ਨਾਂਦੇੜ: ਵਾਹਨ ਨਹਿਰ ’ਚ ਡਿਗੀ, ਪਰਿਵਾਰ ਦੇ ਪੰਜ ਜੀਅ ਹਲਾਕ, ਛੇ ਜ਼ਖ਼ਮੀ

ਨਾਂਦੇੜ, 9 ਫਰਵਰੀ

ਮਹਾਰਾਸ਼ਟਰ ਵਿੱਚ ਨਾਂਦੇੜ ਜ਼ਿਲ੍ਹੇ ਦੇ ਮੋਗ਼ਲੀ ਪਿੰਡ ਨੇੜੇ ਅੱਜ ਤੜਕੇ ਵਾਹਨ ਨਹਿਰ ਵਿੱਚ ਡਿੱਗ ਗਿਆ। ਇਸ ਵਿੱਚ ਸਵਾਰ ਇੱਕ ਪਰਿਵਾਰ ਦੇ ਪੰਜ ਮੈਂਬਰਾਂ ਦੀ ਮੌਤ ਹੋ ਗਈ, ਜਦੋਂਕਿ ਛੇ ਹੋਰ ਜ਼ਖ਼ਮੀ ਹੋ ਗਏ। ਨਾਂਦੇੜ ਪੁਲੀਸ ਕੰਟਰੋਲ ਦੇ ਇੱਕ ਅਧਿਕਾਰੀ ਨੇ ਦੱਸਿਆ ਕਿ ਇਹ ਪਰਿਵਾਰ ਆਪਣੇ ਇੱਕ ਰਿਸ਼ਤੇਦਾਰ ਦੀ ਲੜਕੀ ਦਾ ਜਨਮਦਿਨ ਮਨਾ ਕੇ ਸਕਾਰਪੀਓ ਐੱਸਯੂਵੀ ਰਾਹੀਂ ਭੋਖਰ ਤੋਂ ਨਿਜ਼ਾਮਾਬਾਦ ਦੇ ਵਾਨੈੱਲ ਵੱਲ ਪਰਤ ਰਿਹਾ ਸੀ। ਇਸ ਦੌਰਾਨ ਐੱਸਯੂਵੀ ਵਾਹਨ ਨਹਿਰ ’ਤੇ ਬਣੇ ਪੁਲ ਤੋਂ ਹੇਠਾਂ ਡਿੱਗ ਗਈ। ਮ੍ਰਿਤਕਾਂ ਦੀ ਪਛਾਣ ਸਵਿਤਾ ਸ਼ਿਆਮ ਭਾਲੇਰਾਓ (25), ਰੇਖਾ ਪ੍ਰਮੇਸ਼ਵਰ ਭਾਲੇਰਾਓ (30), ਅਨਜਾਨਾ ਡੀ. ਭਾਲੇਰਾਓ (31), ਪ੍ਰੀਤੀ ਪ੍ਰਮੇਸ਼ਵਰ ਭਾਲੇਰਾਓ (ਅੱਠ) ਅਤੇ ਸੁਸ਼ੀਲ ਮਰੋਤੀ ਗਾਇਕਵਾੜ (ਸੱਤ) ਵਜੋਂ ਹੋਈ ਹੈ। ਇਹ ਸਾਰੇ ਨਾਂਦੇੜ ਜ਼ਿਲ੍ਹੇ ਵਿੱਚ ਭੋਖਰ ਦੇ ਰੈਣਾਪੁਰ ਪਿੰਡ ਦੇ ਵਸਨੀਕ ਸਨ। ਉਹ ਆਪਣੀ ਕਰਮਭੂਮੀ ਤਿਲੰਗਾਨਾ ਜਾ ਰਹੇ ਸਨ।