ਸੱਸ ਦੀ ਹੱਤਿਆ ਕਰਨ ਵਾਲੀ ਨੂੰਹ ਨੂੰ ਉਮਰ ਕੈਦ

ਕੋਲਮ (ਕੇਰਲ):

ਕੇਰਲ ਦੀ ਅਦਾਲਤ ਨੇ ਸੱਸ ਦੀ ਹੱਤਿਆ ਦੇ ਮਾਮਲੇ ਵਿੱਚ ਉਸ ਦੀ 45 ਸਾਲਾ ਨੂੰਹ ਨੂੰ ਉਮਰ ਕੈਦ ਦੀ ਸਜ਼ਾ ਸੁਣਾਈ ਹੈ| ਔਰਤ ਨੇ ਇੱਥੇ ਪੁਥੂਰ ਸਥਿਤ ਘਰ ਵਿੱਚ ਸੁੱਤੀ ਪਈ ਆਪਣੀ ਸੱਸ ਦਾ ਸਿਰ ’ਤੇ ਪੱਥਰ ਮਾਰ ਕੇ ਕਤਲ ਕਰ ਦਿੱਤਾ ਸੀ। ਸਰਕਾਰੀ ਵਕੀਲ ਸਿਸਿਨ ਜੀ ਮੁੰਦੱਕਲ ਨੇ ਦੱਸਿਆ ਕਿ ਕੋਲਮ ਦੇ ਪਹਿਲੇ ਵਧੀਕ ਜ਼ਿਲ੍ਹਾ ਤੇ ਸੈਸ਼ਨ ਜੱਜ ਪੀਐੱਨ ਵਿਨੋਦ ਨੇ ਗਿਰਿਤਾ ਕੁਮਾਰੀ ਨੂੰ ਸਜ਼ਾ ਸੁਣਾਈ, ਜੋ ਪੀੜਤਾ ਦੇ ਛੋਟੇ ਪੁੱਤਰ ਦੀ ਪਤਨੀ ਸੀ। ਇਸਤਗਾਸਾ ਪੱਖ ਅਨੁਸਾਰ, ਨੂੰਹ ਨੇ ਇਸ ਜੁਰਮ ਨੂੰ ਅੰਜਾਮ ਦਿੱਤਾ ਕਿਉਂਕਿ ਪੀੜਤਾ ਨੇ ਉਸਨੂੰ ਗੁਆਂਢੀ ਨਾਲ ਨਾਜਾਇਜ਼ ਸਬੰਧ ਰੱਖਣ ਕਾਰਨ ਝਿੜਕ ਦਿੱਤਾ ਸੀ। ਉਨ੍ਹਾਂ ਦੱਸਿਆ ਕਿ 11 ਦਸੰਬਰ 2019 ਨੂੰ ਜਦੋਂ ਉਸ ਦੀ ਸੱਸ ਦੁਪਹਿਰ ਸਮੇਂ ਕਮਰੇ ਵਿੱਚ ਸੌਂ ਰਹੀ ਸੀ ਤਾਂ ਗਿਰਿਤਾ ਨੇ ਉਸ ਦੇ ਸਿਰ ’ਤੇ ਪੱਥਰ ਨਾਲ ਹਮਲਾ ਕਰ ਦਿੱਤਾ। ਪੀੜਤਾ ਦੀ ਮਗਰੋਂ ਹਸਪਤਾਲ ਵਿੱਚ ਮੌਤ ਹੋ ਗਈ। -ਪੀਟੀਆਈ