ਫਿਰਨੀ ਦੇ ਨਿਰਮਾਣ ਸਬੰਧੀ ਝਗੜੇ ’ਚ ਇੱਕ ਦੀ ਮੌਤ

ਪੱਤਰ ਪ੍ਰੇਰਕ
ਕਾਲਾਂਵਾਲੀ, 2 ਜਨਵਰੀ
ਖੇਤਰ ਦੇ ਪਿੰਡ ਤਖਤਮੱਲ ਵਿੱਚ ਬੀਤੀ ਦੇਰ ਸ਼ਾਮ ਪਿੰਡ ਵਿੱਚ ਬਣ ਰਹੀ ਫਿਰਨੀ ਨੂੰ ਲੈ ਕੇ ਦੋ ਧਿਰਾਂ ਵਿੱਚ ਲੜਾਈ ਹੋ ਗਈ ਜਿਸ ਕਾਰਨ ਇੱਕ ਧਿਰ ਦੇ ਲੋਕਾਂ ਨੇ ਡਾਂਗਾਂ ਨਾਲ ਹਮਲਾ ਕਰਕੇ ਦੂਜੀ ਧਿਰ ਦੇ ਇੱਕ ਵਿਅਕਤੀ ਨੂੰ ਜ਼ਖ਼ਮੀ ਕਰ ਦਿੱਤਾ, ਜਿਸ ਦੀ ਹਸਪਤਾਲ ਵਿੱਚ ਇਲਾਜ ਦੌਰਾਨ ਮੌਤ ਹੋ ਗਈ। ਇਸ ਘਟਨਾ ਦਾ ਪਤਾ ਲੱਗਦੇ ਹੀ ਮੌਕੇ ’ਤੇ ਪੁੱਜੀ ਕਾਲਾਂਵਾਲੀ ਪੁਲੀਸ ਨੇ ਮ੍ਰਿਤਕ ਦੀ ਪਛਾਣ ਬਲਕਰਨ ਸਿੰਘ (50) ਵਜੋਂ ਕੀਤੀ ਹੈ। ਪਿੰਡ ਵਾਸੀਆਂ ਅਨੁਸਾਰ ਫਿਰਨੀ ਦੀ ਉਸਾਰੀ ਸਬੰਧੀ ਗਰਾਮ ਪੰਚਾਇਤ ਵੱਲੋਂ ਦੋ-ਤਿੰਨ ਦਿਨ ਪਹਿਲਾਂ ਹੀ ਪੈਮਾਇਸ਼ ਕਰਵਾਈ ਗਈ ਸੀ। ਇਸ ਫਿਰਨੀ ਦੇ ਲੈਵਲ ਨੂੰ ਲੈ ਕੇ ਬਲਕਰਨ ਸਿੰਘ ਅਤੇ ਉਸ ਦੇ ਗੁਆਂਢੀ ਕੁਲਵੰਤ ਸਿੰਘ ਨਾਲ ਲੜਾਈ ਹੋ ਗਈ ਜਿਸ ਵਿੱਚ ਕੁਲਵੰਤ ਸਿੰਘ, ਉਸ ਦੇ ਦੋ ਲੜਕਿਆਂ ਅਤੇ ਇਕ ਹੋਰ ਨੇ ਬਲਕਰਨ ਸਿੰਘ ’ਤੇ ਡੰਡਿਆਂ ਨਾਲ ਹਮਲਾ ਕਰ ਦਿੱਤਾ, ਜਿਸ ਕਾਰਨ ਉਹ ਜ਼ਖਮੀ ਹੋ ਗਿਆ, ਜਿਸ ੀਦ ਬਾਅਦ ’ਚ ਮੌਤ ਹੋ ਗਈ।