ਘਨੌਰੀ ਕਲਾਂ ਬੈਂਕ ’ਚ ਮੈਨੇਜਰ ਦੀ ਖਾਲੀ ਆਸਾਮੀ ਤੋਂ ਲੋਕ ਪ੍ਰੇਸ਼ਾਨ

ਬੀਰਬਲ ਰਿਸ਼ੀ
ਸ਼ੇਰਪੁਰ, 12 ਸਤੰਬਰ
ਸਟੇਟ ਬੈਂਕ ਆਫ ਇੰਡੀਆ ਬ੍ਰਾਂਚ ਘਨੌਰੀ ਕਲਾਂ ਵਿੱਚ ਪਿਛਲੇ ਕੁੱਝ ਮਹੀਨਿਆਂ ਤੋਂ ਮੈਨੇਜਰ ਦੀ ਪੱਕੀ ਆਸਾਮੀ ਨਾ ਹੋਣ ਕਾਰਨ ਲੋਕ ਬੁਰੀ ਤਰ੍ਹਾਂ ਖੱਜਲ-ਖੁਆਰ ਹੋਣ ਲਈ ਮਜਬੂਰ ਹਨ। ਜਾਣਕਾਰੀ ਅਨੁਸਾਰ ਐੱਸਬੀਆਈ ਘਨੌਰੀ ਕਲਾਂ ਬ੍ਰਾਂਚ ਵਿੱਚ ਨਾਲ ਲੱਗਦੇ ਪਿੰਡ ਬਾਦਸ਼ਾਹਪੁਰ, ਘਨੌਰੀ ਖੁਰਦ, ਸਲੇਮਪੁਰ, ਚਾਂਗਲੀ, ਘਨੌਰ ਕਲਾਂ, ਘਨੌਰ ਖੁਰਦ ਦੇ ਤਕਰੀਬਨ ਅੱਧੀ ਦਰਜਨ ਪਿੰਡਾਂ ਦਾ ਕੇਂਦਰ ਬਿੰਦੂ ਹੈ ਅਤੇ ਖਪਤਕਾਰਾਂ ਦੀ ਗਿਣਤੀ ਕਈ ਹਜ਼ਾਰਾਂ ਵਿੱਚ ਹੈ ਪਰ ਪਿਛਲੇ ਕਈ ਮਹੀਨਿਆਂ ਤੋਂ ਪੱਕਾ ਮੈਨੇਜਰ ਨਾ ਹੋਣ ਕਾਰਨ ਲੋਕਾਂ ਨੂੰ ਆਪਣੇ ਕੰਮ ਕਰਵਾਉਣ ਲਈ ਕਈ-ਕਈ ਗੇੜੇ ਮਾਰਨੇ ਪੈ ਰਹੇ ਹਨ। ਪਿੰਡ ਬਾਦਸ਼ਾਹਪੁਰ ਦੇ ਸਾਬਕਾ ਸਰਪੰਚ ਰਾਮਸਰੂਪ ਸਿੰਘ ਨੇ ਦੱਸਿਆ ਕਿ ਉਸ ਦੇ ਪੁੱਤਰ ਮਨਦੀਪ ਸਿੰਘ ਨੇ ਬ੍ਰਾਂਚ ਵਿੱਚੋਂ ਕਰਜ਼ਾ ਲਿਆ ਸੀ ਜੋ ਕਈ ਮਹੀਨੇ ਪਹਿਲਾਂ ਭਰ ਦਿੱਤਾ ਪਰ ਹੁਣ ਉਹ ਸਬਸਿਡੀ ਦੀ ਰਾਸ਼ੀ ਲਈ ਦੋ ਮਹੀਨਿਆਂ ਤੋਂ ਗੇੜੇ ਲਗਾ ਰਹੇ ਹਨ। ਕਿਰਤੀ ਕਿਸਾਨ ਯੂਨੀਅਨ ਦੇ ਜ਼ਿਲ੍ਹਾ ਪ੍ਰਧਾਨ ਜਰਨੈਲ ਸਿੰਘ ਜਹਾਂਗੀਰ ਨੇ ਉੱਚ ਅਧਿਕਾਰੀਆਂ ਤੋਂ ਤੁਰੰਤ ਪੱਕਾ ਮੈਨੇਜਰ ਭੇਜਣ ਦੀ ਮੰਗ ਕੀਤੀ। ਐੱਸਬੀਆਈ ਬ੍ਰਾਂਚ ਮੌਜੂਦਾ ਮੈਨੇਜਰ ਨੇ ਕਿਹਾ ਕਿ ਉਸ ਕੋਲ ਮੂਲੋਵਾਲ ਬੈਂਕ ਦੀ ਆਈਡੀ ਹੈ ਅਤੇ ਘਨੌਰੀ ਕਲਾਂ ਦੀ ਆਈਡੀ ਨਾ ਹੋਣ ਕਰਕੇ ਉਨ੍ਹਾਂ ਕੋਲ ਇਨ੍ਹਾਂ ਸਮੱਸਿਆਵਾਂ ਦਾ ਹੱਲ ਨਹੀ।

ਬਣਦੀ ਕਾਰਵਾਈ ਦਾ ਭਰੋਸਾ

ਐੱਸਬੀਆਈ ਦੇ ਰੀਜ਼ਨਲ ਮੈਨੇਜਰ ਨੇ ਸਪੱਸ਼ਟ ਕਿਹਾ ਕਿ ਜਿਹੜੇ ਵੀ ਮੈਨੇਜਰ ਨੂੰ ਕਿਸੇ ਬੈਂਕ ਵਿੱਚ ਲਗਾਇਆ ਗਿਆ ਹੈ ਉੱਥੇ ਉਸ ਨੂੰ ਕੰਮ ਕਰਨ ਲਈ ਹੀ ਲਗਾਇਆ ਹੈ ਅਤੇ ਇਸ ਮਾਮਲੇ ’ਤੇ ਉਹ ਬਣਦੀ ਕਾਰਵਾਈ ਕਰਨਗੇ ਅਤੇ ਬੈਂਕ ਨਾਲ ਜੁੜੇ ਲੋਕਾਂ ਨੂੰ ਕੋਈ ਪ੍ਰੇਸ਼ਾਨੀ ਨਹੀਂ ਆਉਣ ਦਿੱਤੀ ਜਾਵੇਗੀ।