ਬੰਦੂਕ ਖੋਹਣ ਦਾ ਮਾਮਲਾ: ਪੁਲੀਸ ਵੱਲੋਂ ਐੱਸਐੱਲਆਰ ਬਰਾਮਦ

ਬਠਿੰਡਾ : ਇੱਥੇ ਲੰਘੀ 11 ਅਗਸਤ ਨੂੰ ਥਾਣਾ ਕੈਂਟ ਦੇ ਸੰਤਰੀ ਦੀ ਰਾਈਫ਼ਲ ਖੋਹ ਕੇ ਭੱਜਣ ਦੇ ਮਾਮਲੇ ਵਿਚ ਹੁਣ ਨਵਾਂ ਮੋੜ ਆ ਗਿਆ ਹੈ। ਹਾਲਾਂਕਿ ਪੁਲੀਸ ਨੇ ਘਟਨਾ ਦੇ ਕੁੱਝ ਹੀ ਘੰਟਿਆਂ ਬਾਅਦ ਕਾਰ ’ਚ ਸਵਾਰ ਪੰਜ ਨੌਜਵਾਨਾਂ ਵਿੱਚੋਂ ਚਾਰ ਨੂੰ ਕਾਬੂ ਕਰ ਲਿਆ ਸੀ ਅਤੇ ਇਸ ਘਟਨਾ ਵਿਚ ਵਰਤੀ ਗਈ ਕਾਲੇ ਰੰਗ ਦੀ ਸਕੋਡਾ ਕਾਰ ਨੂੰ ਵੀ ਬਰਾਮਦ ਕਰ ਲਿਆ ਸੀ। ਪਲੀਸ ਵੱਲੋਂ ਕੀਤੀ ਭੱਜ ਦੌੜ ਤੋਂ ਬਾਅਦ ਪਤਾ ਲੱਗਿਆ ਕਿ ਰਾਈਫ਼ਲ ਬਸੰਤ ਵਿਹਾਰ ਵਿਚ ਰਹਿਣ ਵਾਲੇ ਅਮਰੂ ਨਾਂ ਦੇ ਨੌਜਵਾਨ ਦੇ ਹੱਥ ਲੱਗ ਗਈ ਸੀ, ਜਿਸ ਨੇ ਇਸ ਨੂੰ ਕੱਪੜੇ ਵਿਚ ਲੁਕੋ ਕੇ ਰੱਖ ਲਿਆ। ਮਗਰੋਂ ਉਸ ਨੇ ਇਸ ਰਾਈਫ਼ਲ ਦੀ ਜਾਣਕਾਰੀ ਬਾਬਾ ਫ਼ਰੀਦ ਨਗਰ ਵਿਚ ਰਹਿਣ ਵਾਲੇ ਕਾਲਾ ਨਾਂ ਦੇ ਨੌਜਵਾਨ ਨੂੰ ਦਿੱਤੀ। ਫ਼ਿਲਹਾਲ ਪੁਲੀਸ ਨੇ ਅਮਰੂ ਨੂੰ ਗ੍ਰਿਫਤਾਰ ਕਰਕੇ ਉਸ ਕੋਲੋਂ ਰਾਈਫ਼ਲ ਬਰਾਮਦ ਕਰਵਾ ਕੇ ਦੋਵਾਂ ਨੌਜਵਾਨਾਂ ਵਿਰੁਧ ਥਾਣਾ ਕੈਂਟ ਵਿਚ ਕੇਸ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। -ਪੱਤਰ ਪ੍ਰੇਰਕ