ਜੇਆਈਟੀ ਚੇਅਰਮੈਨ ਖ਼ਪਤਕਾਰ ਕਮਿਸ਼ਨ ਅੱਗੇ ਪੇਸ਼

ਹਤਿੰਦਰ ਮਹਿਤਾ
ਜਲੰਧਰ, 23 ਅਕਤੂਬਰ
ਜਲੰਧਰ ਇੰਪਰੂਵਮੈਂਟ ਟਰੱਸਟ (ਜੇਆਈਟੀ) ਦੇ ਚੇਅਰਮੈਨ ਜਗਤਾਰ ਸਿੰਘ ਸੰਘੇੜਾ ਅੱਜ ਲਾਡੋਵਾਲੀ ਰੋਡ ਸਥਿਤ ਜ਼ਿਲ੍ਹਾ ਖ਼ਪਤਕਾਰ ਝਗੜਾ ਨਿਵਾਰਨ ਕਮਿਸ਼ਨ ਅੱਗੇ ਪੇਸ਼ ਹੋਏ। ਕਮਿਸ਼ਨ ਨੇ ਉਨ੍ਹਾਂ ਅਤੇ ਟਰੱਸਟ ਦੇ ਕਾਰਜਕਾਰੀ ਅਧਿਕਾਰੀ ਜਤਿੰਦਰ ਸਿੰਘ ਖ਼ਿਲਾਫ਼ ਗ਼ੈਰ-ਜ਼ਮਾਨਤੀ ਵਾਰੰਟ ਜਾਰੀ ਕੀਤੇ ਸਨ। ਇਹ ਵਾਰੰਟ ਤਿੰਨ ਰਿਹਾਇਸ਼ੀ ਸਕੀਮਾਂ ਨਾਲ ਸਬੰਧਤ 128 ਮਾਮਲਿਆਂ ਵਿੱਚ ਭੁਗਤਾਨ ਵਾਪਸ ਕਰਨ ਲਈ ਕਮਿਸ਼ਨ ਦੇ ਆਦੇਸ਼ਾਂ ਦੀ ਪਾਲਣਾ ਕਰਨ ਵਿੱਚ ਅਸਫਲ ਰਹਿਣ ਲਈ ਜਾਰੀ ਕੀਤੇ ਗਏ ਸਨ। ਵਿਚਾਰ ਅਧੀਨ ਸਕੀਮਾਂ-ਇੰਦਰਾ ਪੁਰਮ ਮਾਸਟਰ ਗੁਰਬੰਤਾ ਸਿੰਘ ਐਨਕਲੇਵ (2006), ਬੀਬੀ ਭਾਨੀ ਕੰਪਲੈਕਸ (2010) ਅਤੇ ਸੂਰਿਆ ਐਨਕਲੇਵ ਐਕਸਟੈਨਸ਼ਨ (2011 ਵਿੱਚ ਅਤੇ ਫਿਰ 2016 ਵਿੱਚ ਸ਼ੁਰੂ ਕੀਤੀ ਗਈ)- ਸੈਂਕੜੇ ਖ਼ਪਤਕਾਰਾਂ ਦੀਆਂ ਸ਼ਿਕਾਇਤਾਂ ਦਾ ਵਿਸ਼ਾ ਰਹੀਆਂ ਹਨ।
ਸੂਤਰਾਂ ਦੇ ਅਨੁਸਾਰ, 2021 ਤੋਂ, ਜ਼ਿਲ੍ਹਾ, ਰਾਜ ਅਤੇ ਰਾਸ਼ਟਰੀ ਖਪਤਕਾਰ ਕਮਿਸ਼ਨਾਂ ਦੁਆਰਾ ਅਲਾਟੀਆਂ ਦੇ ਹੱਕ ਵਿੱਚ ਲਗਭਗ 400 ਫੈਸਲੇ ਦਿੱਤੇ ਗਏ ਹਨ। ਜੇਆਈਟੀ ਨੇ ਅਜੇ 128 ਮਾਮਲਿਆਂ ਵਿੱਚ ਹੁਕਮਾਂ ਨੂੰ ਪੂਰਾ ਕਰਨਾ ਹੈ। ਸੂਤਰਾਂ ਤੋਂ ਪਤਾ ਲੱਗਾ ਹੈ ਕਿ ਪਿਛਲੇ ਸਾਲ ਬਕਾਇਆ ਰਕਮ ਸਿਰਫ਼ 14 ਕਰੋੜ ਰੁਪਏ ਸੀ, ਪਰ ਜੇਆਈਟੀ ਦੇ ਚੱਲ ਰਹੇ ਗੈਰ-ਅਨੁਪਾਲਨ, ਵਿਆਜ ਕਾਰਨ ਪਿਛਲੇ ਮਹੀਨਿਆਂ ਵਿੱਚ ਕੁੱਲ ਰਕਮ 45 ਕਰੋੜ ਰੁਪਏ ਹੋ ਗਈ ਹੈ।
ਇਸ ਤੋਂ ਇਲਾਵਾ, ਪਿਛਲੇ ਕੁਝ ਸਾਲਾਂ ਵਿੱਚ, ਕਮਿਸ਼ਨ ਦੇ ਆਦੇਸ਼ਾਂ ਦੀ ਪਾਲਣਾ ਕਰਨ ’ਚ ਅਸਫਲ ਰਹਿਣ ਲਈ ਜੇਆਈਟੀ ਅਧਿਕਾਰੀਆਂ ਖ਼ਿਲਾਫ਼ ਗ੍ਰਿਫ਼ਤਾਰੀ ਵਾਰੰਟ ਜਾਰੀ ਕੀਤੇ ਹਨ। ਇਸ ਦੌਰਾਨ ਸ੍ਰੀ ਸੰਘੇੜਾ ਨੇ ਅਣਗਹਿਲੀ ਦੀ ਗੱਲ ਮੰਨੀ। ਉਨ੍ਹਾਂ ਕਿਹਾ ਕਿ ਰਿਫੰਡ ਲਈ ਫੰਡਾਂ ਦਾ ਪ੍ਰਬੰਧ ਕਰਨ ਲਈ ਯਤਨ ਜਾਰੀ ਹਨ। ਉਹ ਪਹਿਲਾਂ ਹੀ ਮੰਤਰੀ ਤੇ ਸੂਬਾ ਸਰਕਾਰ ਨੂੰ ਅਰਜ਼ੀ ਦੇ ਚੁੱਕੇ ਹਨ।