ਜਗਰਾਉਂ: ਨੌਜਵਾਨ ਦਾ ਕਤਲ ਕਰਨ ਵਾਲੇ ਪਿਉ-ਪੁੱਤਰ ਖ਼ਿਲਾਫ਼ ਕੇਸ ਦਰਜ

ਚਰਨਜੀਤ ਸਿੰਘ ਢਿੱਲੋਂ
ਜਗਰਾਉਂ, 23 ਅਪਰੈਲ
ਇੱਥੇ ਦਾਣਾ ਮੰਡੀ ’ਚ ਜੂਏ ਦੇ ਪੈਸਿਆਂ ਦੇ ਲੈਣ ਦੇਣ ਕਾਰਨ ਹੋਏ ਖੂਨੀ ਝਗੜੇ ’ਚ ਮਾਰੇ ਗਏ ਨੌਜਵਾਨ ਸਮਸ਼ੇਰ ਸਿੰਘ ਉਰਫ ਜੱਟ ਦੇ ਕਤਲ ਕੇਸ ’ਚ ਉਸ ਦੇ ਨਾਲ ਹੀ ਮੰਡੀ ’ਚ ਕੰਮ ਕਰਨ ਵਾਲੇ ਪਿਉ-ਪੁੱਤਰ ਖਿਲਾਫ ਮ੍ਰਿਤਕ ਦੀ ਮਾਂ ਦੇ ਬਿਆਨਾਂ ’ਤੇ ਕੇਸ ਦਰਜ ਕੀਤਾ ਗਿਆ ਹੈ। ਜਾਣਕਾਰੀ ਅਨੁਸਾਰ ਪੁਲੀਸ ਨੇ ਮ੍ਰਿਤਕ ਦੀ ਲਾਸ਼ ਪੋਸਟਮਾਰਟਮ ਮਗਰੋਂ ਵਾਰਸਾਂ ਹਵਾਲੇ ਕਰ ਦਿੱਤੀ ਹੈ। ਮਾਮਲੇ ਦੀ ਪੜਤਾਲ ਕਰ ਰਹੇ ਸਬ-ਇੰਸਪੈਕਟਰ ਬਲਬੀਰ ਰਾਮ ਅਤੇ ਸਬ-ਇੰਸਪੈਕਟਰ ਸੁਰਜੀਤ ਸਿੰਘ ਅਨੁਸਾਰ ਮ੍ਰਿਤਕ ਦੀ ਮਾਂ ਮਨਜਿੰਦਰ ਕੌਰ ਨੇ ਦੱਸਿਆ ਕਿ ਮਰਨ ਤੋਂ ਪਹਿਲਾਂ ਵਾਲੀ ਰਾਤ ਜਦੋਂ ਉਸ ਦਾ ਪੁੱਤਰ ਸਮਸ਼ੇਰ ਘਰ ਆਇਆ ਤਾਂ ਉਸ ਨੇ ਦੱਸਿਆ ਕਿ ਪੁਰਾਣੀ ਦਾਣਾ ਮੰਡੀ ’ਚ ਉਸ ਦਾ ਲਵੀਸ਼ ਮਿਸ਼ਰਾ ਅਤੇ ਉਸ ਦੇ ਪਿਤਾ ਬਲਰਾਮ ਮਿਸ਼ਰਾ ਦੋਵੇਂ ਵਾਸੀ ਬਲਰਾਮਪੁਰ (ਗੌਂਡਾ) ਯੂਪੀ ਨਾਲ ਝਗੜਾ ਹੋ ਗਿਆ ਸੀ। ਉਨ੍ਹਾਂ ਨੂੰ ਸਮਝਾ ਕੇ ਉਥੇ ਮੌਜੂਦ ਲੋਕਾਂ ਨੇ ਆਪਣੇ ਆਪਣੇ ਘਰੇ ਭੇਜ ਦਿੱਤਾ। ਜਦੋਂ ਬੀਤੇ ਕੱਲ੍ਹ ਸਵੇਰੇ ਕਰੀਬ 8 ਵਜੇ ਸਮਸ਼ੇਰ ਸਿੰਘ ਉਰਫ ਜੱਟ ਮੰਡੀ ’ਚ ਆਪਣੇ ਕੰਮ ’ਤੇ ਗਿਆ ਤਾਂ ਰਾਤ ਵਾਲੀ ਰੰਜਿਸ਼ ਕਾਰਨ ਲਵੀਸ਼ ਅਤੇ ਬਲਰਾਮ ਨੇ ਸਮਸ਼ੇਰ ਦੀ ਕੁੱਟਮਾਰ ਸ਼ੁਰੂ ਕਰ ਦਿੱਤੀ।
ਇਸ ਦੌਰਾਨ ਗੁੱਸੇ ਵਿੱਚ ਆਏ ਬਲਰਾਮ ਮਿਸ਼ਰਾ ਨੇ ਚਾਕੂ ਨਾਲ ਸਮਸ਼ੇਰ ’ਤੇ ਵਾਰ ਕਰ ਦਿੱਤਾ ਤੇ ਜ਼ਿਆਦਾ ਖੂਨ ਵਗਣ ਕਾਰਨ ਉਸ ਦੀ ਮੌਤ ਹੋ ਗਈ। ਪੁਲੀਸ ਨੇ ਕੇਸ ਦਰਜ ਕਰਨ ਤੋਂ ਬਾਅਦ ਕਤਲ ਦੇ ਹੋਰ ਸੁਰਾਗਾਂ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ ਅਤੇ ਮ੍ਰਿਤਕ ਦੀ ਲਾਸ਼ ਦਾ ਪੋਸਟਮਾਰਟਮ ਕਰਵਾ ਕੇ ਲਾਸ਼ ਵਾਰਸਾਂ ਨੂੰ ਸੌਂਪ ਦਿੱਤੀ ਹੈ।