ਪੰਡੋਰੀ ਸਿੱਧਵਾਂ ਵਸਨੀਕ ਕੋਲੋਂ ਪੰਜਾਹ ਲੱਖ ਦੀ ਫਿਰੌਤੀ ਮੰਗੀ

ਪੱਤਰ ਪ੍ਰੇਰਕ
ਤਰਨ ਤਾਰਨ, 7 ਮਈ
ਪਿੰਡ ਪੰਡੋਰੀ ਸਿੱਧਵਾਂ (ਥਾਣਾ ਝਬਾਲ) ਦੇ ਵਸਨੀਕ ਮਨਰਾਜ ਸਿੰਘ ਮੰਨੂ ਤੋਂ ਗੈਂਗਸਟਰ ਜੁਗਰਾਜ ਸਿੰਘ ਵਾਸੀ ਜਵੰਦਾ ਅਤੇ ਤਸਵੀਰ ਸਿੰਘ ਸੱਤਾ ਵਾਸੀ ਨੌਸ਼ਹਿਰਾ ਪੰਨੂਆਂ ਨੇ 50 ਲੱਖ ਰੁਪਏ ਦੀ ਫ਼ਿਰੌਤੀ ਮੰਗੀ ਹੈ। ਸਥਾਨਕ ਥਾਣਾ ਸਿਟੀ ਦੀ ਪੁਲੀਸ ਕੋਲ ਸ਼ਿਕਾਇਤ ਦਰਜ ਕਰਵਾਉਂਦਿਆਂ ਮਨਰਾਜ ਸਿੰਘ ਨੇ ਦੱਸਿਆ ਕਿ ਕੱਲ੍ਹ ਉਸ ਦੇ ਮੋਬਾਈਲ ’ਤੇ ਖੁਦ ਨੂੰ ਤਸਵੀਰ ਸਿੰਘ ਦੱਸਣ ਵਾਲੇ ਵਿਅਕਤੀ ਨੇ ਕਿਹਾ ਕਿ 50 ਲੱਖ ਨਾ ਦੇਣ ’ਤੇ ਉਹ ਉਸ ਨੂੰ ਇਕ ਕਰੋੜ ਰੁਪਏ ਦੇਣ ਲਈ ਕਹਿਣਗੇ ਅਤੇ ਨਾ ਦੇਣ ’ਤੇ ਉਸ ਦਾ ਹਸ਼ਰ ਗੁਰਜੰਟ ਸਿੰਘ ਵਾਸੀ ਰਸੂਲਪੁਰ ਵਰਗਾ ਕਰਨਗੇ| ਜ਼ਿਕਰਯੋਗ ਹੈ ਕਿ ਗੁਰਜੰਟ ਸਿੰਘ ਨੂੰ ਤਿੰਨ ਸਾਲ ਪਹਿਲਾਂ ਉਸ ਦੀ ਦੁਕਾਨ ’ਤੇ ਗੋਲੀਆਂ ਮਾਰ ਦਿੱਤੀਆਂ ਸਨ। ਉਸ ਨੇ ਆਪਣੇ ਖੁਦ ਨੂੰ ਗੈਂਗਸਟਰ ਜੁਗਰਾਜ ਸਿੰਘ ਜਵੰਦਾ ਦਾ ਸਾਥੀ ਵੀ ਕਿਹਾ| ਸਥਾਨਕ ਥਾਣਾ ਸਿਟੀ ਦੀ ਪੁਲੀਸ ਨੇ ਇਸ ਸਬੰਧੀ ਕੇਸ ਦਰਜ ਕਰ ਲਿਆ ਹੈ।