ਹਿੰਦ ਮਹਾਸਾਗਰ ਖੇਤਰ ਵਿੱਚ ਭਾਰਤ ਦਾ ਅਹਿਮ ਭਾਈਵਾਲ ਹੈ ਮਾਲਦੀਵ: ਜੈਸ਼ੰਕਰ

ਮਾਲੇ, 11 ਅਗਸਤ
ਵਿਦੇਸ਼ ਮੰਤਰੀ ਐੱਸ. ਜੈਸ਼ੰਕਰ ਨੇ ਅੱਜ ਕਿਹਾ ਕਿ ਮਾਲਦੀਵ ਹਿੰਦ ਮਹਾਸਾਗਰ ਖੇਤਰ ਵਿੱਚ ਭਾਰਤ ਦਾ ਅਹਿਮ ਭਾਈਵਾਲ ਹੈ ਅਤੇ ਦੋਵੇਂ ਦੇਸ਼ ਆਪਣੇ ਸਹਿਯੋਗ ਨੂੰ ਆਧੁਨਿਕ ਭਾਈਵਾਲੀ ਵਿੱਚ ਬਦਲਣ ਦੇ ਇੱਛੁਕ ਹਨ।
ਜੈਸ਼ੰਕਰ ਅੱਡੂ ਰਿਕਲੇਮੇਸ਼ਨ ਅਤੇ ਤੱਟ ਰੱਖਿਆ ਪ੍ਰਾਜੈਕਟ ਸੌਂਪਣ ਸਬੰਧੀ ਸਮਾਰੋਹ ਅਤੇ ਐਗਜ਼ਿਮ ਬੈਂਕ ਦੀ ਕਰਜ਼ ਸਹਾਇਤਾ ਤਹਿਤ ਭਾਰਤ ਸਰਕਾਰ ਦੀ ਮਦਦ ਨਾਲ ਉਸਾਰੇ 4-ਲੇਨ ਡੇਟੋਰ ਲਿੰਕ ਸੜਕ ਪ੍ਰਾਜੈਕਟ ਦੇ ਉਦਘਾਟਨ ਮੌਕੇ ਸੰਬੋਧਨ ਕਰ ਰਹੇ ਸਨ। ਇਸ ਮੌਕੇ ਮਾਲਦੀਵ ਦੇ ਵਿਦੇਸ਼ ਮੰਤਰੀ ਮੂਸਾ ਜ਼ਮੀਰ ਵੀ ਮੌਜੂਦ ਸਨ।
ਜੈਸ਼ੰਕਰ ਨੇ ਕਿਹਾ, ‘‘ਮਾਲਦੀਵ ਸਾਡੇ ਲਈ ਹਿੰਦ ਮਹਾਸਾਗਰ ਖੇਤਰ ਵਿੱਚ ਇੱਕ ਅਹਿਮ ਭਾਈਵਾਲ ਹੈ। ਇਹ ‘ਗੁਆਂਢੀ ਪਹਿਲਾਂ’ ਦੀ ਸਾਡੀ ਨੀਤੀ ਦਾ ਕੇਂਦਰੀ ਹਿੱਸਾ ਹੈ। ਅਤੇ ਇਸ ਲਈ ਇਹ ਬਹੁਤ ਹੀ ਸੁਭਾਵਿਕ ਹੈ ਕਿ ਸਾਡੇ ਦੋਵਾਂ ਦੇਸ਼ਾਂ ਦਰਮਿਆਨ ਸਹਿਯੋਗ ਰਵਾਇਤੀ ਭੂਮਿਕਾ ਤੋਂ ਅੱਗੇ ਵਧ ਗਿਆ ਹੈ। ਅਤੇ ਅੱਜ ਹਕੀਕਤ ਵਿੱਚ ਆਧੁਨਿਕ ਭਾਈਵਾਲ ਬਣਨ ਦੀ ਇੱਛਾ ਸ਼ਕਤੀ ਰੱਖਦਾ ਹੈ।’’ ਉਨ੍ਹਾਂ ਕਿਹਾ, ‘‘ਵਿਕਾਸ ਦੇ ਖੇਤਰ ਵਿੱਚ ਸਾਡੇ ਸਹਿਯੋਗ ਦਾ ਮਕਸਦ ਲੋਕਾਂ ਦੇ ਜੀਵਨ ਦੇ ਸਾਰੇ ਪਹਿਲੂਆਂ ਨੂੰ ਛੂਹਣਾ ਅਤੇ ਉਨ੍ਹਾਂ ਦੇ ਜੀਵਨ ਵਿੱਚ ਇਸ ਦੇ ਠੋਸ ਫ਼ਾਇਦੇ ਬਾਰੇ ਤਰੀਕੇ ਖੋਜਣਾ ਹੈ।’’ ਜੈਸ਼ੰਕਰ ਨੇ ਕਿਹਾ ਕਿ ਪਿਛਲੇ ਕੁੱਝ ਸਾਲਾਂ ਵਿੱਚ ਭਾਰਤ ਨੇ ਮਾਲਦੀਵ ਵਿੱਚ ਲਗਪਗ 22 ਕਰੋੜ ਅਮਰੀਕੀ ਡਾਲਰ ਦਾ ਨਿਵੇਸ਼ ਕੀਤਾ ਹੈ ਜੋ ਇਸ ਗੱਲ ਦਾ ਸਪਸ਼ਟ ਸੰਕੇਤ ਹੈ ਕਿ ਭਾਰਤ ਮਾਲਦੀਵ ਵਿੱਚ ਖੇਤਰੀ ਵਿਕਾਸ ਨੂੰ ਕਿੰਨੀ ਅਹਿਮੀਅਤ ਦਿੰਦਾ ਹੈ। ਵਿਦੇਸ਼ ਮੰਤਰੀ ਨੇ ਕਿਹਾ, ‘‘ਅੱਜ ਅਸੀਂ ਹੋਰ ਦੇਸ਼ਾਂ ਤੋਂ ਇਲਾਵਾ ਸਭ ਤੋਂ ਵੱਡੇ ਵਪਾਰਕ ਭਾਈਵਾਲਾਂ ਵਿੱਚੋਂ ਇੱਕ ਹਾਂ। ਅਸੀਂ ਭਾਰਤ ਤੋਂ ਮਾਲਦੀਵ ਵਿੱਚ ਹੋਰ ਨਿਵੇਸ਼ ਵੀ ਦੇਖ ਰਹੇ ਹਾਂ, ਖਾਸਕਰ ਸੈਰ-ਸਪਾਟਾ ਖੇਤਰ ਵਿੱਚ।’’ -ਪੀਟੀਆਈ

ਵਿਰੋਧੀ ਧਿਰ ਵੱਲੋਂ ਮੁਇਜ਼ੂ ਸਰਕਾਰ ਦੇ ਭਾਰਤ ਪ੍ਰਤੀ ਬਦਲੇ ਰੁਖ਼ ਦੀ ਪ੍ਰਸ਼ੰਸਾ

ਮਾਲੇ: ਮਾਲਦੀਵ ਦੀ ਮੁੱਖ ਵਿਰੋਧੀ ਧਿਰ ਮਾਲਦੀਵੀਅਨ ਡੈਮੋਕ੍ਰੈਟਿਕ ਪਾਰਟੀ (ਏਐਮਡੀ) ਨੇ ਰਾਸ਼ਟਰਪਤੀ ਮੁਹੰਮਦ ਮੁਇਜ਼ੂ ਦੀ ਅਗਵਾਈ ਵਾਲੀ ਸਰਕਾਰ ਦੀ ਭਾਰਤ ਨੀਤੀ ਪ੍ਰਤੀ ‘ਅਚਾਨਕ ਆਈ ਤਬਦੀਲੀ’ ਦਾ ਸਵਾਗਤ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਮਾਲੇ ਇਸ ਗੱਲ ਨੂੰ ਲੈ ਕੇ ਹਮੇਸ਼ਾ ਆਸਵੰਦ ਰਿਹਾ ਹੈ ਕਿ ਦੇਸ਼ ’ਤੇ ਜਦੋਂ ਵੀ ਸੰਕਟ ਆਵੇਗਾ ਅਤੇ ਉਹ ਮਦਦ ਲਈ ਕਹੇਗਾ ਤਾਂ ਨਵੀਂ ਦਿੱਲੀ ਵੱਲੋਂ ਸਭ ਤੋਂ ਪਹਿਲਾਂ ਸਹਾਇਤਾ ਕੀਤੀ ਜਾਵੇਗੀ। ਐੱਮਡੀਪੀ ਦੇ ਪ੍ਰਧਾਨ ਅਬਦੁੱਲਾ ਸ਼ਾਹਿਦ ਨੇ ਸ਼ਨਿਚਰਵਾਰ ਨੂੰ ਇੱਥੇ ਭਾਰਤ ਦੇ ਵਿਦੇਸ਼ ਮੰਤਰੀ ਐੱਸ. ਜੈਸ਼ੰਕਰ ਨਾਲ ਮੁਲਾਕਾਤ ਮਗਰੋਂ ਇਹ ਗੱਲ ਆਖੀ। -ਪੀਟੀਆਈ