ ਦੋ ਦਿਨ ਤੋਂ ਲੰਢੇਕੇ ਫੀਡਰ ਅਧੀਨ ਸਾਰੇ ਖੇਤਰ ’ਚ ਅਣ-ਐਲਾਨੇ ਬਿਜਲੀ ਕੱਟ ਲਗਾਏ ਜਾ ਰਹੇ ਹਨ।
ਉਨ੍ਹਾਂ ਨੇ ਕਿਹਾ ਕਿ ਇਲਾਕਵਾਸੀ ਪ੍ਰੇਸ਼ਾਨ ਹੋ ਰਹੇ ਹਨ। ਫੀਡਰ ਇੰਚਾਰਜ ਦਾ ਮੋਬਾਈਲ ਨੰਬਰ ਵੀ ਬੰਦ ਹੈ। ਉਨ੍ਹਾਂ ਕਿਹਾ ਕਿ ਬਿਜਲੀ ਨਾ ਆਉਣ ਕਾਰਨ ਲੋਕ ਪੀਣ ਵਾਲੇ ਪਾਣੀ ਨੂੰ ਵੀ ਤਰਸ ਗਏ ਹਨ। ਇਨ੍ਹਾਂ ਕੱਟਾਂ ਕਾਰਨ ਬੁਜ਼ਰਗਾਂ ਅਤੇ ਬੱਚਿਆਂ ਨੂੰ ਸਭ ਤੋਂ ਵੱਧ ਤਕਲੀਫ਼ ਦਾ ਸਾਹਮਣਾ ਕਰਨਾ ਪਿਆ।
ਇੱਥੇ ਪੰਜਾਬ ਕਾਂਗਰਸ ਪਾਰਟੀ ਦੇ ਸੋਸ਼ਲ ਮੀਡੀਆ ਗਰੁੱਪ ਵਿਚ ਕਿਸਾਨਾਂ ਨੂੰ ਖੇਤੀ ਸੈਕਟਰੀ ਲਈ ਪੂਰੀ ਬਿਜਲੀ ਨਾ ਮਿਲਣ ਦਾ ਦਾਅਵਾ ਕਰਦਿਆਂ ਦਿਖਾਇਆ ਗਿਆ ਹੈ ਕਿ ਕਿਸਾਨ ਮਹਿੰਗੇ ਭਾਅ ਦਾ ਡੀਜ਼ਲ ਫੂਕ ਕੇ ਝੋਨੇ ਦੀ ਫ਼ਸਲ ਨੂੰ ਪਾਣੀ ਦੇਣ ਲਈ ਮਜਬੂਰ ਹਨ।
ਸਥਾਨਕ ਪਾਵਰਕੌਮ ਉੱਤਰੀ ਉੱਪ ਮੰਡਲ ਐੱਸਡੀਓ ਨੇ ਕਿਹਾ ਕਿ ਫੀਡਰ ਵਿਚ ਤਕਨੀਕੀ ਨੁਕਸ ਪੈਣ ਕਾਰਨ ਸਮੱਸਿਆ ਹੈ। ਉਨ੍ਹਾਂ ਫੀਡਰ ਇੰਚਾਰਜ ਵੱਲੋਂ ਫੋਨ ਬੰਦ ਕਰਨ ਉੱਤੇ ਕਿਹਾ ਕਿ ਨੁਕਸ ਕਾਰਨ ਸਿਮ ਨੂੰ ਬਦਲਣ ਲਈ ਭੇਜਿਆ ਗਿਆ।