ਨਵੇਂ ਫੌਜਦਾਰੀ ਕਾਨੂੰਨਾਂ ਤਹਿਤ ਮੁਕਤਸਰ ਵਿੱਚ ਪਹਿਲਾ ਕੇਸ ਦਰਜ

ਗੁਰਸੇਵਕ ਸਿੰਘ ਪ੍ਰੀਤ
ਸ੍ਰੀ ਮੁਕਤਸਰ ਸਾਹਿਬ, 2 ਜੁਲਾਈ
ਭਾਰਤ ਸਰਕਾਰ ਵੱਲੋਂ 1 ਜੁਲਾਈ ਤੋਂ ਲਾਗੂ ਕੀਤੇ ਨਵੇਂ ਫੌਜਦਾਰੀ ਕਾਨੂੰਨਾਂ ‘ਭਾਰਤੀ ਨਿਆਂ ਸੰਹਿਤਾ’ ਤਹਿਤ ਮੁਕਤਸਰ ਪੁਲੀਸ ਵੱਲੋਂ ਪਹਿਲੀ ਐੱਫਆਈਆਰ ਦਰਜ ਕੀਤੀ ਗਈ ਹੈ। ਇਹ ਮੁਕਦਮਾ ਥਾਣਾ ਸਿਟੀ ਮੁਕਤਸਰ ਪੁਲੀਸ ਵੱਲੋਂ ਧਾਰਾ 173 ਅਧੀਨ ਸੜਕ ਦੁਰਘਟਨਾ ਦੇ ਸਬੰਧ ਵਿੱਚ ਦਰਜ ਕੀਤਾ ਗਿਆ ਹੈ। ਦੱਸਣਯੋਗ ਹੈ ਕਿ ਪਹਿਲਾਂ ਫੌਜਦਾਰੀ ਕੇਸ 1862 ਵਿੱਚ ਬਣੇ ‘ਭਾਰਤੀ ਦੰਡ ਵਿਧਾਨ’ ਤਹਿਤ ਕੰਮ ਕਰਦੇ ਸਨ ਜਦਕਿ ਹੁਣ ਇਹ ਸਾਰੇ ਮਾਮਲੇ ਨਵੇਂ ਕਾਨੂੰਨ ‘ਭਾਰਤੀ ਨਿਆਂ ਸੰਹਿਤਾ’ ਅਧੀਨ ਵਿਚਾਰੇ ਜਾਣਗੇ। ਜਾਣਕਾਰੀ ਅਨੁਸਾਰ ਮੁਕਤਸਰ ਪੁਲੀਸ ਵੱਲੋਂ ਥਾਣਾ ਸਿਟੀ ਵਿਖੇ ਦਰਜ ਕੀਤਾ ਮੁਕੱਦਮਾ ਸੜਕ ਉਪਰ ਜਾ ਰਹੇ ਇਕ ਸਾਈਕਲ ਸਵਾਰ ਨੂੰ ਪਹਿਲਾਂ ਛੋਟੇ ਹਾਥੀ ਵੱਲੋਂ ਟੱਕਰ ਮਾਰ ਕੇ ਸੁੱਟਣ ਅਤੇ ਫਿਰ ਡਿੱਗੇ ਪਏ ਸਾਈਕਲ ਸਵਾਰ ਉਪਰੋਂ ਦੀ ਥਾਰ ਗੱਡੀ ਲੰਘਣ ਨਾਲ ਸਬੰਧਤ ਹੈ। ਪੀੜਤ ਕਮਲੇਸ਼ ਫੁੱਲਾਂ ਦੀ ਡੈਕੋਰੇਸ਼ਨ ਦਾ ਕੰਮ ਕਰਦਾ ਸੀ ਤੇ ਆਮ ਵਾਂਗ ਦੁਪਹਿਰ ਸਮੇਂ ਆਪਣੇ ਸਾਈਕਲ ਉਪਰ ਘਰ ਨੂੰ ਜਾ ਰਿਹਾ ਸੀ ਕਿ ਕੋਟਕਪੂਰਾ ਰੋਡ ਉਪਰ ਸ਼ਿਵ ਮੰਦਰ ਦੇ ਨੇੜੇ ਇਕ ਛੋਟੇ ਹਾਥੀ ਨੇ ਉਸ ਨੂੰ ਫੇਟ ਮਾਰ ਦਿੱਤੀ। ਫੇਟ ਨਾਲ ਕਮਲੇਸ਼ ਸੜਕ ਉਪਰ ਡਿੱਗ ਪਿਆ। ਉਸ ਦੇ ਡਿਗੇ ਪਏ ਦੇ ਉਪਰ ਦੀ ਇਕ ਥਾਰ ਗੱਡੀ ਲੰਘ ਗਈ। ਇਸ ਨਾਲ ਕਮਲੇਸ਼ ਦੇ ਕਾਫੀ ਸੱਟਾਂ ਲੱਗੀਆਂ। ਉਸ ਦਾ ਸਾਈਕਲ ਵੀ ਟੁੱਟ ਗਿਆ। ਇਸ ਸਾਰੀ ਘਟਨਾ ਬਾਰੇ ਕਮਲੇਸ਼ ਦੇ ਭਰਾ ਨੇ ਥਾਣਾ ਸਿਟੀ ਪੁਲੀਸ ਨੂੰ ਸੂਚਨਾ ਦਿੱਤੀ। ਪੁਲੀਸ ਨੇ ਛੋਟੇ ਹਾਥੀ ਦੇ ਡਰਾਈਵਰ ਨੂੰ ਕਾਬੂ ਕਰ ਲਿਆ ਹੈ।