ਸਿਰ ’ਚ ਗੋਲੀ ਲੱਗਣ ਕਾਰਨ ਬੱਚੀ ਜ਼ਖ਼ਮੀ

ਗਗਨਦੀਪ ਅਰੋੜਾ
ਲੁਧਿਆਣਾ, 13 ਜਨਵਰੀ
ਇੱਥੇ ਲੋਹੜੀ ਮੌਕੇ ਨਿਊ ਮਾਧੋਪੁਰੀ ਇਲਾਕੇ ਵਿੱਚ ਆਪਣੀ ਛੱਤ ’ਤੇ ਪਤੰਗ ਉਡਦੇ ਦੇਖ ਰਹੀ 11 ਸਾਲਾ ਬੱਚੀ ਦੇ ਸਿਰ ਵਿੱਚ ਅਚਾਨਕ ਗੋਲੀ ਲੱਗ ਗਈ। ਗੋਲੀ ਲੱਗਣ ਦਾ ਪਤਾ ਉਸ ਦੀ ਮਾਂ ਨੂੰ ਉਸ ਵੇਲੇ ਚੱਲਿਆ, ਜਦੋਂ ਬੱਚੀ ਆਸ਼ਿਆਨਾ ਦੇ ਸਿਰ ਵਿੱਚੋਂ ਖੂਨ ਨਿਕਲਣ ਲੱਗਿਆ। ਉਸ ਨੂੰ ਡਾਕਟਰ ਕੋਲ ਲਿਜਾਇਆ ਗਿਆ ਜਿੱਥੇ ਡਾਕਟਰ ਨੇ ਬੱਚੀ ਦੇ ਸਿਰ ਦੇ ਉਪਰ ਹੀ ਲੱਗੀ ਗੋਲੀ ਕੱਢ ਦਿੱਤੀ ਤੇ ਬੱਚੀ ਨੂੰ ਇਲਾਜ ਲਈ ਸਿਵਲ ਹਸਪਤਾਲ ਭੇਜ ਦਿੱਤਾ। ਬੱਚੀ ਦੇ ਪਿਤਾ ਨਾਸਿਰ ਆਲਮ ਅਨੁਸਾਰ ਲੜਕੀ ਆਪਣੀ ਮਾਂ ਨਾਲ ਘਰ ਦੀ ਛੱਤ ’ਤੇ ਪਤੰਗ ਉਡਦੇ ਦੇਖਣ ਗਈ ਸੀ। ਜਦੋਂ ਉਹ ਛੱਤ ’ਤੇ ਡਿੱਗੀ ਪਤੰਗ ਨੂੰ ਚੁੱਕਣ ਲੱਗੀ ਤਾਂ ਇੱਕ ਤਿੱਖੀ ਚੀਜ਼ ਆ ਕੇ ਉਸ ਦੇ ਸਿਰ ’ਚ ਵੱਜੀ ਤੇ ਖੂਨ ਵਹਿਣ ਲੱਗਾ ਤਾਂ ਡਾਕਟਰ ਕੋਲ ਜਾ ਕੇ ਪਤਾ ਲੱਗਿਆ ਕਿ ਬੱਚੀ ਦੇ ਸਿਰ ਵਿੱਚ ਗੋਲੀ ਲੱਗੀ ਹੈ। ਏਸੀਪੀ ਦਵਿੰਦਰ ਚੌਧਰੀ ਦਾ ਕਹਿਣਾ ਹੈ ਕਿ ਪੁਲੀਸ ਟੀਮ ਨੇ ਇਲਾਕੇ ਦੀ ਤਲਾਸ਼ੀ ਲਈ ਹੈ। ਹਾਲੇ ਤੱਕ ਕੋਈ ਸੁਰਾਗ ਨਹੀਂ ਮਿਲਿਆ।