ਨਾਜਾਇਜ਼ ਖਣਨ: 15 ਟਰੱਕ ਤੇ 3 ਟਿੱਪਰ ਕਬਜ਼ੇ ’ਚ ਲਏ

ਫ਼ਿਰੋਜ਼ਪੁਰ: ਥਾਣਾ ਛਾਉਣੀ ਵਿੱਚ ਰੇਤਾ ਨਾਲ ਭਰਿਆ ਇੱਕ ਟਿੱਪਰ ਬੰਦ ਕਰਕੇ ਉਸ ਦੇ ਡਰਾਈਵਰ ਖ਼ਿਲਾਫ਼ ਮੁਕੱਦਮਾ ਦਰਜ ਕੀਤਾ ਗਿਆ ਹੈ। ਥਾਣਾ ਆਰਿਫ਼ ਕੇ ਪੁਲੀਸ ਨੇ ਅੱਕੂ ਵਾਲਾ ਪਿੰਡ ਦੇ ਰਾਹ ’ਤੇ ਨਾਕਾ ਲਾ ਕੇ ਜਦੋਂ ਰੇਤਾ ਨਾਲ ਭਰੇ ਟਰੱਕਾਂ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ ਤਾਂ ਕਈ ਡਰਾਈਵਰ ਗੱਡੀਆਂ ਲਾਕ ਕਰ ਕੇ ਫ਼ਰਾਰ ਹੋ ਗਏ। ਪੁਲੀਸ ਨੇ 15 ਟਰੱਕ ਤੇ ਤਿੰਨ ਟਿੱਪਰ ਆਪਣੇ ਕਬਜ਼ੇ ਵਿੱਚ ਲੈ ਲਏ। ਇਨ੍ਹਾਂ ਵਿੱਚੋਂ ਇੱਕ ਟਿੱਪਰ ਤੇ ਚਾਰ ਟਰੱਕ ਰੇਤਾ ਨਾਲ ਭਰੇ ਹੋਏ ਸਨ। ਇਸੇ ਤਰ੍ਹਾਂ ਥਾਣਾ ਸਦਰ ਪੁਲੀਸ ਨੇ ਸਰਹੱਦੀ ਇਲਾਕੇ ਵਿੱਚ ਸਤਲੁਜ ਦਰਿਆ ਵਿੱਚੋਂ ਰੇਤਾ ਕੱਢਦੇ ਕੁਝ ਟਰੈਕਟਰ ਟਰਾਲੀਆਂ ਨੂੰ ਜਦੋਂ ਕਾਬੂ ਕਰਨ ਦੀ ਕੋਸ਼ਿਸ਼ ਕੀਤੀ ਤਾਂ ਉਹ ਮੌਕੇ ਤੋਂ ਫ਼ਰਾਰ ਹੋ ਗਏ। ਪੁਲੀਸ ਨੇ ਇੱਕ ਮੁਲਜ਼ਮ ਦੀ ਪਛਾਣ ਕਰਕੇ ਕੁਝ ਅਣਪਛਾਤੇ ਮੁਲਜ਼ਮਾਂ ਖ਼ਿਲਾਫ਼ ਮੁਕੱਦਮਾ ਦਰਜ ਕਰ ਲਿਆ ਹੈ। -ਨਿੱਜੀ ਪੱਤਰ ਪ੍ਰੇਰਕ